Read ngando Yoane 11 Bible Online

Yoane 11 - ngando bible

Yoane 11

¹Boto’omoi ayaaki la nkangi, Lazalo ona Betania, bonyanga bona Malia l’otoolo’onande Malata.

²Lazalo ayaaki mbangela ena Malia oho onohinyaki Nkolo l’auta bana mpimbo en’olotsi, ko onolifolaki bakak’anande la lifo linande.

³Bayato’ah’afe, botoolo l’akune, baotomela Yesu yoi, iy’ate, Nkolo, lenda, ende onok’e nganji aowa nkangi.

⁴Koko eneki Yesu ookaka, aila, ate, Nkangi ene efayali nkangi en’ewedi: eyali lacin’ena lokumo lona Yakomba, lacin’eho Bon’ona Yakomba akumyame l’eho.

⁵Yesu aokaki Malata l’akune’onande ko la Lazalo nganji.

⁶Lacin’eho, eneki’nd’ookak’oka ayali la nkangi; aocikala bekolo bekin’efe en’edye eneki’nd’oyalaka.

⁷Ena mbus’eho aosumola bakili, ate, Tutwake ena Yudea lakina.

⁸Bakili bamosumola, iy’ate, Labi, Ba-Yuda bafonaki nko kekeke’ane lacina bakofusele baufe, ko ocoa meho lakina?

⁹Yesu aokutola, ate, Bin’omoko bofayali nde la heures jo l’ife? Nk’oto aselasela l’ane afapusumwa, lacin’ende aena fololo ena loko lone.

¹⁰Koko yomb’oto aselasela l’oco, apusumwa, lacina enefana fololo eneyal’ende.

¹¹Aotenda baoyi’aho, ko ena mbusa amasumola, ate, Efili eniso eka Lazalo aeci en’ilo; koko emi locoa oyeetoia en’ilo.

¹²Koko bakili’anande baila, Mbo Nkolo, yombo aeci, tumbe angika.

¹³Yesu atendaki lacin’ena bewedi benande; koko iyo baokanel’oka atendaki lacin’ena mpomya en’ilo.

¹⁴Nkwaho Yesu amasumola fololo, ate, Lazalo amowa;

¹⁵koko lakik’ekiko enetayal’emi meho, lacin’eho ino bimedya. Mbo tocu eneyal’ende.

¹⁶Toma, onotangama Yasa, aosumola bakili’amoi, ate, Tocoake nkoho, lacina towu iso l’ende.

¹⁷Eneki Yesu oyelaka meho aosungy’oka amoyala ena nketa bekol’enei.

¹⁸Betania eyaaki mbolimboli la Yelusalema, nko kilometres isaso en’atenyi.

¹⁹Ko bike bona Ba-Yuda baoya eneyali Malata la Malia lacina bayoledy’iyo lacin’ena mbangela eniyo.

²⁰Koko eneki Malata ookak’oka Yesu amoya, aocoa oyukana l’ende, koko Malia aocikala en’otumba.

²¹Malata aosumola Yesu, ate, Nkolo, yombo oyaaki mendo, tumbe mbangela enami atawa.

²²Koko le isanga emi ley’oka yoi lin’etaketaka linayufol’e Yakomba, Yakomba, angokofa.

²³Yesu amosumola, ate, Mbangela ene angetwa lakina en’ewedi.

²⁴Malata amosumola, ate, Ley’oka angetwa lakina en’eetwelo en’ina bona nsimbo.

²⁵Yesu amosumola, ate, Emi nde nde Eetwelo ko la Liiko; ende ononjimedy’emi, kang’aowa, angika;

²⁶ko boto l’oto onoyaike, ko anjimedy’emi, afawaki tu. Oimedya nde yoi line?

²⁷Ate, O, Nkolo; mimedy’oka E onde Masiya, Bon’ona Yakomba, nk’ende onoya ena loko.

²⁸Ko eneki’nd’otendaka baoyi’ane, aocoa oyelela bakune’onande ena lokuko, ate, Bolaki ayali, ko akelela.

²⁹Eneki’nd’ookaka yoi line, aemala isasanga, ko aocoa eneyal’ende.

³⁰En’esik’eho Yesu atafole en’onyanga: ayaaki nk’en’edye eneki Malata oukanaka l’ende.

³¹Ba-Yuda banayaaki en’otumba la Malia, ko banolombwelaki lokeseli, enek’iy’oenaka Malia aemala nkwaho ko aofola, bamokila, lacin’iyo bakanelaki’oka amocoa olela ena nketa.

