Read ngando Yoane 8 Bible Online

Yoane 8 - ngando bible

Yoane 8

¹Koko Yesu aocoa ena lingonji lina Bilaya.

²Koko l’okulu mene auta la mbusa en’otumba bona Yakomba, ko bato bahatu baoya eneyal’ende, ko aokisase, ko amalaka.

³Koko batengi ban’ekanda la Bafalusi baoy’eneyal’ende l’oyoto onok’iy’oundaka kum’ayatate likele. Bameemadya ena ntoto eniyo,

⁴ko baosuniola Yesu, iy’ate, Bolaki, boyoto’one amolundama nk’en’etatelo mene ena likele;

⁵ko Mose aotosumola ena basangya, ate toyake bato ban’okotu’one la baufe; koko e, yoi linatend’e lacin’enande nai?

⁶Baotenda yok’osamb’oho lacina baomeke, ko baate etelo oyakol’ende likambo. Ko Yesu aosunama, ko aomatsa litenga en’ekongo l’ikola inande.

⁷Koko enek’iy’okusaka yufol’ende njufola, aosunwa, ko amasumola, ate, Ende on’ino onofana bowe, aofuselake lufe lin’oso!

⁸Ko aut’osunama lakina, ko aotenga en’ekongo l’ikola inande.

⁹Enek’iy’ookaka yoi liho, baokoiyama l’etem’eniyoamene, ko baofola omok’omoko, bingambe en’oso, yengoko Yesu aocikala ende kei, l’oyotoonemali ena ntoto.

¹⁰Ko Yesu aosunwa lakina, ko aufola boyoto, ate, Boyoto, bayali meya? Efana nko le boto onokokoiyaka likambo?

¹¹Ende ate, Nkolo, efan’oto. Koko Yesu amosumola, ate, L’emi nkoho, mpakokoiya; coaka, ko tilake bowe lakina.

¹²Yesu aotenda l’iyo lakina, ate, Emi nde nde Fololo en’enyanga: ononkil’emi afayakende ena liucu, angata fololo ena liiko.

¹³Bafalusi bamolokwela, iy’ate, E oyali temoin eneamene; yoi linatend’e lifatambamisa yoka solosolo.

¹⁴Yesu amakutwela, ate, Kanga njali temoin enamamene, yoi linatend’emi liyali nko solosolo; lacin’oka emi leya bili bonoki’m’oyaka, ko l’ili bonaco’emi; ino bofeya eneki’m’oyaka, ko bofeya enaco’emi.

¹⁵Ino bokodya l’okotua bonoyali bato: emi mpakoedy’oto baoyi tu.

¹⁶A koko, kanga lakodya baoyi, ekoedyo enami eyali nko solosolo, lacin’oka mpayali nk’emi kei: Bafango onontomaki ayali l’emi.

¹⁷O, yoi limotengama ena basangya banino, lika: Benyua bena temoins ife beyali nko solosolo.

¹⁸Emi nde nde temoin enamamene, ko Bafango onontomaki ayali temoin enami nkoho.

¹⁹Iyo bamufola, iy’ate, Bafango’one ayali meya? Yesu aokutola, ate, Ino botanjey’emi, ko boteya Bafango’onami; yombo bonjeyak’emi, tumbe beyaki Bafango’onami nkoho.

²⁰Yesu aotenda baoyi’ane en’emonyedyo ena nganji ina Yakomba, eneki’nd’olakaka en’otumba bona Yakomba; koko efan’oto onuundaki, lacin’oka esike enande etayele.

²¹Amalokwela lakina, ate, Emi locoa, ko bongompona, koko bongowa en’aoyi’owe’anino; bili bonaco’emi ino bofayelisa meho.

²²Lacin’eho, Ba-Yuda baila, Mbo angoyoyaka nde endamene? lacina enil’ende, ate, Bili bonaco’emi ino bofayelisa meho.

²³Koko amasumola, ate, Ino boyali ban’ase, emi njaki ena liko; ino boyali bana loko lone, emi mpayali ona loko lone.

²⁴Ncina eneki’m’okosumolak’ino oka, Bongowa en’aoyi’owe’anino, nd’eho; lacin’oka yomb’ino bofimedy’oka emi njali nk’ende, bongowa en’aoyi’owe’anino.

²⁵Iyo bamufola, Mbo e, oyali nai? Yesu amasumola, ate, Emi nk’ende onoki’m’okosumolaka ena limatsako.

²⁶Njali l’aoyi bike lacina nkosumol’ino ko nkodya lacin’enino. Ohonde onontomaki ayali solosolo, ko lasumola baise loko baoyi banaki’m’ookaka eneyal’ende.

²⁷Iyo batafokol’oka aotenda l’iyo lacin’ena Bafango.

²⁸Lacin’eho, Yesu amasumola, ate, Eneng’in’oiledya Bon’on’oto, bongey’oka emi njali nk’ende, ko mpakambe yoi limoko l’emamene: yok’onoki Bafango’onami ondakaka, latenda nko baoyi’ako.

²⁹Ko ende onontomaki, ayali l’emi: Bafango atancika emi kei, lacina bina l’ina lakambeela nko baoyi’aho banimedy’ende bolotsi.

