Read ngando Yoane 13 Bible Online

Yoane 13 - ngando bible

Yoane 13

¹En’oso bon’elambedya, Yesu aeyaki’oka esike enande emoyela lacina aume ena loko lone ko acu eneyali Bafango. Ende aokaki banandamene banayaaki ena loko nganji, ko amaoka nganji yengoko nsimbo.

²Koko en’elelo ena toma tona likolo, eneki Satana oilaka lokanyi en’otema bona Yudasa, bise Keliota, bon’ona Simona, lacina aangele Yesu;

³ko eneki Yesu oeyak’oka Bafango amomofa bikambwa bihitu en’akas’anande, ko aeyoka ayaki eneyali Yakomba, ko lakina angocoa nk’eneyali Yakomba;

⁴aemala en’elelo ena toma, ko aambya bisenda binande, aotamba itambala, ko aokakel’iho en’okeke’onande.

⁵Nkwaho aangol’asi ena salani, ko aomatsa lisonga bakaka ban’akili, ko aolifol’aho l’itambala iniki’nd’okakelaka en’okeke’onande.

⁶Koko aoya eneyali Simona Petelo. Ende amosumola, ate, Nkolo, E osonga nde bakak’anami?

⁷Yesu amokutwela, ate, Yoi linakamb’emi ofanonganya isanga: ongononganya nde ena mbusa.

⁸Petelo amosumola, ate, Ofasongaki bakak’anami tu. Yesu amokutwela, ate, Yomb’emi mpakosonge, ofana liondo l’emi tu.

⁹Simona Petelo amosumola, ate, Nkolo, ef’akak’anami kei: song’akas’anami ko l’ote nkoho.

¹⁰Yesu amosumola, ate, Boto onokaki basi, akolana lacina asonga bakaka kei, ko amboyala soto mene; ko ino boyali soto, ohonde ef’inatu.

¹¹Lacin’oka aeyaki boto’oho onocoa oyangela; la ncina eho ate, Ino boyali soto, koko ef’inatu.

¹²Koko eneki’nd’osongaka bakak’aniyo, aotamba bisenda binande, aokisase lakina ena toma, ko amalokwela, ate, Ino bomononganya nde ekambwa eneki’m’okokambelak’ino?

¹³Ino bontang’emi Bolaki la Nkolo: yok’oho botenda nk’olotsi, lacin’emi nde nde nkoho.

¹⁴Koko yomb’emi, Nkolo la Bolaki, nsongaki bakak’anino, akoli eneyal’ino bosongelana bakaka nk’o samb’oho.

¹⁵Lacin’oka mokof’ino ndembi, lacina ino bile yoka bosamb’onoki’m’okilelak’ino.

¹⁶Solosolo, solosolo, lakosumol’ino, boombo afaleki nyangetuke enande, ko ekima afaleki ende onotomaki.

¹⁷Yomb’ino bomeya baoyi’ane, ko bokamba baho, ino boyali l’ekiko.

¹⁸Mpatende lacin’en’inatu: leya banaki’m’osonaka; nde, lacina Bitengelo bina Yakomba biilame, eneki yoi otengamaka, ate, Ende onola mampa l’emi amompomela ncinji ena likaka linande.

¹⁹Lakosumol’ino yoi line isanga, kuma liho litilame, lacin’eho enengi liho oilama ino bimedy’oka emi nde nde nk’ende.

²⁰Solosolo, solosolo, lakosumol’ino, onongotamb’ende onongi’m’otoma, antamb’emi; ko onontamb’emi, atamb’ende onontomaki.

²¹Eneki Yesu otendaka yok’osamb’oho, aoka bolito bike mene en’olimo, ko aotenda yoi, ate, Solosolo, solosolo, lakosumol’ino, omoi’onino angonjangela.

²²Bakili baolendana ta, ko baokandakanda lacin’ena boto’oho onom’end’oilak’oka angangela.

²³Omoi’ona bakili onoki Yesu ookaka nganji ayaaki ena mesa ena toma, nko njekama ena ntolo ena Yesu.

²⁴Simona Petelo ailel’ende ndembi la likasa, aufole Yesu boto onom’end’otangaka.

²⁵Koko bokili’oho onekama ena ntolo ena Yesu, amufola, ate, Nkolo, boto’oho nai?

²⁶Yesu aokutola, ate, Nk’ende onongi’m’otutela etate, njofe. Ko aotamba etate, aotut’eho, ko aofa Yudasa, bon’ona Simona, bise Keliota.

²⁷Ena mbusa en’etutelo, Satana aotua eneyali Yudasa. Nkwaho Yesu amosumola, ate, Yoi linakamb’e, Ila liho nk’isanga.

²⁸Koko efan’oniyo banakisak’ase ena mesa ena toma oneyaki ncina eneki’nd’otendaka l’ende yok’osamb’oho;

²⁹koko lacina eneki Yudasa otolaka ntombe, bamoi baokanel’oka Yesu amolosumola, ate, Coaka oyotosombele toma tona elambedya; yombo lacina afe bato biinda iyema imoi.

³⁰Koko ende, eneki’nd’otambaka etate eneki Yesu otutaka, aofola isasanga. Eyaaki nko boco.

³¹Eneki’nd’ofolaka, Yesu aila, ate, Isanga Bon’on’oto aokumyama, ko Yakomba aokumyama lacin’enande;

³²koko yombo Yakomba aokumyama laci n’enande, Yakomba angokumya eneyal’endamene, ko angookumya isasanga.

³³Ban’anami ban’asali, nongoyala l’ino nk’ilalela; ino bongompona, ko yok’onoki’m’osumolaka Ba-Yuda, emite, Enaco’emi, ino bofayelisa meho; isanga lakosumol’ino nk’osamb’oho.

³⁴Lakof’ino lisangya lina litoto, lacina bokana nganji; yok’onoki’m’okookak’ino nganji, ino bokana nganji nk’osamb’oho.

³⁵Yok’osamb’oho bato bahatu bangey’oka ino boyali bakili’anami, yombo bokana nganji.

³⁶Simona Petelo amosumola, ate, Nkolo, ocoa meya? Yesu amokutwela, ate, Bili bonaco’emi, ofankilisa meho isanga; ohonde ongonkila en’esike ena mbusa.

³⁷Petelo amosumola, ate, Nkolo, ncina enefakokilis’emi isanga eka nai? Nongambya liiko lonami lacin’ene.

³⁸Yesu amokutwela, ate, Ongambya liiko lone lacin’enami fo! Solosolo, solosolo, lakosumol’e, kuma nkoko ena mpame eteke, ongonjangan’emi beangana besaso.