Read ngando Yoane 16 Bible Online

Yoane 16 - ngando bible

Yoane 16

¹Mokosumol’ino baoyi’ane lacina bofapusumwa.

²Bangokofody’ino en’etonga bena basunagoga; O, esike engoyela eneng’ende onokoyak’ino okanel’oka akambela Yakomba ekambwa.

³Bangokamba baoyi’ane lacin’oka bateya le Bafango l’emi.

⁴Koko mokosumol’ino baoyi’ane lacin’eho, nk’en’oka esike ena baho eoyela, boofw’oka nkosumolaki. Ntakosumola baho ena limatsako mene, lacin’oka njaaki nko l’ino.

⁵Koko isanga locoa eneyal’ende onontomaki; koko efan’onino ononjufola, ate, Ocoa meya?

⁶Ohonde lokeseli lolola en’etem’enino lacin’eneki’m’okosumol’ino baoyi’ane.

⁷Koko yoi line linakosumol’emi liyali nko solosolo: eleki bolotsi eneyal’ino lacina ncu, lacin’oka, yomb’emi mpacu, Bokambi afayaki eneyal’ino; koko yombo locoa, nongotom’ende eneyal’ino.

⁸Koko enengi’nd’oya, angakola bato bana loko ena likambo lina bowe, ko la mbongi, ko l’etendelo en’akambo:

⁹ena likambo lina bowe, lacin’oka bafanjimedya;

¹⁰ena likambo lina mbongi, lacin’oka locoa eneyali Bafango’onami, ko bofanjene lakina;

¹¹ko l’ena likambo lin’etendelo en’akambo, lacin’oka lifoka lina loko lone amokoiyama likambo.

¹²Njali l’aoyi’akina bike oyokosumol’ino, koko bofinya yokisa baho isanga.

¹³Koko enengi’nd’oya, nko Bolimo bona solosolo, ende angokolond’ino ena solosolo ehatu; lacina ende afatendaki l’eango enandamene: angotenda nko baoyi’aho banok’ende, ko angokosumol’ino baoyi banangoya.

¹⁴Angonkumy’emi, lacin’oka angotamba eneyal’emi, ko angokosumol’ino.

¹⁵Baoyi bahatu banata Bafango bayali nko banami; nko la ncina eho lokosumolaka, emite, Angotamba eneyali baoyi’anami, ko angokosumol’ino.

¹⁶Efan’olingolingo bofanjenaki; ko lakina efan’olingolingo ko bongonjena; lacina locoa eneyali Bafango.

¹⁷Lacin’eho, bakili’anande bamoi baotendana, Mbo ncina ena yoi line linatosumol’ende eka nai? ate, Efan’olingolingo bofanjenaki, ko lakina efan’oli ngolingo ko bongonjena; ko, Lacin’oka locoa eneyali Bafango.

¹⁸Baila, Mbo yoi line linatend’ende, noka, Efan’olingolingo, lind’oya? Tofanonganya yoi linatend’ende.

¹⁹Yesu aofokol’oka basokolanga oyufol’ende; ko aila, ate, Ino bufolana nde ncina ena yoi linaliki’m’otendak’oka, Efan’olingolingo bofanjenaki, ko lakina efan’olingolingo ko bongonjena?

²⁰Solosolo, solosolo, lakosumol’ino, bongolela la mposoli, ko bongosaa, ohonde bana loko bangonyangela; ino bongoka lokeseli, koko lokeseli lonino longohalingwa ekiko.

²¹Nk’en’oka boyoto ayatate la lonwa, ayali la lokeseli lacin’oka esike enande emoyela; koko enakady’ende yota bona afut’okanedya bino biniki’nd’oenaka: aokanedya nk’ekiko lacin’oka boto amolotwa ena loko.

²²Koko ino, isanga boyali la lokeseli; koko nongokeen’ino lakina, ko betem’enino bengonyangela, ko efaataki boto onongokokumol’ino enyanga enino.

²³Koko en’in’oho bofanjufolaki bufo bomoko tu. Solosolo, solosolo, lakosumol’ino, baoyi l’aoyi banang’in’oufola Bafango ena lina linami, angokof’ino baho.

²⁴Ino botufole iyema ena lina linami: bufolaka, ko bongotamba, lacina ekiko enino efule.

²⁵Mokosumol’ino baoyi’ane la bikolanya; esike engoya enefatendaki emi l’ino lakina ena bikolanya: nongokosumol’ino yoi lina Bafango nko fololo.

²⁶En’in’oho bongufola ena lina linami, ko mpil’oka nongokufwel’ino Bafango,

²⁷lacin’oka Bafango mene akook’ino nganji, lacin’oka bomonjok’emi nganji, ko bomimedy’oka mpolaki eneyali Bafango.

²⁸Mpolaki eneyali Bafango, ko njaki ena loko; koko lakina locika loko, ko locoa eneyali Bafango.

²⁹Bakili’anande bamosumola, iy’ate, Lenda, isanga otenda nko fololo mene: ofatende l’ekolanya tu;

³⁰isanga tomey’oka e oeya baoyi bahatu, ko ofalele lacina boto akufola. La yoi line timedy’oka oyaki eneyali Yakomba.

³¹Yesu amakutwela, ate, Bimedya nde isanga? Lenda, esike engoya,

³²o, emoyela nk’isanga, eneng’in’ofafanda, boto l’oto enek’enandamene, ko bongoncika nk’emi kei; ohonde mpayale emi kei: Bafango ayali nko l’emi

³³Mokosumol’ino baoyi’ane lacin’eho boate mwi eneyal’emi. Ena loko boyali la njena bino; koko bonyangelaka: emi mosila yikamela loko.