Read ngando Yoane 7 Bible Online

Yoane 7 - ngando bible

Yoane 7

¹Ena mbusa en’aoyi’ane, Yesu aoselasela ena Ngalilaya: atalanga yeta ena Yudea, lacin’oka Ba-Yuda bafon’etelo oyoyaka.

²Koko elambedya ena Ba-Yuda eolama, nk’elambedya ena Balombe.

³Bakune’anande bamosumola, iy’ate, Uma mendo, coaka ena Yudea, lacin’eho bakili’ane baene bikambwa binakamb’e.

⁴Boto onolanga lacina aeyane l’ato afakambe bikambwa binande ena lokuko: nk’okamba bikambwa bine, oyotume eamene eneyali’bato bahatu.

⁵Lacin’oka le bakune’anandamene batiimedya.

⁶Yesu amasumola, ate, Esike enami etayele; ohonde l’ino, esike en’etaketaka eakolana.

⁷Baise’enyanga bafinya oyokook’ino bowe, ohonde banjok’emi bowe, lacin’emi lil’oka bikambwa biniyo biyali nko bowe.

⁸Ino bombocoa en’elambedya; emi mpacu en’elambedya ene, lacina esike enami etayele.

⁹Eneki’nd’otendaka baoyi’ane l’iyo, aocikala nk’ena Ngalilaya.

¹⁰Eneki bakune’anande ocoaka en’elambedya, endamene aocoa nkoho, ohonde efa ena fololo: aocoa yoka l’ofisa.

¹¹Ba-Yuda bamofona en’elambedya, Mbo ayali meya?

¹²Koko bato bike baoninganinga bike lacin’enande; bamoi, Mbo ayali boto’on’olotsi; bakina, Mbo efana, akungya nde bato.

¹³Ohonde efan’oto onotendaki lacin’enande ena fololo, lacin’oka baanga Ba-Yuda.

¹⁴Koko en’okeke bon’elambedya Yesu ailela en’otumba bona Yakomba, ko aolaka lilako.

¹⁵Koko Ba-Yuda baofefa, iy’ate, Boto’one onotanonganya bekanda, ameya beho bosamb’oya?

¹⁶Yesu amakutwela, ate, Lilako linami lifayali linamamene: liyali nko linande onontomaki.

¹⁷Yomb’oto ayali la lisangya lacina akambe eango ena Yakomba, angeya yombo lilako liyali lina Yakomba, yombo latenda nko baoyi’anamamene.

¹⁸Ende onotenda baoyi’anandamene afona nko lokumo lonandamene; ohonde onofona lokumo lonande onotomaki, boto’oho ayali nko boto’ona solo solo, ko afan’aoyi baninda mbongi en’otem’onande.

¹⁹Mose atakofa nde basangya? Koko efana nko le boto’onino onomonya basangya. Bofona lacina bonjak’emi lacina nai?

²⁰Bato’aho bik’ike bamokutwela, Mbo oyali la demona. Onofona lacina akoyake oka nai?

²¹Yesu amautodya, ate, Emi mokamba ekambwa emoko, ko inatu bofefa.

²²Mose akofak’ino ekeselo ena yonge (efa lacina Mose amatsaki ekambwa eho: ematsamaki’ale l’ankya ban’alale), ko ino bokesel’oto yonge en’ina bona Sabata.

²³Iya, enakeselam’oto yonge en’ina bona Sabata lacin’eho boeka bona Mose bofasondolame, ino bolemwa nde lacina eneki’m’oikyaka boto nko mbikya en’ina bona Sabata?

²⁴Botakodyake baoyi l’okotua bonen’ino l’aiso: bokodya nko l’ekoedyo ena cilili.

²⁵Nkwaho bamoi bana baise Yelusalema baila, Mbo one afayali nde ende onafon’iyo lacina baoyake?

²⁶Koko lenda, ayatende nk’ena fololo, ko bafatende nko le yoi l’ende. Iya, bafoka bameya nde solosolo one ayali nko Masiya?

²⁷Koko teya bili bonoki boto’one oyaka; ohonde enengi Masiya oya, efana boto onongeya bili bonoki’nd’oyaka.

