Read ngando Yoane 12 Bible Online

Yoane 12 - ngando bible

Yoane 12

¹Koko bekol’otoa en’oso bon’elambedya ena Etelo, Yesu aoyela ena Betania, bola bona Lazalo onoki Yesu oetolaka en’ewedi.

²Ko bamofumbela elambedya meho; ko Malata amakambya la toma, koko Lazalo ayaaki omoi’oniyo banakisaki’ase ena mesa ena toma l’ende.

³Koko Malia aotamba bauta bana mpimbo en’olotsi, yoka kilo emoko, bauta ban’otuya mene, ko aohinya bakaka bana Yesu l’aho, ko aolifol’akak’anande la lifo linande; ko botumba bolola la nsole en’olotsi en’aut’aho.

⁴Koko Yudasa, bise Keliota, bon’ona Simona, omoi ona bakili’anande, nk’ende onongangel’ende, aila, ate,

⁵Baut’ane batatekyama la deniers bekam’esaso lacina nai? ko francs iho yokafama eneyali bato biinda?

⁶Aotenda yok’osamb’oho, efa lacin’oka aokaki bato biinda isei: aotend’oho lacin’oka ayaaki liya, ko lacina amonyaki ntombe, ko atolaki francs inik’iy’osongaka meho.

⁷Nkwaho Yesu ate, Bocike; amomonya baho lacin’ena bina bon’ekunjelo enami;

⁸lacina bato biinda bayali l’ino bisike bihitu; koko bofambat’emi bisike bihitu.

⁹Bik’ike bona Ba-Yuda baey’oka Yesu ayali meho; ko baoya, efa lacin’ena Yesu kei, ohonde lacin’eho baene Lazalo, onoki’nd’oetolaka en’ewedi.

¹⁰Ko nkanga ina toome baang’eango lacin’eho bayake Lazalo nkoho;

¹¹lacin’oka bike bona Ba-Yuda bamacik’iyo, ko baimedya Yesu, nko lacin’enande.

¹²En’ina bona loi, bik’ike bon’ato, enek’iy’ookak’oka Yesu amoya ena Yelusalema,

¹³baotamba baanga ban’atoko, ko baocoa oyukana l’ende kuma bayalolua, iy’ate, Hosana! Ende onoyayi ena lina lina Yawe, Lifoka lina Roi lina Yisalaele, aosakelama bosako!

¹⁴Koko Yesu aosungya bon’ona mpunda, ko aotalamel’eho, yok’onoki yoi otengamaka,

¹⁵Taangake, e bon’on’oyoto ona Siona, lenda, lifoka line aoya, nko ntalama ena bon’ona mpunda.

¹⁶Koko bakili’anande batanonganya baoyi’ane en’oso; ohonde eneki Yesu oyelaka en’okonde’onande, iyo baofwaki’oka baoyi’ane batengamaki’ale lacin’enande, ko bato bailaki baoyi’a ne eneyal’ende.

¹⁷Bato’aho bik’ike banayaaki l’ende eneki’nd’oelelaka Lazalo ena nketa, ko eneki’nd’eetolaka en’ewedi, baenyanya baoyi’aho;

¹⁸ko la ncina ene, bato bik’ike baocoa oyukana l’ende, nk’enek’iy’ookak’oka akambaki ekambwa eho.

¹⁹Nkwaho Bafalusi baotendana, iy’ate, Benaka, bofalonge tu; mbo lenda, loko lohalotu lomocoa okilana l’ende.

²⁰Bato’amoi bana Elene bayaaki l’iyo banacoaki en’elambedya okumya Yakomba.

²¹Iyo baoya eneyali Filipo, bise Betesaida, ecimo emoi ena Ngalilaya, ko bamufola, iy’ate, Nkolo, tolanga tene Yesu.

²²Filipo aoya, aosumola Andelo, ko Andelo la Filipo baoya osumola Yesu.

²³Yesu amakutwela, ate, Esike emoyela lacina Bon’on’oto akumyame.

²⁴Solosolo, solosolo, lakosumol’ino, Yombo lino lin’asongu lifakwa ena loko, ko lifawu, liciki nko lihoamene kei; koko yombo liho yowa yot’emamo bike.

²⁵Ende onongolanga lacina aundamele liiko lonande, angungya loho, koko ende onoka liiko lonande bowe ena loko lone, angomonya loho nko lacin’ena liiko lonelofakale.

