Read ngando Yoane 1 Bible Online

Yoane 1 - ngando bible

Yoane 1

¹Yoi liyaaki ena limatsako, ko Yoi liyaaki la Yakomba, ko Yoi liyaaki nko Yakomba.

²Ende ayaaki ena limatsako nko la Yakomba;

³toma tohatotu tonunolamaki l’Ende, efana nko le iyema imoko initanunol’ende.

⁴Liiko loyaaki eneyal’ende, ko liiko loyaaki fololo en’ato;

⁵koko fololo eololoma ena liucu, koko liucu litanonganya eho.

⁶Boto’omoi aenyaki, onoki Yakomba otomaka, lina linande nko Yoane.

⁷Ende ayaki lacina ayalame bosumoli, asumole bosimo bona fololo, lacin’eho bato bahatu baimedya nko l’ende.

⁸Endamene atayala fololo eho: ayaki lacina asumole bosimo bona fololo.

⁹Fololo ena solosolo eoya ena loko, nk’eho enefoladya boto l’oto.

¹⁰Ende ayaaki ena loko, ko loko lonunolamaki l’ende, koko baise loko bateeya.

¹¹Ayaki enek’enandamene, koko banandamene batotamba.

¹²Ohonde iy’anotambaki, amaf’iyo etelo lacina bayalame ban’ana Yakomba, nk’iy’animedya ena lina linande;

¹³nk’iyanotwaki, efa l’akila, ko efa l’eango ena yonge, ko efa l’eango en’oto: baotwaki nko la Yakomba.

¹⁴Ko Yoi liyalamaki bonufo, ko litongaki l’iso, (tomena bokonde bonandebokonde yoka bosamb’onoyali boho bona bon’ona likinda bona Bafango), nko ndola l’isei ko la solosolo.

¹⁵Yoane aotenda yoi lacin’enande, aololua, ate, One nk’ende onoki’m’okosumolak’oka, Onongoya ena mbusa enami angoyala nk’en’oso’onami, lacin’oka ayaaki en’oso’onami.

¹⁶Isatu tomotamba nk’ena efulelo enande, isei ncindana l’isei.

¹⁷Basangya bafamaki la Mose, isei la solosolo baoya nko la Yesu Masiya.

¹⁸Bisike bihitu, efana nko le boto onenaki Yakomba: Bon’ona likinda, onoyali ena ntolo ena Bafango, amomenyanya.

¹⁹Bone nko bosimo bonoki Yoane osumolaka nkanga la Ba-Lewi banatomamaki la Ba-Yuda bana Yelusalema lacina bayufol’ende, Mbo e oyali nai?

²⁰Aimedya, ataangana tu, aimedya, ate, Emi mpayali Masiya.

²¹Ko bamufola, iy’ate, Nk’ofayali ende, iya nai lakina? Oyali nde Eliya? Ate, Efana, mp’ende. Onde bosumoti’oho? Ate, Efana.

²²Koko bamufola, iy’ate, Onde nai? lacin eho takutwel’iyo banatotomaki. Yoi linatend’e lacin’eneamene lika nai?

²³Ende aila, ate Emi nko lofoso lon’oto’omoi onololua ena sengelenge, ate, Bonanola mboka ena Yawe cilili, yoka bosamb’onoki Yesaya bosumoli otendaka.

²⁴Iy’anatomamaki eneyal’ende bayaaki Bafalusi.

²⁵Ko bamufola, iy’ate, Nk’ofayali Masiya, ko ofayali Eliya, ko ofayali bosumoli’oho, ncina enin’e bato en’asi eka nai?

²⁶Yoane amakutwela, ate, Emi lin’ato en’asi, ohonde Omoi aemali ena ntoto enino onofey’ino,

²⁷nk’ende onoya ena mbusa enami, ko emi mpakoli lacina nditole bekoli bena tombwaku tonande.

²⁸Baoyi’ane bailamaki ena Betania, en’ili bona Yoladane, en’esanga eneki Yoane oinak’ato en’asi.

