Read ngando Yoane 3 Bible Online

Yoane 3 - ngando bible

Yoane 3

¹Boto’omoi ona Bafalusi ayaaki la lina lika Nikodemo, engambe ena Ba-Yuda.

²Ende aoya eneyali Yesu l’oco, ko amosumola, ate, Labi, iso tey’oka e oyali bolaki onoya eneyali Yakomba; lacin’oka efan’oto’omoi onokambisa bikambwa bine binakamb’e, yengoko Yakomba ayali l’ende.

³Yesu amokutwela, ate, Solosolo, solosolo, lakosumol’e, yombo boto afotwa lakina, afinya yena lifoka lina Yakomba.

⁴Nikodemo amufola, ate, Enatunda boto botundu, akolana yotwa bosamb’oya? Ainya nde mbutwa lakina ena lototo lona nyango enande, ko aotwa?

⁵Yesu aamba, ate, Solosolo, solosolo, lakosumol’e, yomb’oto afotwa l’asi ko l’olimo, afatuisa ena lifoka lina Yakomba.

⁶Onotwa en’onufo nk’onufo, ko onotwa eneyali Bolimo nk’olimo

⁷Tafefake eneki’m’okosumolak’oka ekoli lacina ootwa lakina.

⁸Lofongo lokumba en’ili bonalanga loho, ko ooka lofoso lona loho; ohonde ofeya eneki loho oyaka, ko ofeya enacoa loho. Nk’osamb’oho la boto l’oto onotwa la Bolimo.

⁹Nikodemo amufola, ate, Baoyi’ane bailamisa bosamb’oya?

¹⁰Yesu amokutwela, ate, E, bolaki’ona Yisalaele, ko ofeye baoyi’ane?

¹¹Solosolo, solosolo, lakosumola, toyatende nko baoyi baney’iso, ko teyanya baoyi banak’is’oenaka; ko ino bofatambe yoi liniso.

¹²Yombo lakosuraola baoyi bana loko, ko bofimedya, nko lakosumol’ino baoyi bana loola bongimedya bosamb’oya?

¹³Efan’oto onilelaki ena loola, yengoko ende onokitaki ena loola, nko Bon’on’oto onoyali ena loola.

¹⁴Nk’eyok’onoki Mose oiledyaka njua ena sengelenge, nk’osamb’oho Bon’on’oto angiledyama,

¹⁵lacin’eho boto l’oto onomimedya aate liiko lonelofakale.

¹⁶Lacina Yakomba aokaki benyanga behetu nganji mene, afaki Bon’onande ona likinda ona mpame, lacin’eho boto l’oto onimedy’ende afehaki: angata nko liiko lonelofakale.

¹⁷Lacina Yakomba atatoma Bon’onande ena loko lacin’eho akoiya baise benyanga likambo: aotomaki lacina baise benyanga baike nko l’ende.

¹⁸Onimedy’ende afakoiyama likambo; ohonde onofimedya amosila likoiyama likambo, lacina enetimedy’ende ena lina lina Bon’ona Yakomba ona likinda.

¹⁹Ekwelo ena likambo eh’ene: eka fololo emoya ena loko; koko bato batalanga fololo, balangaki nko liucu, lacin’oka bikambwa biniyo biyaaki bowe.

²⁰Boto l’oto onokamb’owe akila fololo, ko afaye ena fololo, lacina bikambwa binande bitongoyenya.

²¹Ohonde onokambeela solosolo, aoyeela ena fololo, lacina bikambwa binande bieyan’oka bimokambama eneyali Yakomba.

²²Ena mbusa en’aoyi’ane Yesu l’akili’anande baoya en’onyanga bona Yudea; ko aokisase meho l’iyo, ko ain’ato en’asi.

²³Koko Yoane ayin’ato ena Ainona, mbolimboli la Salima, lacina basi bayaaki bike meho; ko bato baoya eneyal’ende, ko bainama.

²⁴Lacin’oka en’esik’eho Yoane atafusame en’onyolo.

²⁵Koko ntango eata en’atenyi’a bakili bana Yoane la boto’omoi ona Yuda ena likambo lina esongelo.

²⁶Ko baoya eneyali Yoane, ko baila, iy’ate, Labi, ende onoyaaki l’e en’ili bona Yoladane, ko onok’otendaka yoi lacin’enande, lenda ayine bato, ko bato bahatu baoya eneyal’ende.

²⁷Yoane aamba, ate, Boto afatambisa iyema, yengoko iho yofam’ende nk’ena loola.

²⁸Inoamene bey’oka, emi njilaki fololo, emite, Ei mpayali Masiya, ohonde motomama en’oso’onande.

²⁹Onata booli nko nsongi: efili ena nsongi onemali ko onomolofamela, ayali l’ekiko lacin’ena efodya ena nsongi. Enyang’e nami eh’ene, emokolana.

³⁰Akoli eneyal’ende asokwa, koko emi nsonjame.

³¹Ende onoya ena loola aleki bahatu ndeka mene; ohonde onoyali ona loko ayali nk’ona loko, ko atenda nko baoyi bana loko; ende onoya ena loola aleki bahatu nko ndeka.

³²Ayatende baoyi banaki’nd’oenaka, ko l’aoyi banaki’nd’ookaka, koko efan’oto onotamba yoi linande.

³³Ende onotamba yoi linande, amenyany’oka Yakomba ande solosolo.

³⁴Lacin’oka ende onoki Yakomba otomaka, atenda nko baoyi bana Yakomba, lacina Yakomba afofe Bolimo la nkodya.

³⁵Bafango aoka Bona nganji, ko amofa baoyi bahatu ena likasa linande.

³⁶Onimedya Bona, aata liiko lonelofakale; ohonde onofimedya Bona, afayene liiko, koko nkele ena Yakomba engoyala eneyal’ende nko njalama.