Read ngando Yoane 15 Bible Online

Yoane 15 - ngando bible

Yoane 15

¹Emi nde nde bokoli bona vina bona solosolo, ko Bafango’onami ayali Mene lisala lina bekoli.

²Etange l’etange eneyali eneyal’emi enefote bemamo, aumol’eho; ko akula etange l’etange enot’emamo, lacina eote bemamo la mpula.

³Isanga bomokulwa lacin’ena yoi linaliki’m’okosumolak’ino.

⁴Bomboyala eneyal’emi, ko emi eneyal’ino; yoka bosambo bonofotisa etange bemamo, ehoamene kei, yengoko eho eoyaela en’okoli bona vina: nk’osamb’oho l’ino, yengoko ino boyaela eneyal’emi.

⁵Emi nko bokoli bona vina, ino nko bitange; ende onoyali eneyal’emi nko njalama, ko emi eneyal’ende, ende aota bemamo bike; lacin’oka yombo boalana l’emi bofakambisa ekambwa emoko.

⁶Yomb’oto afayale eneyal’emi njalama, ende aokama yok’etange, ko aonyelala, ko baosusanya biho, ko baofusa biho ena nkoi, ko biolika.

⁷Yomb’ino boyaela eneyal’emi, ko baoyi’anami baoyaela en’etem’enino, bongufola yoi lin’etaketaka linalang’ino, ko liho lingilama eneyal’ino.

⁸Yomb’ino boot’emamo bike, Bafango’onami angokumyama la yoi liho, ko ino bongoyala bakili’anami.

⁹Nk’eyok’onoki Bafango’onami onjokak’emi nganji, emi nkookak’ino nganji nk’osamb’oho: ino bomboyala ena nganji enami.

¹⁰Yombo bomonya beeka benami, bongoyala ena nganji enami, yok’onoki’m’omonyaka beeka ben’afango’onami, ko njomboyala ena nganji enande.

¹¹Mokosumol’ino baoyi’ane lacin’eho ekiko enami eyalame eneyal’ino njalama, ko lacina ekiko enino efule nko mpula.

¹²Boeka bonami nd’one: bokana nganji, yok’onoki’m’okookak’ino nganji.

¹³Efan’oto onoyali la nganji eneleki ene, nko boto aambya liiko lonande lacin’ena bifili binande.

¹⁴Yomb’ino bila beeka benami, ino boyali bifili binami.

¹⁵Mpakeelel’ino lakina baombo, lacina boombo afeya baoyi banakamba nyangetuke enande; mokeelel’ino bifili, lacin’oka nkosumolak’ino baoyi bahatu banaki’m’ookaka eneyali Bafango’onami.

¹⁶Ino botanson’emi: emi kongosonak’ino, ko nkotomaki lacina bocu, boyote bemamo, ko bemamo’enino beyalame nko njalama; lacin’eho yoi lin’etaketaka lin’ufol’ino Bafango ena lina linami, akofe.

¹⁷Lakof’ino beeka bene: bokana nganji.

¹⁸Nk’en’oka bato bana loko bakook’ino bowe, bey’oka banjokak’emi bowe en’oso.

¹⁹Yomb’ino bomoyala bana-loko, tumbe bato bana loko bamoka baniyoamene nganji; ohonde enefayal’ino bana-loko, eneki’m’okosonolak’ino ena loko, nko lacin’eho, baise loko bakook’ino bowe.

²⁰Bokanedyaka yoi linaliki’m’okosumolak’ino: Boombo afaleki nyangetuke enande. Yombo bamonyom’emi, bangokonyom’ino nkoho; koko yombo bamomonya yoi linami, bangomonya linino nkoho.

²¹Koko bangokiilel’ino baoyi’ane bahatu lacin’ena lina linami, nko lacina enefey’iyo ende onontomaki.

²²Yomb’emi ntaya ko ntatenda l’iyo, tumbe bataat’owe; ohonde isanga bafana nsako ena bowe’oniyo.

²³Ende ononjok’emi bowe, aoka Bafango’onami bowe nkoho.

²⁴Yombo ntakamba ena ntoto eniyo bikambwa binitakamba boto’okina tu, tumbe iyo bataat’owe; ohonde isanga bamonjen’emi ko l’afango’onami, ko bamotok’is’afe bowe.

²⁵Koko yoi line limilama lacin’eho yoi linalitengamaki’ale en’asangy’aniyo yilame, ate, Banjokaki bowe efana ncina.

²⁶Koko enengi Bokambi oya, onongi’m’okotomel’ino eneyal Bafango, nko Bolimo bona solosolo onofola eneyali Bafango, ende angoyala temoin enami;

²⁷koko ino bongoyala temoins inami nkoho, lacin’oka boyaaki l’emi nk’ena limatsako.