Read ngando Yoane 14 Bible Online

Yoane 14 - ngando bible

Yoane 14

¹Botalangake betem’enino bekeswa la lokeseli. Bimedya Yakomba; bonjimedy’emi nkoho.

²En’otumba bon’afango’onami batonga bayali bike. Yombo etayala yok’osamb’oho, tumbe mokosumol’ino. Locoa oyokokolanyedy’ino edye ntutuma.

³Koko yombo locoa okokolanyedya edye, nongoya lakina, ko nongokotamb’ino eneyal’emamene, lacin’eho en’edye eneyal’emi, ino boyalama nko meho.

⁴Ko bili bonaco’emi, ino beya; ko beya mboka.

⁵Toma amosumola, ate, Nkolo, enaco’e tofeya; ko tongononganya mboka yok’osamb’oya?

⁶Yesu amosumola, ate, Emi nde nde Mboka, ko la Solosolo, ko la Liiko; efan’oto onoya eneyali Bafango yengoko l’emi kei.

⁷Yomb’ino bonjeyak’emi, tumbe beyaki Bafango’onami nkoho. Bisik’ine bomey’ende, ko bomeena.

⁸Filipo amosumola, ate, Nkolo, ototume Bafango: yoi linalang’iso nko liho kei.

⁹Yesu amokutwela, ate, Moyala l’ino bolingolingo yok’one, ko otanjeye, Filipo? Ende ononjen’emi, amena Bafango; ko out’oila, ate, Ototume Bafango, bosamb’oya?

¹⁰Ofimedy’oka emi njali eneyali Ba fango, ko Bafango ayali eneyal’emi? Baoyi banakosumol’emi, mpatende baho eneyal’emamene: Bafango onoyali eneyal’emi, endamene kongokamba bikambwa.

¹¹Bonjimedyak’oka njali eneyati Bafango ko Bafango ayali eneyal’emi: yombo bofakolana l’oho, bonjimedya lacin’ena bikambwa mene.

¹²Solosolo, solosolo, lakosumol’ino, ende ononjimedy’emi angokamba bikambwa binakamb’emi, ko angokamba bikambwa bimoi binileki bine, lacina emi locoa eneyali Bafango’onami.

¹³Ko baoyi ban’etaketaka banang’in’oufola ena lina linami, nongila baho, lacin’eho Bafango akumyame eneyali Bona.

¹⁴Nko bufola yoi lin’etaketaka ena lina linami, nongila liho.

¹⁵Yombo bonjoka nganji, tumbe bongomonya beeka benami.

¹⁶Ko nongufola Bafango, ko angokof’ino Bokambi’omoi, lacin’eho ayalame l’ino nko njalama,

¹⁷nko Bolimo bona Solosolo, onofatambamisa l’ato bana loko, lacin’oka iyo bafeen’ende, ko bafeeya: ino bey’ende, lacin’ende aoyalama l’ino njalama, ko angoyala en’etem’enino.

¹⁸Mpakocikaki biciki: nongoya eneyal’ino.

¹⁹Nk’ilalela kei, ko bato bana loko bafanjenaki lakina; ohonde ino bongonjena: lacina emi njaike, ino bongika nk’osamb’oho.

²⁰En’in’oho bongey’oka emi njali eneyali Bafango, ko ino boyali eneyal’emi, ko emi eneyal’ino.

²¹Ende onoyali la beeka benami, ko amonya beho, ende kongonjok’emi nganji; ko ende ononjok’emi nganji, Bafango’onami angook’ende nganji, ko emamene nongook’ende nganji, ko nongoyotum’emamene eneyal’ende.

²²Yudasa (efa bise Keliota) amosumola, ate, Nkolo, ncina enayotum’e eamene eneyal’iso, ko ofayotume eneyali bato bana loko, eka nai?

²³Yesu amokutwela, ate, Nk’oto anjok’emi nganji, angomonya yoi linami, ko Bafango’onami angok’ende nganji, ko tongoya eneyal’ende, tongila litonga liniso eneyal’ende.

²⁴Ende onofanjok’emi nganji, afamonya baoyi’anami; koko yoi lineyok’ino lifayali linami: nko lina Bafango onontomaki nde liho.

²⁵Mokosumol’ino baoyi’ane kuma njali l’ino.

²⁶Koko Bokambi, nko Bolimo bon’olotsi, onongi Bafango otoma ena lina linami, angokolak’ino baoyi bahatu, ko angokoofody’ino baoyi bahatu banaki’m’okosumolak’ino.

²⁷Lokocikel’ino mwi, lokof’ino mwi enami; mpakof’ino la bokotua bonafeela bato bana loko. Botalangake betem’enino bekeswa la lokeseli, ko botokake bofolu en’etem’enino.

²⁸Ino bokaki eneki’m’okosumolak’ino, Locoa, ko nonguta eneyal’ino. Yombo bonjokaki nganji, tumbe bonyangelaki eneki’m’oilak’oka, Locoa eneyali Bafango, lacina Bafango andek’emi.

²⁹Mokosumol’ino en’esik’ene, kuma yoi liho litilame, lacin’eho enengi liho oilama ino bimedya.

³⁰Mpit’otenda l’ino bike, lacina lifoka lina loko lone aoya, koko afan’iyema eneyal’emi;

³¹ohonde emi njakambe yok’onoki Bafango ontomaka, lacin’eho bato bana loko bey’oka emi loka Bafango nganji. Bemala, tocu.