²⁹En’ina bona loi, Yoane aena Yesu aoya eneyal’ende, ko aila, ate, Lenda, bon’ona mpate bona Yakomba, onumola bowe bona loko.

³⁰One nk’ende onoki’m’oilak’oka, Ena mbus’enami boto’omoi aoya onoyalama en’oso’onami, lacin’oka ayaaki en’oso’onami.

³¹Ko emi nteeya; koko loya oyin’ato en’asi lacin’eho ende aenya eneyali Yisalaele.

³²Ko Yoane aotenda, ate, Njenaki Bolimo ayakite ena loola yok’ekoso; ko aoyalama eneyal’ende mmotama.

³³Koko emi nteeya; ohonde onontomaki oyin’ato en’asi ansumolaki, ate, Ende onongi oena Bolimo ayakite ko ayamotame eneyal’ende, oko nk’ende onin’ato ena Bolimo bon’olotsi.

³⁴Ko emi mena, ko njali temoin ena yoi line: One nko Bon’ona Yakomba.

³⁵Lakina en’ina bona loi, Yoane aemali, ende l’akili’anande bafe;

³⁶aolenda Yesu kum’ayakende, ko aila, ate, Lenda, Bon’ona mpate bona Yakomba!

³⁷Koko bakili bah’afe baoka yoi linaliki’nd’otendaka, ko baokila Yesu.

³⁸Ko Yesu aohelengwa, ko amaena kuma bayokile, ko amaufola, ate, Onafon’ino? Iyo bamoutodya, iy’ate, Labi, (ncina ena Labi nko Bolaki), okisase meya?

³⁹Ende amasumola, ate, Boyaka, boyene. Ko baocoa, baena litonga linande, ko baoyala l’ende bin’oho; yefa liyaaki yombo quatre heures.

⁴⁰Omoko oniyo’afe banokaki Yoane ko bakilaki Yesu nko Andelo, onotwaki la Simona Petelo en’ecimo.

⁴¹Onoki’nd’osungyak’oso nko Simona onotwa l’ende, ko amosumola, ate, Tomena Masiya, nko Kilisito.

⁴²Ko aoya l’ende eneyali Yesu. Ko Yesu amotakamela, ko aila, ate, E oyali Simona, bon’ona Yoane: ongotangama Kefa (ncina ena Kefa nko Petelo, nko Lufe).

⁴³En’ina bona loi ayaaki la lisangya lacina acu Ngalilaya, ko aosungya Filipo, ko Yesu amosumola, Onkile.

⁴⁴Filipo ayaaki bise Betesaida, nk’onyanga bona Andelo la Petelo.

⁴⁵Filipo aosungya Natanaele, ko amosumola, ate, Tomosungya ende onoki Mose otengaka baoyi en’asangya, ko onoki basumoli otengak’aoyi: nko Yesu ona Nazaleta, bon’ona Yosefa.

⁴⁶Natanaele amutodya, Mbo yoi liney’olotsi yafola nde ena Nazaleta? Filipo amosumola, ate, Yak’oyene.

⁴⁷Yesu aena Natanaele kum’ayayi eneyal’ende, ko aila, ate, Lenda, Bo-Yisalaele ona solosolo, onofana bokandokando tu.

⁴⁸Natanaele amufola, ate, Onjey’emi bosamb’oya? Yesu amokutwela, ate, Kuma Filipo atakeelela, kum’oyali en’ase’a bote bona liteli, emi nkeenaki.

⁴⁹Natanaele aokutola, ate, Labi, onde Bon’ona Yakomba, Lifoka lina Roi lina Yisalaele.

⁵⁰Yesu amokutwela, ate, Imedya nde lacin’eneki’m’okosumolak’oka, Nkeenaki en’ase’a bote bona liteli? Ongena baoyi banaleki bane.

⁵¹Koko amosumola, ate, Solosolo, solosolo, lakosumol’ino, bongena loola lokombwa, ko bikima bina Yakomba bayailele ko bayakite eneyali Bon’on’oto.