³²Koko eneki Malia oyelaka en’edye eneki Yesu oyalaka, ko ameena, aokwa en’akak’anande, ko amosumola, ate, Nkolo, yombo oyaaki mendo, tumbe mbangela enami atawa.

³³Eneki Yesu oenak’ende ayalele, ko Ba-Yuda banayaki l’ende bayalele, aotatana en’otem’onande, ko botem’onande bokeswa la lokeseli, ko aila, ate,

³⁴Bomolokunja meya? Iy’ate, Nkolo, yak’oyene.

³⁵Yesu aolela mposoli.

³⁶Nkwaho Ba-Yuda baila, Mbo lenda, bokotua bona nganji eneki’nd’ookak’ende!

³⁷Ko bamoi’aniyo baila, iy’ate, Boto’one onolifolaki baiso ban’iyo banodyaki’aiso, atakolana nde lisimbya bewedi ben’oto’one, lacina afawu?

³⁸Lacin’eho, Yesu aotatana lakina en’otema, aoya ena nketa. Eho eyaaki bokole ena lufe liney’okolo, ko lufe limoi yekama en’ofolo.

³⁹Yesu aila, ate, Bumola lufe. Malata, mbangela enande onowaki, amosumola, ate, Nkolo, amosila licoa nsole, lacina amowa bekol’enei.

⁴⁰Yesu amosumola, ate, Ntakosumola nde, nk’iimedya, ongena bofilo bona Yakomba?

⁴¹Koko baoumola lufe. Ko Yesu aenol’aiso’anande ena liko, aila, ate, Bafango, lakokumya lokumo lacin’oka onjokaki;

⁴²ko emi njeyaki’oka ondofamela bisike bihitu; ohonde lotendaka yok’osamb’one lacin’ena bato bik’ike banemali mane, lacin’eho iyo baimedy’oka e kongontomaki.

⁴³Ko eneki’nd’otendaka baoyi’ane, aololua la lofoso lona lokolo, ate, Lazalo, folaka!

⁴⁴Ko ende onowaki aofola, bakaka l’akasa nko ndingamela l’isenda bina nkunja, ko elongi nko ndingamela l’itambala. Yesu amasumola, ate, Bokakole, acu.

⁴⁵Nkwaho bike bona Ba-Yuda banayaki eneyali Malia, ko baenaki ekambwa eneki Yesu okambaka, baimedy’ende.

⁴⁶Ohonde bamoi baocoa eneyali Bafalusi, ko bamasumola baoyi banaki Yesu okambaka.

⁴⁷Nkwaho nkanga ina toome la Bafalusi baosolonganya likita, ko baila, iy’ate, Tongil’oya? lacina boto’one aila ndembi bike.

⁴⁸Nko tomocika yok’osamb’one, tumbe bato bahatu bangiimedya. Ko baise Loma bangoya, ko bangotokumola le bonyang’oniso le bato’aniso.

⁴⁹Koko omoi’oniyo, Kayafa, onoyaaki. nkanga iyome ena mbula eho, amasumola. ate, Ino bofanonganya yoi limoko,

⁵⁰ko botakanel’oka ekoli lacina boto’omoko awu lacin’ena bato’aniso, bato’aniso bahatu batoyowa.

⁵¹Aotenda yok’osamb’oho, efa lacin’enandamene: nko lacin’oka ayaaki nkanga iyome ena mbula eho, ko alakamaki en’olimo lacina ail’oka Yesu angowela bato’aniyo,

⁵²ko efa lacin’en’ato’aho kei, ohonde lacina asolonganya ena botong’omoko bana bana Yakomba banafalangasanyi.

⁵³Bina l’ina ena mbus’eho baang’eango lacina baoyake.

⁵⁴Lacin’eho, Yesu atut’oselalsela ena ntoto ena Ba-Yuda ena fololo; auma meho, ko aocoa ena benyanga benoli la sengelenge, en’ecimo enetangama Efulaima, ko aoyalama meho, ende l’akili’anande.

⁵⁵Koko elambedya ena Ba-Yuda, nk’ena Etelo, eolama; ko bike bon’ato baocika benyanga, ko baocoa ena Yelusalema en’oso bon’elambedya, lacina bayokul’iyoamene.

⁵⁶Baofona Yesu; ko enem’iy’oemala en’otumba bona Yakomba baotendana, Mbo ino bokanel’oya? Angoya nde en’elambedya?

⁵⁷Ko nkanga ina toome la Bafalusi baosekodya yoi, lacina boto on’etaketaka oney’oka Yesu ayali en’edye ntutuma atende, lacina baunde.