Read ngando Luka 9 Bible Online

Luka 9 - ngando bible

Luka 9

¹Ko aosolonganya bakili’anande jo l’ate, ko amafa mpamba ko la lifoka eneyali bademona bahatu, ko lacina baiky’ato nkangi.

²Ko amatoma lacin’eho basekodya bosimo bona lifoka lina Yakomba, ko baiky’ato nkangi.

³Ko amasumola, ate, Botatolake iyema lacin’ena bokit’onino, efan’onganza, efana ntombe, efana mampa, efan’osolo; botaatake bekoto’efe’efe;

⁴ko en’otumba bon’etaketaka bonatu’ino, bomboyala nkwaho, ko bemwa lakina nko meho.

⁵Ko nk’en’oka bato bafakotamb’ino, eneng’in’ouma en’onyang’oho botitola lofucifuci en’akak’anino yoka ndembi eneyal’iyo.

⁶Koko baocoa, ko baotianya benyanga, baosekodya bosimo bon’olotsi, ko baiky’ato en’ili behetu.

⁷Ko Elode, vice-gouverneur, aoka baoyi bahatu banilamaka, ko aokandakanda bike, lacin’oka bato’amoi baila, Mbo Yoane amoletwa en’ewedi;

⁸ko bamoi, Mbo Eliya amenya; ko bakina, Mbo bosumoli’omoi on’alale amenya lakina.

⁹Ko Elode aila, ate, Mosila likesa Yoane bote; koko boto’one onok’emi baoyi’ane ande nai? Ko aofon’etelo oyeena.

¹⁰Ko bakili, enek’iy’outaka, baosumola Yesu baoyi banak’iy’okambaka. Koko amatamba, ko baocoa nk’iyo kei en’edye emoi en’onyanga bona Betesaida.

¹¹Koko eneki bato bik’ike oeyaka yoi liho, bamokila nkwaho; ko amasangela nko l’olotsi, ko amalokwela baoyi bana lifoka lina Yakomba, ko aikya iy’anayaaki la nkangi.

¹²Ko eneki likolo omatsaka liyela, ba-jo l’afe baoya, iy’ate, Tongola bato’aho bik’ike, lacin’eho bacu en’engili l’en’iluku binoli, baate etamelo ko la toma tona ndaka; lacin’oka toyali nko mane ena sengelenge.

¹³Ko amasumola, ate, Inoamene baf’iyo toma tona ndaka. Iy’ate, Iso toyali la mampa itano ko la nse ife kei, umola nko tocoa osombela bato’ane bahatu toma.

¹⁴Lacin’oka bayaaki mpame yoka nkoto itano. Aosumola bakili’anande, ate, Basumole bakisase en’eloi, boloi l’oloi bato yoka ntuk’itano.

¹⁵Ko baila yok’oho, ko bamakitsa en’ase.

¹⁶Ko aotamba mampa ih’itano ko la nse ih’ife, aolenda ena loola, aosakela toma toho bosako, ko aokesa toho, ko aofa bakili lacina balekedya bato’aho bik’ike.

¹⁷Ko baola toma, ko iyatu baokinda liota; ko baambola bitate binicikalaki batungu jo l’afe.

¹⁸Koko eneki’nd’oondaka ena lokuko, bakili’anande bayaaki l’ende; ko amaufola, ate, Bato bantang’emi nai?

¹⁹Ko baokutola, iy’ate, Yoane Bini; koko bamoi, Mbo Eliya; koko bakina, Mbo bosumoli’omoi on’alale amenya lakina.

²⁰Ko amasumola, ate, Nd’inoamene, bontang’emi nai? Ko Petelo aokutola, ate, Onde Masiya mene ona Yakomba.

²¹Koko amafekya, amasimba, batasumolake boto’omoko yoi line;

²²ate, Akoli eneyali Bon’on’oto aene bino l’aoyi’ike, ko bingambe la nkanga ina toome la batengi ban’ekanda bangotembol’ende, bangoyak’ende; ko angetwa en’ina bon’esaso.

²³Ko aosumola bato bahatu, ate, Yomb’oto alanga ankil’emi, tumb’ende ayofim’endamene, ko aambole ekulusu enande bina l’ina, ko ankile.

²⁴Lacin’oka boto on’etaketaka onolanga lacina amonya liiko lonande, angungya loho; koko boto on’etaketaka onungya liiko lonande lacin’enami, angosungya loho.

²⁵Nk’en’oka boto akitanya lituka lina loko lohalotu, ohonde ayoungy’endamene, ayehy’endamene, nkita enat’ende eka nai?

²⁶Lacina onongonjok’emi l’aoyi’anami nsoi, Bon’on’oto angok’ende nsoi, enengi’nd’oya la bokoka bonandamene ko la boho bon’afango ko la boho bona bikima bin’oeka.

²⁷Koko lako sumol’ino solosolo, bamoi bayali banemali mendo banafayene bewedi tu, yengoko baena lifoka lina Yakomba.

²⁸Koko yoka bekolo mwambi ena mbusa ena bitendelo bine, aotamba Petelo la Yoane la Yakobo, ko aanda ena lingonji oyonda meho.

²⁹Ko enem’end’oonda, bokotua bon’elongi enande bohalingwa bokotu’okina, ko bisenda binande bioyalama telele, nko kalikali.

³⁰Ko lenda, bato’afe baesola l’ende, nko Mose l’Eliya;

³¹iyo baenya la bokoka, ko baotenda lacin’ena bewedi benengi’nd’ow’olo ena Yelusalema.