²⁶Nko boto ankambel’emi bikambwa, ankilake; ko enayal’emi, bosali’onami angoyala nko meho. Nko boto ankambel’emi bikambwa, Bafango’onami angokumy’ende.

²⁷Isanga bolimo’onami boka bolito bike mene, ko yoi linalingi’m’otenda nai? Nongila nde, Bafango, ombikya ena heure ene? Ohonde ncina eneki’m’oyaka ena heure ene nd’ene.

²⁸Bafango, kumya lina lineamene. Nkwaho lofoso loya ena loola, ate, Mokumya liho, ko nongokumya liho lakina.

²⁹Bato’aho bik’ike banemalaki ko banokaki, baila, iy’ate, Likungola nde liho; bamoi, Mbo ekima ena loola atendaki l’ende.

³⁰Yesu aotenda, ate, Lofoso lone lotaya lacin’enami: loyaka lacin’enino.

³¹Isanga etendelo en’akambo ban’ato bana loko lone emoyela; isanga lifoka lina loko lone angofodyama.

³²Koko emi, yombo liledyama ena liko lina loko, nongosuma bato bahatu eneyal’emi.

³³Aotenda yoi line lacina aatume bokotua bon’ewedi benengi’nd’owa.

³⁴Bato’aho bik’ike bamokutwela, iy’ate, Tomoka en’asangya Masiya angoyala nko njalama; iya, enil’e oka Bon’on’oto angiledyama, ncina eka nai? Bon’oho bon’oto ayali nai?

³⁵Koko Yesu amasumola, ate, Fololo eyali l’ino nk’ilalela kei: boongya likenda kuma fololo eyali l’ino, lacina liucu litokokwel’ino; lacina ende onoyakende ena liucu afanonganya mboka enaco’ende.

³⁶Bimedyaka Fololo, kuma boyali l’eho, lacin’eho boyalame ban’ana fololo. Yesu aotenda baoyi’ane, ko aocoa oyafisamela.

³⁷Koko iyo, kanga ende akambaki bikambwa bine bike bina mpefa nk’en’aiso’aniyo, batiimedya tu;

³⁸nko lacin’eho yoi linaliki Yesaya bosumoli otendak’ale yilame, ate, Nkolo, onimedyaki hosimo’oniso oka nai? Ko lo lona Yawe lomenya eneyali nai?

³⁹La ncina ene, iyo batinya yimedya, lacin’oka Yesaya atendaki lakina, ate,

⁴⁰Amokomba baiso’aniyo, ko amocilingitanya betem’eniyo; Batongoyena l’aiso’aniyo, ko batongononganya l’etem’eniyo, Batongohelengwa, Ko ntongoyaikya.

⁴¹Yesaya atendaki baoyi’ane lacin’eneki’nd’oenaka bokoka bonande; ko atendaki lacin’enande.

⁴²Koko bike bona bafoka nkoho bamimedya; ohonde bateyanya imeedyo iniyo ena fololo lacin’ena Bafalusi, batongofodyama ena sunagoga;

⁴³lacin’oka baoka lokumo lon’ato mposa eneleki mposa enek’iy’ookaka lokumo lona Yakomba.

⁴⁴Yesu aololua, ate, Ononjimedy’emi, afanjimedy’emi: aimedy’ende onontomaki.

⁴⁵Ko ononjen’emi, aen’ende onontomaki.

⁴⁶Emi moya yoka fololo ena loko, lacina boto l’oto ononjimedya afayalamaki lakina ena liucu.

⁴⁷Yomb’oto’on’etaketaka aoka baoyi’anami, ko afamony’aho, emi mpatendel’ende likambo, lacin’emi ntaya oyotendel’ato bana loko bakambo: njaki oyaikya.

⁴⁸Ende onontembol’emi, ko afatambe baoyi’anami, ayali l’omoi onomotendela bakambo: yoi linaliki’m’otendaka, liho lingokoiy’ende likambo en’ina bona nsimbo;

⁴⁹lacin’oka ntatenda yoi linamamene: Bafango onontomaki, ende ampaki bosimo bonongi’m’osumol’ato, ko la yoi linalingi’m’otenda.

⁵⁰Ko emi ley’oka lotomo lonande loyali nko liiko lonelofakale; lacin’eho, baoyi’aho banatend’emi, latenda nk’eyok’o noki Bafango ontomaka lacina ntende.