Read ngando Yoane 21 Bible Online

Yoane 21 - ngando bible

Yoane 21

¹Ena mbusa en’aoyi’ane, Yesu ayotumaki endamene eneyali bakili’anande ena yembo lina Tibelia; ayotumaki endamene yok’osamb’one:

²Simona Petelo la Toma, onotangama Yasa, la Natanaele, bise Kana en’onyanga bona Ngalilaya, la ban’ana Zebedayo, la bakili’amoi bafe baosusana.

³Simona Petelo amasumola, ate, Locoa okemba nse. Koko iy’ate, Iso nkoho tocoa l’e. Baocoa nkwaho, ko baotalama en’atu, koko l’oco’oho batayaka nko le nse.

⁴Koko eneki bina okyaka, Yesu aemala en’oseleka bona lose, koko bakili batey’oka ayali nko Yesu.

⁵Ko Yesu amaufola, ate, Bana, boata nde iyema ina ndaka?

⁶Baamba, iy’ate, Efana. Ko amasumola, ate, Bofusa lisangi en’ili bona likasa y’ome bon’atu, ko bongosungya nse. Nkwaho baofusa lisangi, ko batakolana lisumisa liho lacin’ena bik’ike bona nse.

⁷Koko bokili’oho onoki Yesu ookaka nganji aosumola Petelo, ate, Nkolo nd’oho! Eneki Simona Petelo ookak’oka ande Nkolo, aolota bokoto’onande (lacin’oka atalot’isenda en’osala), ko aoyofusa en’asi bana lose.

⁸Koko bakili’amoi baoya ena iyatatu, lacin’oka batayala bosana l’okili, nk’eyoka metres yombo bokama, ko baosuma lisangi nko ndola to la nse.

⁹Enek’iy’otefwaka en’okili, baena nkoi ina baala yafeta meho, ko nse ntalama ena nkoi, ko la mampa.

¹⁰Yesu amasumola, ate, Boyaka la nse inim’in’oyakaka nk’isanga.

¹¹Simona Petelo aotefwa, ko aosuma lisangi en’okili, yolola la nse iney’okolo, nko bokama la ntuk’itano la nse isaso; ko kanga nse ioyala bik’ike yok’oho, lisangi litatsa.

¹²Yesu amasumola, ate, Boyaka, boyole toma. Efan’omoko on’akili oninya yufol’ende, ate, E nai? lacin’oka baeyaki’oka ende ande Nkolo.

¹³Koko Yesu aoya, ko aotamba mampa, ko amafa, ko la nse nk’osamb’oho.

¹⁴Bone nko beenya bon’esaso bonoki Yesu oenyaka eneyali bakili’anande eneki’nd’oetwaka en’ewedi.

¹⁵Enek’iy’okadyaka lila toma, Yesu aufola Simona Petelo, ate, Simona, bon’ona Yoane, onjok’emi nganji eneleki nganji enanjoka bane? Aamba, ate, O, Nkolo; oey’oka lakolang’e. Amosumola, ate, Leya ban’anami bana mpate toma.

¹⁶Yesu aut’oyufola bufola bon’efe, ate, Simona bon’ona Yoane, onjok’emi nganji? Amokutwela, ate, O, Nkolo, oey’oka lakolang’e. Amosumola, ate, Tombanya mpate inami.

¹⁷Amufola bufola bon’esaso, ate, Simona, bon’ona Yoane, ondanga nde? Petelo aoka lokeseli eneki’nd’oufolaka bufola bon’esaso, Ondang’emi? ko amosumola, ate, Nkolo, e oeya baoyi bahatu, oey’oka lakolang’e. Yesu amosumola, ate, Leya mpate inami toma.

¹⁸Solosolo, solosolo, lakosumol’e, enek’oyalaka bofenga, oyolitelaki eamene bokoli, ko okendaki bili bonok’eamene olangaka; koko enengotund’e engambe, ongonanola bakas’ane ko okina angolitela bokoli, ko angokotola bili bonofalang’e.

¹⁹Aotenda yoi line, nko lacina aotume bokotua bon’ewedi benengi’nd’okumya Yakomba l’eho. Eneki’nd’otendaka yoi line, amosumola, ate, Onkil’emi.

²⁰Koko Petelo aohelengwa, ko aena bokili’oho onoki Yesu ookaka nganji ayokile, nk’okili’oho onekamaki ena ntolo ena Yesu en’elelo ena toma tona likolo, ko onoufolaki, ate, Nkolo, onokoangela oka nai?

²¹Ene-ki Petelo oenak’ende, aufola Yesu, ate, Nkolo, iya boto’one?

²²Yesu amosumola, ate, Nko lalangaacikale yengoko enengi’m’oya, oho likambo line? Onkil’emi.

²³Koko etendelo ene eosekola eneyali bifili bihitu, eka, Bokili’oho afawaki; ohonde Yesu atil’oka ende afawaki: ailaki, ate, Nko lalanga acikale yengoko enengi’m’oya, oho likambo line?

²⁴One nko bokili onoyali temoin ena baoyi’ane, ko atengaki baoyi’ane, ko tomey’oka yoi linande liyali nko solosolo.

²⁵Koko baoyi’amoi bike banaki Yesu okambaka bayali; yombo baho basokotengama bahatu, lakanel’oka loko mene lohalotu lofakolana l’ekanda benesokotengama.