³⁰Enem’end’otenda baoyi’ane, bato bike bamimedya.

³¹Ko Yesu aosumola Ba-Yuda banomimedyaka, ate, Yomb’ino boyaela en’aoyi’anami, boyali bakili’anami solosolo;

³²ko bongeya solosolo, ko solosolo eho engokotungol’ino.

³³Bamokutwela, iy’ate, Iso toyali ban’ana Abalayama, ko bisike l’isike totayala baombo ban’oto tu: iya, enil’e oka, Bongotungwa?

³⁴Yesu amautodya, ate, Solosolo, solosolo, lakosumol’ino, boto l’oto onil’owe ayali boombo’on’owe;

³⁵koko boombo afayale en’otumba nko njalama: bona kongoyali en’otumba nko njalama.

³⁶Lacin’eho, nko Bona akotungol’ino, bongotungwa nko ntungwa mene.

³⁷Emi ley’oka boyali ban’ana Abalayama; ohonde boyafone lacina bonjake, nko lacina yoi linami lifan’etelo en’etem’enino.

³⁸Emi latenda baoyi banaki’m’oenaka l’afango’onami; ino bokamba nko baoyi banak’in’ookaka eneyali bafango’onino.

³⁹Baokutola, iy’ate, Bafango’oniso oka Abalayama. Yesu amasumola, ate, Yomb’ino boyali ban’ana Abalayama, tumbe boyakambe bikambwa bina Abalayama;

⁴⁰ohonde isanga boyafone lacina bonjake, emi boto onokosumolak’ino baoyi bana solosolo, banaki’m’ookaka eneyali Yakomba. Abalayama atakamba yok’osamb’oko.

⁴¹Ino bokamba bikambwa bin’afango’onino. Iyo bamolokwela, Mbo iso tototwa ena likele: toyali l’afango’oniso nk’omoko, nko Yakomba.

⁴²Yesu amasumola, ate, Yombo Yakomba ayali Bafango’onino, tumbe bonjok’emi nganji, lacin’oka emi mpolaki eneyali Yakomba, ko loyaka nk’eneyal’ende: ntaya l’eango enamamene, ende kongontomaki.

⁴³Ncina enefanongany’ino etendelo enami eka nai? Nk’enefiny’ino lilofamela baoyi’anami.

⁴⁴Ino boyali ban’ana bafango’onino oka Satana, ko bolanga lacina bile mposa ina bafango’onino. Ende ayaaki boyaki bon’ato nk’ena limatsako, ko atemala ena solosolo, lacina solosolo efayali eneyal’ende tutu. Enatend’ende mpoci, atenda nko baoyi’anandamene; lacin’oka ayali bofoci bona mpoci, ko ayali bafango’ona mpoci ihatu.

⁴⁵Koko ino bofanjimedya, lacin’emi latenda nko baoyi bana solosolo.

⁴⁶Boto’onino onombakol’emi likambo lin’owe ayali meya? Koko yombo latenda baoyi bana solosolo, bofanjimedya lacina nai?

⁴⁷Ende onoyali ona Yakomba, aokeela baoyi bana Yakomba; ino bofoke baoyi’aho, lacin’oka ino bofayali bana Yakomba.

⁴⁸Ba-Yuda bamokutwela, Mbo iso totila nde solosolo, enek’is’oilak’oka onde bise Samalia, ko oyali la demona?

⁴⁹Yesu aamba, ate, Emi mpana demona: emi lafika Bafango’onami, koko ino bontembol’emi.

⁵⁰Koko mpafone lokumo lonamamene: omoi ayali onoyafone, ko ayakodya baoyi.

⁵¹Solosolo, solosolo, lakosumol’ino, Yomb’oto amonya yoi linami, afayen’ewedi tu.

⁵²Nkwaho Ba-Yuda bamosumola, Mbo isanga tey’oka oyali la demona. Abalayama awaki, ko basumoli bawaki; koko e oila, ate, Yomb’oto amonya yoi linami afayen’ewedi tu.

⁵³Iya, oleki nde Abalayama bafango’oniso, onowaki? la basumoli, banawaki? Oyoil’eamene nai?

⁵⁴Yesu aokutola, ate, Yomb’emi layokumy’emamene, lokumo lonami loyali nko bototoloto: Bafango’onami kongonkumy’emi, nk’ende onil’ino oka ayali Bafango’onino.

⁵⁵Ino boteey’ende: emi kongoey’ende; ko yomb’emi lil’oka, Mpey’ende, tumbe nongoyala bofoci’ona mpoci, yok’ino. Ohonde lomeeya, ko lamonya yoi linande.

⁵⁶Bafango’onino Abalayama anyangelaki la lolengedyo lacina aene bina bonami: aenaki boho, ko aonyangela.

⁵⁷Ba-Yuda bamosumola, Mbo e otakwa mbula ntuku itano, ko amena Abalayama?

⁵⁸Yesu amasumola, ate, Kuma Abalayama atotwa, emi njali.

⁵⁹Nkwaho baambola baufe lacina baofusele; koko Yesu aoyofisa, ko aofola en’otumba bona Yakomba.