Read ngando Yoane 6 Bible Online

Yoane 6 - ngando bible

Yoane 6

¹Ena mbusa en’aoyi’aho, Yesu aocoa en’ili bona lose lona Ngalilaya (nko lose lona Tibelia).

²Ko bik’ike mene bon’ato bamokila, lacin’enek’iy’oenaka ndembi iniki’nd’okambaka eneyali iy’anawaki nkangi.

³Ko Yesu aanda ena lingonji, ko aokisase meho, ende l’akili’anande.

⁴Ko elambedya ena Ba-Yuda, nk’ena Etelo, eolama.

⁵Koko eneki Yesu oenolaka baiso’anande aena bik’ike mene bon’ato baoya eneyal’ende, ko aufola Filipo, ate, Tongosomba mampa meya, lacina bato’ane bale?

⁶Aotenda yoka bosamb’one lacina aomeke, lacin’oka endamene aeyaki yoi linalingi’nd’oila.

⁷Filipo amokutwela, ate, Mampa ineyasombama la deniers bekam’efe ifakolana l’iyo, lacin’eho boto l’oto’oniyo atambe etate.

⁸Omoi on’akili, nko Andelo onotwa la Simona Petelo, amosumola, ate,

⁹Bonome ayali onoyali la mampa ina fici itano, ko la nse ife; koko iho isokokolana l’ato bik’ike yok’one bosamb’oya?

¹⁰Yesu ate, Bosumol’ato bakisase. Tolenge toyaaki bike en’edye eho; ko baokisase, laali lona mpame nk’eyoka nkoto itano

¹¹Yesu aotamba mampa iho, ko eneki’nd’oambelaka Yakomba merci, aokafa eneyal’iyo banakisak’ase; nk’osamb’oho la nse, boto l’oto yombo bike, nk’eyok’onok’iy’olangaka.

¹²Ko enek’iy’okindaka liota, aosumola bakili, ate, Bosusanya bitate binocikalaka, efaonge lacina iyema yungyama.

¹³Enek’iy’okadyaka lila toma, baosusanya bitate binocikalaka bina mampa ih’itano la nse ih’ife, ko baolodya bitate biho ena batungu jo l’afe nko to.

¹⁴Eneki bato oenaka ndembi eneki’nd’okambaka, baila, Mbo solosolo, one ayali nko bosumoli’oho onoya ena loko.

¹⁵Koko eneki Yesu oeyak’oka bangoya oyuunda lacina bail’ende ena lifoka lina roi, autwa lakina ena lingonji ende kei.

¹⁶Eneki likolo oyelaka, bakili’anande baokita ena lose;

¹⁷baotalama en’atu, ko baoleka lose tacina bacu ena Kapalanauma. Bilima bokwa, koko Yesu ataye eneyal’iyo.

¹⁸Ko lose lolidyama, lacin’oka lofongo lona lokolo lokumba.

¹⁹Koko enek’iy’olukaka nkai kilometres yoka nsambo, baena Yesu kum’ayakende nko ntalama ena liko y’asi, ko aolama l’atu; ko iyo baanga nko mbanga;

²⁰koko ende amasumola, ate, Em’one, botaangake.

²¹Nkwaho baolanga lacina baotambe en’atu; ko isasanga boatu boyela en’okili bonok’iy’ocoaka.

²²En’ina bona loi, bato’aho bik’ike banemalaki en’oseleka bona lose baen’oka boatu boyaaki meho nk’omoko kei, nk’oho bonoki bakili’anande otalamaka, koko baen’oka Yesu atatalama en’atu l’akili’anande, ohonde bakili bacoaki nk’iyo kei;

²³(ohonde biatu bimoi bioya ena Tibelia, nk’ena mbolimboli l’edye enek’iy’olaka mampa, eneki Nkolo oambelaka Yakomba merci);

²⁴ko eneki bato’aho bik’ike oenak’oka Yesu l’akili’anande batayala meho lakina, iyoamene baotalama ena biatu biho, ko baoya ena Kapalanauma ofona Yesu.

²⁵Ko enek’iy’osungyak’ende en’ili bona lose, bamufola, iy’ate, Labi, oyaki mendo esik’eya?

²⁶Yesu amakutwela, ate, Solosolo, solosolo, lakosumol’ino, ino bompona, efa iacin’oka benaki ndembi: bompona lacina enek’in’olaka mampa ko bokindaki liota.

²⁷Botakambake lacin’ena toma tonateeha: bokambaka lacin’eho boate toma tonatoyalama nko njalama nk’ena liiko lonelofakale; nko toho tatongi Bon’on’oto okof’ino; lacin’oka Bafango, nko Yakomba, amila ndembi enande eneyal’ende.

²⁸Iyo bamufola, iy’ate, Yoi linaling’is’oila lika nai, lacina tokambe bikambwa bina Yakomba?

²⁹Yesu amakutwela, ate, Ekambwa ena Yakomba nd’ene: Bimedy’ende onoki’nd’otomaka.

³⁰Iyo bamufola, Mbo ndembi enakamb’e lacina tene ko tokimedya eka nai? Ekambwa enekamb’e eka nai?

³¹Bafango’aniso balaki mmana ena sengelenge; yok’onoki yoi otengamaka, Amafa mampa ena loola, lacina bale.

³²Yesu amasumola, ate, Solosolo, solosolo, lakosumol’ino, Mosi. atakof’ino inampa eho ena loola: Bafango’onami ayakof’ino ma mpa ena solosolo ena loola.

³³Lacina mampa ena Yakomba end’oho onokita ena loola, ko ayafa baise loko liiko.

³⁴Iyo bamosumola, Mbo Nkolo, otofe mampa eho bina l’ina.

