Read ngando Yoane 18 Bible Online

Yoane 18 - ngando bible

Yoane 18

¹Eneki Yesu otendaka baoyi’ane, ende l’akili’anande baofola, baoleka isosolo ina Kedelona, ko baotua ena lisala linaliyaaki meho, ende l’akili’anande.

²Ko Yudasa onoangelaki aeyaki edye eho nkoho, lacina Yesu l’akili’anande basolonganaki meho ma-ma.

³Koko eneki Yudasa otambaka boloi bona soldats l’ona police eneyali nkanga ina toome la Bafalusi, aoya meho la bengoni ko la mwinda la bimunyi bin’ita.

⁴Kanga Yesu aeyaki baoyi bahatu banangilama eneyal’ende, aofola, ko amaufola, ate, Onafon’ino?

⁵Bamokutwela, iy’ate, Yesu ona Nazaleta. Yesu ate, Em’one. Yudasa onomoangelaka aemala l’iyo.

⁶Eneki’nd’oilak’oka, Em’one, iyo baoyosuma, ko baokwa ena loko.

⁷Koko amaufola lakina, ate, Onafon’ino? Iy’ate, Yesu ona Nazaleta.

⁸Yesu aamba, ate, Lokosumolak’ino, Em’one; nko bompon’emi, bocika bane bacu mboka iniyo;

⁹lacin’eho yoi linaliki’nd’oilaka, ate, Eneyal’iyo banak’ompaka ntungy’omoko, yilame.

¹⁰Simona Petelo, onoyaaki la lokula lon’ita, aosomola loho, ko aoka boombo bona nkanga iyome, ko aokesa litoi linande y’ome pa. Lina lina boombo’oho nko Maluko.

¹¹Yesu aosumola Petelo, ate, Utodya lokula lone ena ntoto: ekala eneki Bafango’onami ompaka, mpamele nde eho?

¹²Nkwaho boloi bona soldats, la capitaine, la police ina Ba-Yuda baunda Yesu, ko bamokakela,

¹³ko bamotola eneyali Anasa en’oso, nko bokilo’ona Kayafa, nkanga iyome ena mbula eho.

¹⁴Kayafa ayaaki nk’ende onosumolaki Ba-Yuda, ate, Ekoli lacina boto’omoko awu lacin’ena bato bahatu.

¹⁵Koko Simona Petelo l’okili’omoi baokila Yesu; bokili’oho aeyanaki la nkanga iyome, ko ende aotua la Yesu en’otumba bona nkanga iyome.

¹⁶Koko Petelo aemala en’anza, nk’en’ofolo. Nkwaho bokili’oho oneyanaki la nkanga iyome aofola, ko aotenda l’oyoto onosendedyaki bofolo, ko aotoya Petelo.

¹⁷Nkwaho boyoto onosendedyaki bofolo aufola Petelo, ate, Ofayali nde omoi’ona bakili ban’oto’one? Ate, Ef’emi.

¹⁸Basali la police baofetsa nkoi ina baala lacin’ena lifia, ko baemala meho, kuma bayakale nkoi; ko Petelo aemala l’iyo, ko aokala nkoi.

¹⁹Koko nkanga iyome aufola Yesu biufo ena likambo lina bakili’anande la lilako linande.

²⁰Yesu amokutwela, ate, Ntendaki baoyi en’enyanga nk’ena fololo; ndakaki bato ena sunagoga bina l’ina, ko l’en’otumba bona Yakomba bonasusaneela Ba-Yuda; ko ntatenda yoi limoko yok’ofisafisa:

²¹onjufol’emi lacina nai? Ofufola nd’iyo banokaki baoyi banaki’m’oasumolaka? Lenda, bane baeya baoyi banaki’m’otendaka.

²²Eneki’nd’otendaka baoyi’ane, omoi ona police onemalaki meho aofoma Yesu losoola, ate, Oamba nde nkanga iyome yok’oho?

²³Yesu amokutwela, ate, Yombo emi lotendaka bowe, onsumolebowe’oho; koko yomb’olotsi, ompoma la nai?

²⁴Nkwaho Anasa amotoma eneyali Kayafa, nkanga iyome, nko ntungama.

²⁵Simona Petelo aemala nkwaho, ayakale nkoi. Koko bamoufola, Mbo e oyali nde omoi ona bakili’anande? Aangana, ate, Ef’emi.

²⁶Bosali’omoi bona nkanga iyome, onotwaki l’ende onoki Petelo okesaka litoi, aila, ate, Ntakeena nd’e ena lisala l’ende?

²⁷Petelo aut’oangana; ko isasanga nkoko ena mpame eeka.

²⁸L’okulu baumola Yesu eneyali Kayafa, ko bamotola en’otumba bona pretoire; iyoamene batatua en’otumba bona pretoire, batongofomwa nsefo, lacina baolang’oka bale elambedya en’Etelo.

²⁹Lacin’eho, Pilato aofola eneyal’iyo, ate, Likambo lineyakol’ino boto’one lika nai?

³⁰Iyo bamokutwela, iy’ate, Yombo atayala boto onil’owe, tumbe totolekya eneyai’e.

³¹Nkwaho Pilato amasumola, ate, Inoamene botambe, boyotende likambo linande yoka bosamb’onoyali basangy’anino. Koko Ba-Yuda bamosumola, Mbo iso tofan’etelo lacina toyake boto;

³²nko lacina yoi linaliki Yesu otendaka, linaliki’nd’otumak’ato bokotua bon’ewedi benengi’nd’owa, yilame.

³³Nkwaho Pilato aotua lakina en’otumba bona pretoire, aelela Yesu, ko amufola, ate, E oyali Lifoka lina Ba-Yuda?

³⁴Yesu amokutwela, ate, Otenda yoi line la lokanyi loneamene, yombo bato’amoi bakosumolaki liho lacin’enami?

³⁵Pilato aamba, Mbo emi nde nde bise Yuda? Bato ban’onyang’oneamene la nkanga ina toome baokolekyaka eneyal’emi. Omokamba yoi lika nai?

³⁶Yesu amokutwela, ate, Lifoka linami lifayali lina loko lone: yombo lifoka linami liyaaki lina loko lone, tumbe basali’anami bamolokan’ita, ntongolekyama eneyali Ba-Yuda; ohonde lifoka linami lifayali yok’osamb’oho.

³⁷Lacin’eho, Pilato amufola, ate, Oyali nde lifoka lina roi? Yesu aamba, ate, Nk’oho bonatend’e; mbotwaki nko la ncin’ene, ko moya ena loko nko la ncin’ene, nko lacina njalame temom ena solosolo eho. Boto l’oto onoyali ona solosolo aolofamela lofoso lonami.

³⁸Pilato ate, Solosolo end’oya? Koko eneki’nd’otendaka yoi line, aofola lakina eneyali Ba-Yuda; ko amasumola, ate, Mpene ncina ena likambo eneyal’ende tu.

³⁹Koko ino boata bokotu’onino lacina nkotungwel’ino boto’omoko en’esike en’e lambedya: bolanga nde nkotungwel’ino lifoka lina roi lina Ba-Yuda?

⁴⁰Nkwaho baololomwa nk’iyatu, iy’ate, Ef’oto’one: otofe Balaba. Ko Balaba ayaaki boto’ona liya.