Read ngando Yoane 4 Bible Online

Yoane 4 - ngando bible

Yoane 4

¹Eneki Nkolo oeyak’oka Bafalusi bamoka bakili banata Yesu ko banin’ende en’asi baleki bakili bana Yoane bike,

²(kanga Yesu mene ataina: bakili’anande kongainaki),

³auma ena Yudea, ko autwa ena Ngalilaya.

⁴Mboka eneki’nd’ocoaka eotianya bonyanga bona Samalia;

⁵ko aoyela en’ecimo emoi ena Samalia enetangama Sukala, nko mbolimboli l’esanga eneki Yakobo ofaka bon’onande’oka Yosefa;

⁶ko etoko ena Yakobo eyaaki meho. Yesu aolemba l’okata bon’okita, ko aokisase en’etoko, yok’en’esike ena midi.

⁷Ko boyoto’omoi ona Samalia aoya oyotok’asi; koko Yesu amosumola, ate, Ompe’asi, mmele.

⁸Lacina bakili’anande bacoaki osomba toma en’onyanga.

⁹Boyoto’ona Samalia amolokwela, Mbo e, bise Yuda, ondomb’emi, bise Samalia, basi bana mmela bosamb’oya? (Lacin’oka Baise Yuda la Baise Samalia bafan’efili.)

¹⁰Yesu ainokutwela, ate, Yombo oeyaki nganji ena Yakomba, ko l’ende onokolomba, ate, Ompe’asi, mmele; tumbe omololomba ko amokofa basi bana liiko.

¹¹Boyoto aila, ate, Nkolo, ofana nko l’etokwelo, ko etoko eseki nginda: oata basi bana liiko meya?

¹²E oleki nde nkya eniso Yakobo, onotofaki etoko, ko amelaki basi ban’etoko eho, l’ende l’an’anande la nyama inande ina njolola?

¹³Yesu amokutwela, ate, Boto l’oto onomela basi’ane angut’ooka mposa lakina;

¹⁴ohonde onongomela basi banangi’m’of’ende, afokaki lakina mposa tu; koko basi banangi’m’of’ende bangoyalama ena ntundulu enande etoko ena mbololo, nko yengoko ena liiko lonelofakale.

¹⁵Boyoto amosumola, ate, Nkolo, ompe basi’ako, lacin’eho mpokaki mposa lakina, ko mpayaki lakina mendo otokol’asi.

¹⁶Yesu ate, Coak’oyelela bome’one, ko oute mendo.

¹⁷Boyoto aokutola, ate, Mpan’ome. Yesu ate, Omila nko solosolo enil’e oka Mpan’ome;

¹⁸omolata baome’atano, ko ende onoyali l’e isanga afayali bome’one: omotenda nko solosolo.

¹⁹Boyoto amosumola, ate, Nkolo, emi len’oka e onde bosumoli.

²⁰Bafango’aniso bakumyaki Yakomba ena lingonji line, ohonde ino Ba-Yuda bil’oka edye enakolana lacina bato bakumya Yakomba nko Yelusalema.

²¹Yesu amosumola, ate, Boyoto, imedya yoi linami, noka, esike engoya eneng’in’okumya Bafango, ef’ena lingonji, ko ef’ena Yelusalema;

²²ino bokumy’ende onafey’ino: iso tey’ende onakumy’iso, lacin’oka liiko loya nk’eneyali Ba-Yuda.

²³Koko esike engoya, emoyela nko l’isanga, enengi bakumi bana solosolo okumya Bafango en’olimo l’ena solosolo; lacina Bafango ayafone bakumi ban’okotu’oho.

²⁴Yakomba ayali Bolimo; ko akoli eneyal’iy’anokumya bamokumya l’olimo ko la solosolo.

²⁵Boyoto aila, ate, Emi ley’oka Masiya, onotangama Kilisito, angoya; ko enengi’nd’oya, angotosumola baoyi bahatu.

²⁶Yesu amosumola, ate, Emi onoyatende l’e njali nk’ende.

²⁷Nkwaho bakili’anande baoya; ko baofefa lacin’oka ayatende l’oyoto; ohonde efan’oniyo onomufola, ate, Nafon’e? yombo, Otenda l’ende lacina nai?

²⁸Koko boyoto aocika ekucu enande, ko autwa en’onyanga, ko aosumol’ato,

²⁹ate, Boyaka, boyene boto ononsumolaki baoyi banaki’m’okambaka bahatu: one afayali nde Masiya?