³⁵Yesu amasumola, ate, Emi nde nde mampa ena liiko: onoya eneyal’emi afokaki njala tu, ko ononjimedya afokaki mposa tu.

³⁶Koko, yok’onoki’m’okosumolaka, bomonjena, koko bofimedya tu.

³⁷Bahatu banampa Bafango’onami bangoya eneyal’emi; ko ende onoya eneyal’emi, mpiitanya tu.

³⁸Lacin’emi moya ena loola, efa lacina njile eango enamamene: moya lacina njile eango enande onontomaki.

³⁹Ko eango enande onontomaki nd’ene: lacina mpungya nko l’omoko ona baho banaki’nd’ompaka, koko lacina njaetole nk’ahatu en’ina bon’esimbelo.

⁴⁰Koko eango ena Bafango’onami nd’ene: lacina boto l’oto onena Bona ko onomimedya, aate liiko lonelofakale, ko nongeetol’ende en’ina bona nsimbo.

⁴¹Nkwaho Ba-Yuda baoninganinga lacin’enande, eneki’nd’oilaka, ate, Emi nde nde mampa enekitaki ena loola.

⁴²Baila, Mbo one afayali Yesu, bon’ona Yosefa? Teya bafango’onande la nyango enande. Iya, ait’otenda, ate, Nkitaki ena loola, bosamb’oya?

⁴³Yesu amakutwela, ate, Botaninganingake eneyal’inoamene.

⁴⁴Efan’oto oninya liya eneyal’emi, yengoko Bafango onontomaki amosuma, ko nongeetol’ende en’ina bona nsimbo.

⁴⁵Yoi limotengama en’ekanda ben’asumoli, Iyatu bangolakama la Yakomba. Yok’oho boto l’oto onolofamela Bafango, ko onononganya l’ende, aoya eneyal’emi.

⁴⁶Efa lacin’oka boto ayali onenaki Bafango, umola nk’ende onoya eneyali Yakomba, ende amena Bafango.

⁴⁷Solosolo, solosolo, lakosumol’ino, Ononjimedya aata liiko lonelofakale.

⁴⁸Emi nde nde mampa ena liiko.

⁴⁹Bafango’anino balaki mmana ena sengelenge, ko bawaki:

⁵⁰ene nko mampa eneyakite ena loola, lacin’eho boto ale mampa eho, ko afawu.

⁵¹Emi nde nde mampa eneyaike, enekitaki ena loola; nko boto ala mampa ene angika nko mbika locela; koko mampa enengi’m’ofa nko bonufo bonami, bonongi’m’ofa lacin’ena liiko lona bato bana loko bahatu.

⁵²Lacin’eho, Ba-Yuda baatana ntango, iy’ate, Boto’one ainya litofa bonufo’onande lacina tole, bosamb’oya?

⁵³Yesu amasumola, ate, Solosolo, solosolo, lakosumol’ino, Yomb’ino bofale bonufo bona Bon’on’oto, ko bofamele bakil’anande, bofana liiko eneyal’inoamene.

⁵⁴Ende onola bonufo’onami ko amela bakil’anami, ende aata liiko lonelofakale; ko nongeetola en’ina bona nsimbo.

⁵⁵Lacina bonufo’onami boyali toma tona ndaka tona solosolo, ko bakil’anami bayali emeelo ena solosolo.

⁵⁶Ende onola bonufo’onami ko amel’akil’anami ayali eneyal’emi, ko l’emi eneyal’ende, nko njalama.

⁵⁷Yoka bosamb’onoki Bafango onoyaike ontomak’emi, ko emi njaike lacin’ena Bafango, nk’osamb’oho boto onond’emi nko ndaka, ende angika lacin’enami.

⁵⁸Ene nko mampa enekitaki ena loola; efa yok’onoki bafango’anino olaka mmana, ko bawaki; ende onola mampa ene angika nko locela.

⁵⁹Atendaki baoyi’ane ena sunagoga, eneki’nd’olakaka ena Kapalanauma.

⁶⁰Eneki bike bon’akili’anande ookaka baoyi’aho, baila, Mbo yoi line linde locili, oninya lilofa liho oka nai?

⁶¹Koko Yesu aofokola en’otem’onande bakili baoninganinga lacin’ena yoi liho, ko amasumola, ate, Yoi line yokopusumodya nde?

⁶²Iya, nko bena Bon’on’oto ayilele en’edye eneki’nd’oyalak’oso?

⁶³Onof’ato liiko nko Bolimo: bonufo bonde bototoloto; baoyi banaki’m’okosumolak’ino bayali bolimo ko bayali liiko.

⁶⁴Koko bamoi’anino bayali banafimedya. Lacin’oka Yesu aeyaki ena limatsako baho banafimedya, ko l’ende onongoangela;

⁶⁵koko aila, ate, Lacin’eho, mokosumol’ino, efan’oto oninya liya eneyal’emi, yengoko ende onofam’etelo l’afango’onami.

⁶⁶Nkwaho bike bon’akili’anande bautwa la mbusa, ko batut’okenda l’ende laanda.

⁶⁷Lacin’eho, Yesu aosumola ba-jo l’afe, ate, L’ino nkoho, bolanga bume?

⁶⁸Simona Petelo amokutwela, ate, Nkolo, tocu eneyali nai? On’ise baoyi bana liiko lonelofakale nk’e;

⁶⁹koko tomimedya ko tomey’oka e oyali On’oeka ona Yakomba solosolo

⁷⁰Yesu aamba, ate, Ntakosona nde ino ba-jo l’afe? Ko omok’onino ayali nko satana.

⁷¹Ao tenda laein’ena Yudasa bon’ona Simona, bise Keliota, lacin’oka onangela Yesu nk’ende, ko ayaaki omoi’ona ba-jo l’afe.