Read ngando Yoane 17 Bible Online

Yoane 17 - ngando bible

Yoane 17

¹Eneki Yesu otendaka baoyi’aho, aenol’aiso’anande ena loola, ko aila, ate, Bafango, esike emoyela; kumya Bon’one lacin’eho Bon’one akokumy’e;

²yok’onoki e ofak’ende lifoka eneyali bato bahatu, lacina af’iyatu banak’ofak’ende liiko lonelofakale.

³Liiko lonelofakale loho lone: nko lacin’eho bakey’e onde Yakomba mene ena solosolo, ko baey’ende onok’otomaka, nko Yesu Masiya.

⁴Emi mokokumy’e ena loko, eneki’m’okadyaka ekambwa eho enek’ompaka lacina nkambe.

⁵Ko isanga, Bafango, onkumy’emi l’eamene nko la lokumo loneloki’m’oataka eneyat’e kuma loko lotanunolama.

⁶Meyanya lina line eneyali bato’a’no banak’ompaka ena loko. Bayaaki nko baneamene, ko ompak’iyo, ko bamomonya yoi line.

⁷Isanga bamey’oka baoyi bahatu banak’ompaka bayaki nk’eneyat’e;

⁸lacin’emi molafa baoyi banak’ompak’emi; ko bamotamba baho; ko bamonongany’oka emi njaki eneyal’e, ko bamimedy’oka e ontomaki.

⁹Lomaondel’iyo; mpaondele baise loko, laondela bane banak’ompaka, lacin’iyo bayali nko bane;

¹⁰banami bahatu bayali nko bane, ko bane bayali banami, ko lakumyama eneyal’iyo.

¹¹Emi mpayale takina ena loko; koko bane bayali ena loko, ko emi loya eneyal’e. Bafango on’oeka, oamony’iyo banak’ompaka ena lina line, lacin’eho bayalame omoko, yoka bosamb’onoyal’iso omoko.

¹²Eneki’m’oyalaka l’iyo ena loko njamonyaki ena lina line linaliki ompaka; njatombanyaki, ko efan’omoko’oniyo onehaki, umola nko bon’ona eehedyo, lacina Bitengelo bina Yakomba biilame.

¹³Koko isanga loya eneyal’e, ko latenda baoyi’ane kuma njali ena loko, lacin’eho ekiko enami efudyame en’etem’eniyo.

¹⁴Molafa yoi lineamene, ko bato bana loko bamomaoka bowe, lacin’oka iyo bafayali bana loko, yoka bosambo bonofayal’emi ona loko.

¹⁵Mpil’oka oaumole ena loko: lakoonda oatombanya eneyali boto’oho On’owe.

¹⁶Iyo bafayali bana loko, yoka bosambo bonofal’emi ona loko.

¹⁷Oaeky’iyo en’oeka la solosolo ene: yoi line liyali nko solosolo eho.

¹⁸Yok’onok’ontomak’emi ena loko, nk’osamb’oho nja tomak’iyo ena loko.

¹⁹Ko lacin’eniyo layoeky’emamene en’oeka, lacin’eho iyo baekyame en’oeka la solosolo eho.

²⁰Mpaonde lacin’eniyo kei; laonda lacin’ena bato’aho banangonjimedya linga lacin’ena yoi liniyo;

²¹lacina iyatu bayalame nk’omoko, yoka bosamb’onoyali e, Bafango, eneyal’emi, ko emi eneyali e: iyo bayalamake nk’omoko eneyal’iso; lacin’eho baise loko baimedy’oka e ontomak’emi.

²²Momafa bokonde’one bonok’ompak’emi; lacin’eho bayalame nk’omoko, yoka bosamb’onoyal’iso nk’omoko;

²³emi eneyal’iyo, ko e ene emi, lacin’iyo baongyame yok’omoko kei; lacin’eho baise loko baeye oka e kongontomak’emi, ko oaokak’iyo nganji, yoka bosamb’onok’onjokak’emi nganji.

²⁴Bafango, lalanga lacina baho banak’ompaka bayalame l’emi en’edye eneyal’emi, lacina baene bokonde bonami bonok’ompaka; lacin’oka onjokaki nganji kuma loko lotanunolama.

²⁵O Bafango ona mbongi, bato bana loko batakeya; ohonde emi nkeyaki, ko bane bamey’oka e kongontomaki.

²⁶Ko emi momaeyanya lina line, ko nongaeyanya liho; lacina nganji enek’onjokak’emi eyalame en’etem’eniyo, ko emi njale eneyal’iyo njalama.