²⁸Lacin’eho, Yesu, eneki’nd’olakaka en’otumba bona Yakomba, aololua, ate, Bonjey’emi, ko beya bili bonoki’m’oyaka; ntaya l’emamene, ohonde onontomaki ayali nko solosolo, ko ino bofey’ende.

²⁹Emi ley’ende, lacin’oka moya eneyal’ende, ko ende antomaki.

³⁰La baoyi’ane, basokolanga baounde; koko efan’oto onomosukaka la likasa, lacin’oka esike enande etayele.

³¹Koko bike bon’ato’aho bamimedya, ko baila, iy’ate, Enengi Masiya oya, angokamba nde ndembi inileki ndembi ine bike iniki boto’one okambaka?

³²Bafalusi baoka bato’aho bik’ike baoninganinga yok’osamb’one lacin’enande, ko nkanga ina toome la Bafalusi baotoma police oyuunda.

³³Nkwaho Yesu aila, ate, Nongoyala l’ino ilalela, koko ena mbus’eho locoa eneyal’ende onontomaki.

³⁴Bongompona, koko bofansungyaki; enengi’m’oyala, ino bofayelisa meho.

³⁵Lacin’eho, Ba-Yuda baotendana, Mbo angocoa nde meya, lacin’iso tofosungyaki? Angocoa nde eneyal’iyo banafalangasanyi eneka Ba-Elene, ko angolaka nde Ba Elene?

³⁶Ncina eka nai eneki’nd’oilaka, ate, Bongompona, ko bofansungyaki, ko, Enengi’m’oyala, ino bofayelisa meho?

³⁷En’ina bon’okolo bon’esimbelo en’elambedya, Yesu aemala, ko aololua, ate, Boto l’oto onoka mposa, ayake eneyal’emi ko amele.

³⁸Ende ononjimedy’emi, njose ina basi bana liiko ingofola en’otem’onande, yok’onoki Bitengelo bina Yakomba oilaka.

³⁹Aotenda yoi line lacin’ena Bolimo, bonong’iy’animedy’ende otamba; lacina en’esik’eho Bolimo atafame, lacin’oka Yesu atayele en’okonde’onande.

⁴⁰Lacin’eho, bato’amoi ban’ato’aho bik’ike, enek’iy’ookaka baoyi’ane, baila, Mbo one nko bosumoli’oho solosolo.

⁴¹Bakina baila, iy’ate, One nko Masiya; koko bakina, Mbo efana: Masiya aya nde ena Ngalilaya?

⁴²Iya, Bokanda bona Yakomba bofile nd’oka Masiya angoya en’ecimo ena Dawidi, ko l’ena Beteleme, nk’onyanga bona Dawidi’ale?

⁴³Yok’osamb’oho bato’aho bik’ike baokambwana beloi lacin’enande.

⁴⁴Bamoi’aniyo basokolanga baounde, koko efan’oto onomosukaka l’akasa.

⁴⁵Nkwaho police bauta eneyali nkanga ina toome la Bafalusi, ko iyo bamaufola, Mbo ino botaya l’ende lacina nai?

⁴⁶Police baokutola, iy’ate, Bot’ola atatend’oso yoka bosamb’onatenda boto’one.

⁴⁷Bafalusi bamakutwela, iy’ate, Ino nkoho bomokungyama nde?

⁴⁸Iya, omoko ona bafoka, yombo ona Bafalusi, amolimedya nde?

⁴⁹Ohonde bato’ane bik’ike banafanonganya basangya baomomama bomomo!

⁵⁰Omoi’oniyo, Nikodemo (nk’ende onoyaki eneyali Yesu l’oco), amalokwela, ate,

⁵¹Boto akoiyama nde l’asangy’aniso, kuma batoke boloko’onande, ko bateye yoi linaliki’nd’okambaka?

⁵²Iyo bamokutwela, Mbo e nkoho oyali nde bise Ngalilaya? Sisola bitengelo, ko ongen’oka efaate bosumoli onoya ena Ngalilaya.

⁵³Koko boto l’oto aocoa en’otumb’onandamene.