Read ngando Yoane 5 Bible Online

Yoane 5 - ngando bible

Yoane 5

¹Ena mbusa en’aoyi’aho, elambedya ena Ba-Yuda eataki, ko Yesu aocoa ena Yelusalema.

²Yembo liyali ena Yelusalema, nk’ena mbolimboli l’ofolo bona mpate, ko yatangama ena lofoso lona Ba-Ebele Betesenda; ko bikongamelo bitano biyali meho.

³Bik’ike bon’ato ban’aise nkangi baokalama meho: banody’aiso, la bitumbe, la banawisa bilama; (baolengedya elilelo en’asi.

⁴Lacina ekima akitaki bisike bimoi ena yembo ko alidyaki basi; koko boto onokitaki en’oso, eneki basi olilaka, ende aikaki ena nkangi en’etaketaka eneki’nd’ookaka.)

⁵Boto’omoi ayaaki meho onokaki nkangi enande mbula ntuk’isaso la mbula mwambi.

⁶Eneki Yesu oenak’ende aeci meho, ko amey’oka amokinda yok’oho elela mene, amufola, ate, Olanga nde oyika?

⁷Boto on’ise nkangi amokutwela, ate, Nkolo, enalil’asi, mpan’oto onompusodya en’asi; ohonde enay’emi, okina akita en’oso’onami.

⁸Yesu amosumola, ate, Etwa, ambola itunda ine, ko kenda en’akaka.

⁹Ko isasanga boto’oho aika, ko aambola itunda inande, ko aokenda. Bin’oho boyaaki nko Sabata.

¹⁰Lacin’eho, Ba-Yuda baosumol’ende onikaki, iy’ate, Bin’one nko Sabata; ofakolana lacina otole itunda ine bon’in’one.

¹¹Amakutwela, ate, Ende onombikyaka aonjilaka, ate, Ambol’itunda ine, ko coaka.

¹²Iyo bamufola, iy’ate, Boto’oho onokosumolaka, Ambol’itunda ine, ko coaka, ende nai?

¹³Koko ende onikyamaki ateya oniikyaki, lacin’oka Yesu aumaki lacin’ena bik’ike bon’ato bonoyaaki meho.

¹⁴Ena mbusa en’aoyi’ane, Yesu ameena en’otumba bona Yakomba, ko amosumola, ate, Lenda, omolika; tilake bowe lakina, lacina yoi limoi linalileki lokeseli litokokwela.

¹⁵Boto’oho aocoa, ko aosumola Ba-Yuda, ate Yesu kongombikyaki.

¹⁶La ncina ene, Ba-Yuda baonyoma Yesu, nko lacina eneki’nd’okambaka baoyi’ane en’ina bona Sabata.

¹⁷Koko Yesu amakutwela, ate, Bafango’onami ayakambe bikambwa yengoko esik’ene, ko emi njakambe.

¹⁸La ncina ene, Ba-Yuda baokusa lifon’etelo oyoyaka, lacin’oka atafulunganya boeka bona Sabata kei: atangaki Yakomba bafango’onandamene nkoho, ko yok’oho ayokolanyak’endamene la Yakomba nko kocu.

¹⁹Lacin’eho, Yesu amakutwela, ate, Solosolo, solosolo, lakosumol’ino, Bona afakambisa ekambwa endamene: akambisa nk’ekambwa eho kei enen’ende Bafango akamba; lacina bikambwa bin’etaketaka binakamb’afango, Bona akamba nko biho.

²⁰Lacina Bafango aoka Bona nganji, ko amotuma bikambwa bihitu binakamb’endamene. Koko angotuma bikambwa binileki bine, lacin’eho ino bofefe.

²¹Yoka bosamb’onetola Bafango bato banawaki, ko amaf’iyo liiko, nk’osamb’oho Bona amaf’iy’analang’Ende liiko nkoho.