³²Petelo l’iy’anayaaki l’ende baowa l’ilo, koko enek’iy’oetwaka, baena bokoka bonande, ko l’ato’afe banemali l’ende.

³³Koko enek’iyo l’ende okambwanaka, Petelo aosumola Yesu, ate, Nkolo, bolotsi eneyal’iso toyali mane; tofake balombe basaso: limoko line, limoko lina Mose, ko limoko lin’Eliya. Lacin’oka ateya yoi linaliki’nd’otendaka.

³⁴Nk’enem’end’otenda baoyi’ako, lilo yoya ko limakunda, ko baoka losomo enek’iy’otuaka ena lilo.

³⁵Ko lofoso lookana ena lilo, ate, One nko Bon’onami ona nganji; bolofak’ende.

³⁶Ko eneki lofoso osilaka, Yesu aenya nk’ende kei. Ho iyo baoyala nko mwi, ko batasumola boto’omoko en’ina beho yoi limoko linalik’iy’oenaka.

³⁷Koko en’ina bona loi, enek’iy’okitaka ena lingonji, bik’ike bon’ato baukana l’ende.

³⁸Ko lenda, boto’omoi on’ato’aho bik’ike aololua, ate, Bolaki, lakoonda, oyolende bon’onami ona mpame, lacin’ende ayali bon’onami ona likinda;

³⁹koko lenda, lifoi yotua eneyal’ende, ko kaimo ende afoma nko befwi; ko lifoi limokilimodya la nkele, lacina aile yoka bafulo en’onyua, ko lifoi lifocike isanga, yengoko limookya efafo bike,

⁴⁰Ko emi loondaka bakili’ane lacina bafodya liho, koko iyo batinya.

⁴¹Yesu aokutola, ate, En’eotwelo ene ena bocilingitano enefan’imeedyo, nongoyala l’ino bolingolingo’oya? nkoledy’ino bolingolingo’oya? Yaka l’on’one mendo.

⁴²Nk’eneyay’ende, lifoi limosokodya la nkele, ko limokilimodya l’efafo mene. Koko Yesu aofela lifoi lina nsefo lofeli, ko aikya bonome’ona mpame, ko amuutodya eneyali bafango.

⁴³Ko bato bahatu baofefa la mpamba ena nkolo mene ena Yakomba. Koko enek’iy’ofefaka l’aoyi’ane banaki Yesu okambaka, aosumola bakili’anande,

⁴⁴ate, Botoyaka baoyi’ane en’atoi’anino; lacin’oka Bon’on’oto angolekyama en’akasa ban’ato.

⁴⁵Koko iyo batanonganya ncina en’etendelo ene, eho eofisama eneyal’iyo, lacina batongofokol’eho; ko batufol’ende ncina en’etendelo ene, lacin’oka baangaki.

⁴⁶Koko baomatsa yatana ntango, noka, onosokoyala yok’iyome iniyo nai?

⁴⁷Koko eneki Yesu ofokolaka bekaokando ben’etem’eniyo, aotamb’onome, ko ameemadya nk’ena mbolimboli l’endamene,

⁴⁸ko amasumola, ate, Onosangela bonome’one ena lina linami, aosangel’emi; ko ononsangel’emi, asangel’ende onontomaki; lacin’oka, ende onofana lokumo tu eneyal’ino, angoyala on’okolo.

⁴⁹Ko Yoane amokutwela, ate, Nkolo, tenaki boto onofodyaki bademona ena lina line, ko tomolosimba, lacina enefamban’ende l’iso.

⁵⁰Koko Yesu amosumola, ate, Tofekyake; lacin’oka boto onofatofeky’iso ayali nko l’iso.

⁵¹Koko eneki bekolo oolamaka likoka lacina ailedyama ena loola, aeledya elongi enande ena Yelusalema lacina acu meho nko la ndokodya.

⁵²Ko aotoma bikima en’oso bon’elongi enande; ko baocoa, baotua en’onyang’omoi bana baise Samalia oyokoedy’ende meho.

⁵³Ko batosangela, lacin’oka elongi enande eyaaki nk’eyoka angocoa Yelusalema.

⁵⁴Ko eneki bakili’anande Yakobo la Yoane oenaka yoi liho, baila, iy’ate, Nkolo, olanga nde telele nkoi ikite ena loola, ko ikady’iyo nko kali, yok’onoki Eliya oilaka?

⁵⁵Koko aohelengwa, amafela, (ate, Ino bofeya bokotua bon’olimo’onino, lacin’oka Bon’on’oto ataya oyehy’ato: amoya oyaikya).

⁵⁶Ko aocoa bonyang’okina.

⁵⁷Koko enem’iy’ocoa ena mboka, boto’omoi amosumola, ate, Nongokokil’e bili bon’etaketaka bonaco’e.

⁵⁸Yesu amosumola, ate, Bembanga beyali la bekole beniyo, ko mpulu ina liko iyali la baocu; ohonde Bon’on’oto afan’edye enamby’ende bote’onande.

⁵⁹Ko aosumol’okina, ate, Onkile. Koko ende, Mbo Nkolo, ompe etelo ncu okunja bafango’onami en’oso.

⁶⁰Koko Yesu amosumola, ate, Bato ban’ewedi bakunjake ban’ewedi baniyoamene; koko e, coaka oyosekodya bosimo bona lifoka lina Yakomba.

⁶¹Ko okina aila, ate, Nkolo, nongokokila, ohonde en’oso ompe etelo ncu osesa iy’anayali en’otumb’onami.

⁶²Koko Yesu amosumola, ate, Efan’oto onila likasa linande ena efeko ena ncima ko ait’olenda ena mbusa asokokolana la lifoka lina Yakomba.