Read ngando Yoane 20 Bible Online

Yoane 20 - ngando bible

Yoane 20

¹En’ina bon’oso bon’eyeng’emoi, nk’en’akel’ina, kuma bina botakya, Malia Mangandala aoya ena nketa, ko aena lufe limuma ena nketa.

²Aoya nko la laango eneyali Simona Petelo ko l’eneyali bokili’omoi, nk’oho onoki Yesu ookaka nganji, ko amasumola, ate, Bamumola Nkolo ena nketa, ko tofeya edye enek’iy’oambyak’ende.

³Nkwaho Petelo l’okili’oho baofola, ko baocoa ena nketa;

⁴iy’afe baocoa nko la laango, ko bokili’oho aleki Petelo la laango, ko aoyel’oso ena nketa;

⁵ko eneki’nd’osunamaka olenda ena ntundulu, aena bisenda bina mbenza biambi, koko atatua.

⁶Koko Simona Petelo aoya ena mbusa enande, ko aotua ena nketa, ko aena bisenda bina mbenza biambi,

⁷ko l’itambala iniyaaki en’ote’onande itayala la bisenda bina mbenza: aen’oka iho imofutama ko iambi en’esang’emoi nk’iho kei.

⁸Nkwaho bokili’omoi onoyelak’oso ena nketa aotua, ko aena, ko aimedya nko njimedya.

⁹Lacin’oka iyo en’esik’eho batey’etengelo ena Yakomba enilaki’oka akoli lacina aetwa lakina en’ewedi.

¹⁰Nkwaho bakili bautwa en’el’eniyo.

¹¹Koko Malia aemala ena mbiolo ena nketa, ayalele; ko enalel’ende, aosunama ko aolenda ena nketa,

¹²ko aena bikima bina loola bife, baolota bisenda bina telele, ko baokisase en’esanga eneki boduo bona Yesu oyalaka, omoi en’okuta bonoki bote oyalaka, ko okina en’okuta bonoki’akaka.

¹³Ko bamufola, iy’ate, Boyoto, olela lacina nai? Amasumola, ate, Lacin’iyo bamumola Nkolo enami, ko mpeya esanga enek’iy’oambyak’ende.

¹⁴Eneki’nd’otendaka baoyi’aho, aohelengwa, ko aena Yesu aemali, koko ateey’oka ande Yesu.

¹⁵Yesu amufola, ate, Boyoto, olela lacina nai? Onafon’e? Malia aokanel’oka ande botombanyi bona lisala, ko amosumola, ate, Bafa, nk’otolak’ende, onsumole esanga enek’omonyaka, njoumole.

¹⁶Yesu amosumola, ate, Malia! Ende aohelengwa, amosumola ena lofoso lona Ba-Ebele, ate, Laboni! (nko Bolaki).

¹⁷Yesu amosumola, ate, Tansukake; lacin’oka ntilele eneyali Bafango’onami; koko coaka eneyali bakune’anami ko oasumole, Emi lilela eneyali Bafango’onami, l’afango’onino, ko eneyali Yakomb’enami la Yakomb’enino.

¹⁸Malia Mangandala aoya eneyali bakili, ko amasumola, ate, Mmena Nkolo, ko amasumola baoyi banaki Yesu osumolaka.

¹⁹La likolo lina bin’oho, nko bina bon’oso bon’eyenga, kuma nkombo ikombi en’otumba bonoki bakili osolonganaka, lacin’oka baanga Ba-Yuda, Yesu aoya, ko aemala ena ntoto eniyo, ko amaesa, ate, Mwi eneyal’ino.

²⁰Ko eneki’nd’oilaka yoi liho, amatuma bakas’anande la mbanji inande; koko eneki bakili oenaka Nkolo, baonyangela.

²¹Yesu amasumol’iyo lakina, ate, Mwi eneyal’ino; yok’onoki Bafango’onami ontomak’emi, emi lokotom’ino nkoho.

²²Ko eneki’nd’otendaka yok’osamb’one, amafifedya lofofe, ate, Botamba Bolimo bon’olotsi;

²³yomb’ino botungol’ato’amoi en’aoyi’owe, bangotungwa ena baho; ko yomb’ino bocika bato’amoi l’aoyi’owe’aniyo, bangocikala nko l’aho.

²⁴Koko Toma, omoi ona ba-jo l’afe, onotangama Yasa, atayala l’iyo eneki Yesu oyaka.

²⁵Ko bakili bamosumola, iy’ate, Tomena Nkolo; koko ende amasumoia, ate, Yombo mpene bekondo bena mpota ina nsete en’akas’anande, ko mpile ikola inami en’ekondo bena mpota ina nsete, ko mpile likasa linami ena mbanji inande, mpimedyaki tu.

²⁶Koko ena mbusa ena bina mwambi, bakili bayaaki ena ntundulu lakina, ko Toma ayaaki l’iyo. Eneki nkombo okombamaka, Yesu aoya ko aemala ena ntoto eniyo, ko amaesa, ate, Mwi eneyal’ino.

²⁷Nkwaho aosumola Toma, ate, Nanola ikola ine mendo, ko lenda bakas’anami; ko nanola likasa line, ko ekela liho ena mbanji inami; taatake ntango, imedya nko njimedya.

²⁸Toma amokutwela ate, Nkolo enami la Yakomba enami!

²⁹Yesu amosumola, ate, Toma, omonjimedya nko lacin’enek’onjenaka; banakik’ekiko nk’iyo banatanjena koko baimedya.

³⁰Yesu aokamba bike bona ndembi en’aiso ban’akili’anande, koko iho itatengama en’okand’one.

³¹Koko bikambwa bine binitengi en’okanda bimotengama lacin’eho ino bimedy’oka Yesu ayali Masiya, Bon’ona Yakomba, ko lacina enimedy’ino boate liiko ena lina linande.