²²Lacina Bafango afatendel’oto likambo: amofa Bona lifoka lacina atende bakambo bahatu,

²³lacin’eho bato bahatu bakumya Bona yok’osamb’onakumy’iyo Bafango. Onofakumya Bona, afakumya Bafango onotomaki.

²⁴Solosolo, solosolo, lakosumol’ino, ende onolofamela yoi linami, ko aimedy’ende onontomaki, aata liiko lonelofakale, ko afayaki en’etendelo ena likambo: amosila yuma en’ewedi, ko amoyela ena liiko.

²⁵Solosolo, solosolo, lakosumol’ino, esike engoya, emoyela nko l’isanga, enengi bato banawaki ooka efodya ena Bon’ona Yakomba, ko iy’anoka bangika nko mbika.

²⁶Yoka bosamb’onoyali Bafango la liiko eneyal’endamene, nk’osamb’oho amofa Bona lacina aate liiko eneyal’endamene nkoho;

²⁷ko amofa lifoka lacina atende bakambo, lacin’ende ayali Bon’on’oto.

²⁸Botafefake la yoi line. Lacina esike engoya eneng’iyatu banayali ena nketa ooka efodya enande,

²⁹ko bangofola: iy’anakambaki bolotsi bangetwa ena liiko, ko iy’anakambaki bowe bangetwa nk’en’ekwelo ena likambo.

³⁰Emi kei mpakambisa yoi limoko. Yoka bosamb’onok’emi, latend’akambo, ko etendelo enami eakolana, lacin’oka mpafone lacina nkambe eango enamamene: lafona nk’eango enande onontomaki.

³¹Yomb’emi njali temoin en’aoyi’anamamene, yoi linami lifana solosolo;

³²okina ayali onoyali yoka temoin enami, ko emi ley’oka yoi linatend’ende lacin’enami liyali nko solosolo.

³³Ino botomaki eneyali Yoane, ko ende amoyala temoin lacin’ena solosolo

³⁴Ohonde emi mpatambe boto yoka temoin enami; koko latenda baoyi’ane lacin’eho ino biike.

³⁵Ende ayaaki mwinda enafeta ko l’ena kalikali; ko ino bolangaki lacina bonyangele fololo enande imbu.

³⁶Ohonde emi njali la temoin enami eneleki eho ena Yoane: bikambwa biniki Bafango ompaka lacina nkadya biho, nko bikambwa biho binayakamb’emi, temoin enami nde biho, ko biil’oka Bafango antomaki.

³⁷Koko Bafango onontomaki, endamene amoyalama temoin enami; ino botoka efodya enande tu, ko botena bokotua bonande;

³⁸ko yoi linande lifayali ena ntundulu enino tu, lacina enefimedy’ino ende onoki’nd’otomaka.

³⁹Ino boyasisole Bitengelo bina Yakomba, lacina bokanel’oka bongata liiko ena biho; koko bitengelo biho biyali nko temoin enami;

⁴⁰ko bofalange boy’eneyal’emi lacina boate liiko.

⁴¹Mpatambe lokumo eneyali boto.

⁴²Emi lakey’ino, bofana nganji ena Yakomba en’etem’enino.

⁴³Emi moya ena lina lina Bafango’onami, ko bofantambe; yomb’okina aoya ena lina linandamene, bongotamb’ende.

⁴⁴In’anakumyana, ko bofafone lokumo loneloya eneyali Ende onoyali Yakomba mene, ino binya yimedya bosamb’oya?

⁴⁵Botakanelake’oka nongokoakol’ino baoyi eneyali Bafango: omoi ayali onokoakol’ino baoyi, nko Mose onok’in’oilak’etema la lolengedyo.

⁴⁶Yomb’ino bimedyaki Mose, tumbe bomonjimedy’emi, lacin’oka atengaki lacin’enami.

⁴⁷Ohonde enefimedy’ino bitengelo binande, bongimedya baoyi’anami bosamb’oya?