³⁰Iyo baofola ena mbiolo en’onyanga, ko baoya eneyali Yesu.

³¹Kum’oyoto ayali en’onyanga, bakili baosomya Yesu, iy’ate, Labi, laka toma.

³²Koko ende amakutwela, ate, Nde nde la toma tonatofey’ino.

³³Koko bakili baufolana, iy’ate, Noka, boto’omoi amoloyela nde toma?

³⁴Yesu amasumola, ate, Toma tonami toka njile eango enande onontomaki, ko nkadya ekambwa enande.

³⁵Ino bofile nd’oka, Nsenza iciki inei, ko esike en’enukelo engoyela? Bolenda, lakosumol’ino, benola baiso’anino, ko bolenda basala: baho bameela, ko bamokolana l’enukelo nk’isanga.

³⁶Ende ononuka atamba nko mpuci, ko asusanya bemamo nko lacin’ena liiko lonelofakale; lacin’eho ende onofusa l’ende ononuka banyangele laanda.

³⁷Yok’osamb’oho yoi line liyali nko solosolo, lika: Omoi ayafuse, ko okina ayanuke.

³⁸Emi lokotomaka lacina bonuke enetakamb’ino ekambwa: bakin’ato bakambaki, ko ino boyakitanya en’ekambwa eniyo.

³⁹Koko bato bike ban’onyang’oho bona Samalia baimedy’ende nko lacin’ena yoi linaliki boyoto oilaka, ate, Ansumolaki baoyi banaki’m’okambaka bahatu.

⁴⁰Lacin’eho, eneki baise Samalia oyaka eneyal’ende, bamoonda lacina akisase l’iyo; ko aokisase meho bekol’efe.

⁴¹Ko bato’akina bike bamimedya lacin’ena yoi linande.

⁴²Ko baosumol’oyoto, iy’ate, Isanga iso timedya, efa lacin’ena yoi line: isoamene tomoka, ko tomey’oka one ayali Boiki bon’enyanga behetu nko solosolo mene.

⁴³Eneki bekol’eh’efe osilaka, auma meho, ko aocoa Ngalilaya.

⁴⁴Lacina Yesu mene ailaki, ate bosumoli afayate lokumo en’onyang’onandamene.

⁴⁵Eneki’nd’oyelaka ena Ngalilaya, baise Ngalilaya bamosangela, lacin’oka iyo baenaki bikambwa bihitu biniki’nd’okambaka en’elambedya ena Yelusalema, laoin’iyoamene nkoho bacoaki en’elambedya.

⁴⁶Koko Yesu aoyela lakina ena Kana, ecimo emoi ena Ngalilaya, nk’eneki’nd’ohalingolaka basi vina. Koko boto’ona lifoka ayaaki meho, bon’onande ona mpame ayaaki la nkangi en’onyanga bona Kapalanauma.

⁴⁷Eneki’nd’ookak’oka Yesu amuma ena Yudea ko amoya ena Ngalilaya, aocoa eneyal’ende, ko amoonda lacina akite ko aikya bon’onande onolama l’ewedi.

⁴⁸Yesu amolokwela, ate, Yomb’ino bofene ndembi ko l’ikambwa bina mpefa bofimedyaki tu.

⁴⁹Boto’oho ona lifoka amosumola, ate, Nkolo, yak’oyokite enek’ami, bon’onami atoyowa.

⁵⁰Yesu amosumola, ate, Ombocoa; bon’one ayaike. Ko boto’oho aimedya yoi linaliki Yesu osumolaka, ko aocoa.

⁵¹Koko nk’eneyakit’ende, baombo’anande baukana l’ende, bamosumola, iy’ate, Bon’one amolika.

⁵²Ko amaufola esike ntutuma eneki’nd’omatsaka yika. Iy’ate, Loi, yok’en’esike ena midi, nkangi en’efefe emocika.

⁵³Yok’oho bafango amey’oka esik’eho nk’esike eneki Yesu osumolaka, ate, Bon’one ayaike. Koko aimedya nko njimedya, l’endamene l’iyatu banayaaki en’otumb’onande.

⁵⁴Ene nko ndembi en’ife eneki Yesu okambaka eneki’nd’oumaka ena Yudea ko aoya ena Ngalilaya.