Read ngando Yoane 10 Bible Online

Yoane 10 - ngando bible

Yoane 10

¹Solosolo, solosolo, lakosumol’ino, onofatua en’ofolo bon’emonyedyo ena mpate, ohonde aanda en’ili’omoi, ande liya la bokumoli.

²Koko ende onotua en’ofolo, ande botombanyi bona mpate.

³Onotombanya bofolo amokombwela lokombo, ko mpate baoka efodya enande, ko aelela mpate inande nko l’aina, ko afodya iho.

⁴Enakady’ende lifodya mpate inande ihatu, endamene aeta en’oso’oniyo; ko mpate baokil’ende, lacina mpate baeya efodya enande.

⁵Koko bafakilaki bofenda: bangolota nko ndota; lacin’iyo bafe ya efodya ena befenda.

⁶Yesu amasumola ekolanya ene, koko iyo batafokola ncina en’aoyi banaki’nd’oasumolaka.

⁷Lacin’eho, Yesu amasumola lakina, ate, Solosolo, solosolo, lakosumol’ino, Emi nde nde lokombo lona mpate.

⁸Iyatu banayaki en’oso’onami bayaaki baiya l’akumoli; koko mpate bataok’iyo.

⁹Emi nde nde lokombo; yomb’oto aotua l’emi, angika, ko angotua, ko angofola, ko angosungya toma tona ndaka.

¹⁰Liya aoya nko la ncina emoko kei: nko lacina aiya, ko ayake, ko aehya; emi moya lacina baate liiko, ko baate loho nko la mpula.

¹¹Emi nde nde Botombanyi bona mpate bon’olotsi; Botombanyi bona mpate bon’olotsi aambya liiko lonande lacin’ena mpate.

¹²Bosali, onofayali Botombanyi mene, ko onofayali mene mpate, enen’ende nkoi eyayi, aumbela mpate, ko aolota; ko nkoi aunda mpate, ko aofanzol’iho.

¹³Bosali aolota lacin’oka ayali nk’osali kei, ko afakanele mpate.

¹⁴Emi nde nde Botombanyi bona mpate bon’olotsi; ko leya banamamene, ko banamamene banjey’emi,

¹⁵yoka bosamb’onanjeya Bafango’onami, ko emi leya Bafango; ko laambya liiko lonami lacin’ena mpate.

¹⁶Koko njali la mpate imoi inifayali ina botong’one; akoli eneyal’emi nje l’iyo nkoho, ko bangolofamela efodya enami; ko bangoyala botonga bomoko, la Botombanyi bomoko.

¹⁷La ncina ene Bafango’onami anjok’emi nganji, lacin’emi laambya liiko lonami lacina njambole loho lakina.

¹⁸Efan’oto ononkumol’emi loho: emamene kongoambya loho. Njali la lifoka lacina njambya loho, ko njali la lifoka lacina njambole loho lakina. Lotomo loneloki Bafango’onami ontomaka nde lone.

¹⁹Ba-Yuda bait’okambwana beloi lacin’ena baoyi’ane.

²⁰Bike’oniyo bila, Mbo ayali la demona, ko aolowa; bolof’ende lacina nai?

²¹Bakina, Mbo efana, bin’itendelo’ine bifayali bitendelo bin’oto onoyali la demona. Iya, demona ainya nde lilifola baiso ban’oto’onodyaki’aiso?

²²Ko elambedya ena Eekedyo eoyela ena Yelusalema, nk’en’esike ena lifia.

²³Ko Yesu aoselasela en’otumba bona Yakomba, ena mbalasai enetangama ena Solomona.

²⁴Nkwaho Ba-Yuda bamolingamedya, ko bamosumola, iy’ate, Otokakanza bolingolingo’oya? Yomb’oyali Masiya, otosumole fololo.

²⁵Yesu amakutwela, ate, Mokosumol’ino, koko bofimedya; bikambwa binakamb’emi ena lina lina Bafango’onami, temoin enami nde biho.

²⁶Koko ino bofimedya, lacin’ino bofayali mpate inami.

²⁷Mpate inami baoka efodya enami; lomaey’iyo, ko bankil’emi;

²⁸ko lomafa liiko lonelofakale, ko bafehaki tu; ko efan’oto ononkumol’iyo ena likasa linami.

²⁹Bafango’onami onompak’iyo aleki bahatu, ko efan’oto oninya yakudya ena likasa lin’afango’onami.

³⁰Emi la Bafango toyali nk’omoko.

³¹Lakina Ba-Yuda baambola baufe lacina baofusele.

³²Koko Yesu amakutwela, ate, Mokotum’ino bike bon’ikambwa bin’olotsi eneyali Bafango’onami: la bikambwa biho, ino bompusel’emi baufe lacin’en’ekambwa eka nai?

³³Ba-Yuda baokutola, iy’ate, Tofakofusele baufe lacin’en’ekambwa en’olotsi: tokofusela lacin’ena besao benasaiy’e Yakomba, ko lacin’e, onoyali nko boto kei, oyoil’eamene Yakomba.

³⁴Yesu amakutwela, ate, Yoi line lifatengama nde en’ekand’enino: Njilake’oka ino boyali yakomba imoi?

³⁵Yombo atang’iyo yakomba banaki yoi lina Yakomba ofamaka (ko Bitengelo bina Yakomba bifasondolama),

³⁶ino bila lacin’enande onoki Bafango oekyaka en’oeka, ko onoki’nd’otomaka ena loko, in’ate, Osaiya Yakomba, lacin’eneki’m’oilaka, emite, Emi nde nde Bon’ona Yakomba?

³⁷Yombo mpakambe bikambwa bina Bafango’onami, botanjimedyake;

³⁸ohonde, yombo njakambe biho, kanga bofanjimedy’emi, bimedya nko bikambwa, lacina beye ko bofokol’oka Bafango ayali eneyal’emi, ko emi nk’eneyal’ende.

³⁹Baomeka lakina oyuunda, koko auma en’akas’aniyo.

⁴⁰Ko autwa lakina en’ili bona Yoladane, en’edye eneki Yoane oinak’ato en’oso, ko aoyala nkwaho.

⁴¹Ko bato bike baoya eneyal’ende, iy’ate, Solosolo, Yoane mene atakamb’ekambwa yoka ndembi; ohonde baoyi bahatu banaki Yoane otendaka lacin’ena boto’one bayaaki nko solosolo.

⁴²Koko bato bike bamimedya nko meho.