Read ngando Yoane 9 Bible Online

Yoane 9 - ngando bible

Yoane 9

¹Eneki Yesu oetaka, aena boto onodyak’aiso nk’en’eotwelo enande.

²Koko bakili’anande bamufola, iy’ate, Labi, la boto’one l’iy’anootaki, onokambaki bowe oka nai, lacina aotwaki l’aiso nko mbodya?

³Yesu aokutola, ate, Ef’oto’one onilaki’owe, ko ef’iyo banootaki; ohonde lacina bikambwa bina Yakomba yenya eneyal’ende.

⁴Akoli eneyal’emi nkambe bikambwa binande onontomaki kuma bane boyali: boco boya, bonofakambama ekambwa.

⁵Kuma emi njali ena loko, nde nde Fololo ena loko.

⁶Eneki’nd’otendaka baoyi’aho, auta nsoi ena loko, aonyomola bekongo yoka lomoto, ko aohinya baiso ban’oto’oho la lomoto loho,

⁷ko amosumola, ate, Coaka, oyokule ena lose lona Siloa (ncina ena Siloa nko Ntomama). Ende aocoa, ko aoyokula, ko auta kum’ayene l’aiso.

⁸Iy’anoli l’ende, ko l’iy’aneenaki’oso kum’ayali bolombi, baila, Mbo one afayali nde ende onokisak’ase oyolomba toma?

⁹Bamoi baila, Ayali nk’ende; bakina, Mbo efana: nde aholana l’ende; koko endamene aila, ate, Nde nde nk’ende.

¹⁰Lacin’eho, bamufola, iy’ate, Baiso’ane baolifwa bokotu’oya?

¹¹Aokutola, ate, Boto onatang’iyo Yesu aonyomola lomoto, ko aohinya baiso’anami, ko aonjila, ate, Coaka, oyokule ena lose lona Siloa; ko ncoaki, njokulaki, ko njenaki.

¹²Bamufola, iy’ate, Ende ayali meya? Ate, Mpeya.

¹³Baoya l’ende onodyaki’aiso en’oso bona Bafalusi.

¹⁴Bin’oho bonoki Yesu onyomolaka lomoto ko alifolaki baiso’anande boyaaki nko Sabata.

¹⁵Ko Bafalusi baut’oyufola bokotua bonoki baiso’anande olifwaka. Ko amasumola, ate, Ende ailaki lomoto en’aiso’anami, njokulaki, ko njenaki.

¹⁶Nkwaho bamoi bana Bafalusi baila, iy’ate, Boto’one afayali boto’ona Yakomba, lacina afamonya bina bona Sabata. Koko bakina baila, iy’ate, Boto’on’owe ainya likambisa bikambwa bina mpefa yok’one bosamb’oya? Ko baokambwana beloi.

¹⁷Baut’otenda lakina l’oto onodyak’aiso, iy’ate, Eamene otanga and’oya, lacin’oka alifolaki baiso’ane?

¹⁸Aamba, ate, Ande bosumoli. Ba-Yuda batimedy’oka aodyaki’ale baiso ko amena lakina, yengoko kuma baelela bafango’onande la nyango enande,

¹⁹ko bamaufola, iy’ate, Boto’one ayali bon’onino, onil’ino oka aotwaki’ale l’aiso nko mbodya? Iya, isanga aena yok’osamb’oya?

²⁰Bafango la nyango baokutola, iy’ate, Tey’oka one ayali nko bon’oniso, ko aotwaki l’aiso mbodya;

²¹ohonde bokotua bonen’ende isanga, tofeya; ko tofeya boto onolifolaki baiso’anande. Ende afayali bonome, boufole nk’endamene, angotenda lacin’enandamene.

²²Bafango la nyango baotenda yok’osamb’oho, lacin’oka baanga Ba-Yuda; lacina eneki Ba-Yuda oangak’eango, iy’ate yombo boto’on’etaketaka aimedy’oka Yesu ayali Masiya, bangofodya boto’oho en’osolongano bona sunagoga.

²³La ncina ene, bafango la nyango enande baila, iy’ate, Afayali bonome; bufol’ende.

²⁴Lakina baut’oelela boto’oho onodyak’aiso boelela bon’efe, ko bamosumola, iy’ate, Kumya nko Yakomba; tomey’oka boto’one ande boto’on’owe.

²⁵Koko ende aokutola, ate, Yomb’ayali boto’on’owe ei mpeya; emi leya nko yoi limoko: mbodyaki’aiso, koko lakina mena.

²⁶Iy’ate, Akilelaki’oya? Akolifwelaki baiso bosamb’oya?

²⁷Amakutwela, ate, Lokosumolak’ino, ko botalofa; bolanga boke lakina lacina nai? Ino nkoho bolanga nde boyalame bakili’anande?

²⁸Koko iyo bamosaiya bike, iy’ate, E onde bokili bon’oto’oho: iso toyali bakili bana Mose;

²⁹tey’oka Yakomba atendaki’ale la Mose, ohonde boto’one, tofeya bili bonoki’nd’oyaka.

³⁰Amakutwela, ate, Bofeye fo! yoi lina mpefa oya, andifwelaki baiso, koko ino bofeya eneki’nd’oyaka!

³¹Tey’oka Yakomba afalofe baoyi ban’ato’owe; ohonde nk’oto akumya Yakomba, ko akambeela eango enande, Yakomba aoka boto’oho;

³²nk’ena limatsako lina loko yoi litokan’oka boto alifolaki baiso ban’oto onotwaki la baiso mbodya.

³³Yombo boto’one ataya eneyali Yakomba, tumbe atakambisa yoi limoko.

³⁴Iyo bamokutwela, iy’ate, E ootwaki en’aoyi’owe nk’en’eotwelo ene, ko otolaka nd’iso? Ko bamofodya.

³⁵Yesu aokaki’oka bamolofodya; ko eneki’nd’osungyaka, amufola, ate, Oimedya nde Bon’ona Yakomba?

³⁶Aamba, ate, Nkolo, ende nai? lacina njoimedya.

³⁷Koko Yesu amosumola, ate, Omomeena, ko end’one onoyatende l’e.

³⁸Ende ate, Nkolo, limedya; ko amoosamela.

³⁹Koko Yesu ate, Njaki ena loko nko lacin’ena etendelo ena likambo: lacina iy’anafene baene, ko iy’anena baodya baiso.

⁴⁰Bafalusi’aho banayaaki l’ende baoka baoyi’ane, ko bamufola, iy’ate, Iso nkoho tomolodya nd’aiso?

⁴¹Yesu amasumola, ate, Yomb’ino boodyaki’aiso, tumbe botaat’owe; ohonde isanga enil’ino oka, Tena, bowe’onino bociki nko l’ino.