Read ngando Bikambwa Biniki Bikima 10 Bible Online

Bikambwa Biniki Bikima 10 - ngando bible

Bikambwa Biniki Bikima 10

¹Ko boto’omoi ayaaki ena Kaisalia, lina linande lika Kotunelio, capitaine ena boloi bona soldats bokama, boloi bonotangama bona Italia.

²Boto’one ayaaki bokumi bona Yakomba, ko aangaki Yakomba, ende l’omboi’onande bohotu. Akafelaki bato biinda nganji bike in’isei, ko aonda Yakomba bina l’ina.

³Yok’en’esike ena trois heures en’in’omoi, boto’one aena enelo, aena ekima ena Yakomba nko fololo kum’ayatua eneyal’ende, ko ameesa, ate, Kolunelio!

⁴Ende amolenda ta, ko aanga, ate, Yoi lika nia, Nkolo? Amosumola, ate, Beondo bene la nganji ine in’isei imilela eneyali Yakomba yoka liofwa line.

⁵Koko isanga tom’ato ena Yafo, baelele Simona, onotangama Petelo;

⁶akisase eneka Simona emoi, boaki bona bikoto, onoyali l’otumb’onande ena mbolimboli la lose l’okwa (ende angokosumola baoyi banakoli l’e lacina okambe).

⁷Koko eneki ekima onotendaki la Kolunelio oumaka, aelela basali’anande ban’otumba bafe, ko la soldat emoi, bokumi bona Yakomba, bon’iyo banosaelaki bina l’ina;

⁸amasumol’iyo baoyi’ane bahatu, ko amatoma ena Yafo.

⁹En’ina bona loi, kuma bato’ane bayakende, ko baolama l’onyanga, Petelo aanda ena liko lina nsamba en’otumba oyonda Yakomba, yok’en’esike ena midi.

¹⁰Ko aowa la njala, ko aolanga lacina ale toma; ko enem’iy’ofumbel’ende toma, aokwa yok’ena lilotua.

¹¹Ko aena en’enelo nk’eyoka loola lomokombwa, ko bomongoci boyakite ena loko, yok’esenda ena nkolo mene enelitama l’ekoli ena batuku bah’anei.

¹²Nyama ihatu iniyali l’akaka banei la towawa tonetoyosumela ena loko la mpulu ina loola bayaaki meho.

¹³Ko lofoso lomei loya eneyali ende, ate, Emala, Petelo, yakaka, ko laka.

¹⁴Koko Petelo aamba, ate, Ef’oko, Nkolo; lacin’emi ntale iyema imoko in’etaketaka yombo ina nsefo.

¹⁵Ko lofoso loya eneyal’ende lakina, ate, Iyema iniki Yakomba osongaka, e tatangake iho mbindo.

¹⁶Ko yoi line yilama beila besaso; ko lakina bomongoci’oko botambama ena loola.

¹⁷Enema Petelo okakanda bike en’otem’onande la ncina en’enelo eneki’nd’oenaka, bato’aho banatomamaki la Kolunelio baufola botumba bona Simona, ko baemala en’ofolo.

¹⁸Ko baelela, ko baufola yombo Si mona, onotangama Petelo, ayali meho?

¹⁹Eneki Petelo okanelaka enelo eho, Bolimo amosumola, ate, Lenda, bato’asaso bakofona.

²⁰Emala, kita ko coaka l’iyo, takandakandake, lacin’oka emamene njatomaki.

²¹Petelo aokita eneyali bato’aho, ko aila, ate, Lenda, emi nk’ende onafon’ino: ncina enay’ino eka nai?

²²Iy’ate, Kolunelio, capitaine ena soldats, boto’ona mbongi la bokumi bona Yakomba, onoyali la lokumo lon’olotsi eneyali bato bahatu bana Ba-Yuda, aolakama l’ekima en’oeka ena Yakomba lacina akeelela en’otumb’onande, lacin’eho aoke baoyi eneyal’e.

²³Amaelela en’otumba, ko amaokela lacina baetame meho. Ko en’ina bona loi aemala, ko aocoa l’iyo, ko bifili bimoi bina Yafo baocoa nko l’ende.

²⁴Koko en’ina bona loi lakina baofola Kaisalia. Kolunelio amakonga mela, eneki’nd’okadyaka lisusanya bais’ola’anande ko la bifili binande.

²⁵Koko eneki Petelo otuaka, Kolunelio aukana l’ende, ko aokwa en’akak’anande, ko amoosamela.

²⁶Koko Petelo ameemadya, ate, Emalaka; emi nkoho njali nk’oto kei.

²⁷Ko aotua kum’ayesole l’ende, ko aosungedya bato bike basusanyi.

²⁸Ko amasumola, ate, Inoamene bey’oka efakoli l’asangya lacina boto ona Ba-Yuda aambane l’oto on’onyang’okina, ko efakoli lacina ayi eneyal’ende; ohonde Yakomba amontum’oka efakoli l’emi lacina ntange boto’omoko boto’on’etaketaka, yomb’ona nsefo.

²⁹Lacin’eho, eneki’m’oelelamaka njaki, ntaata ntango. Koko lakufola ncina enek’in’ombelelaka?

³⁰Kolunelio aila, ate, Bina benei bemeta, nk’ena heure ene en’isaso, mbondaki en’otumb’onami, ko lenda, boto aemajaki en’oso’onami kum’ayalote bisenda bina kelikeli mene;

³¹ko aonsumola, ate, Kolunelio, boondo’one bomokana ko nganji ine in’isei imoyala yoka liofwa eneyali Yakomba;

³²koko tom’ato ena Yafo oyelele Simona, onotangama Petelo; akisase en’otumba bona Simona, boaki bona bikoto, ena mbolimboli la lose l’okwa.

³³Lacin’eho, lokotomelaka bato isasanga; ko omila bolotsi lacin’oka omoya. Isanga isatu toyali mendo en’oso bona Yakomba, lacin’eho tolofe baoyi bahatu banaki Yawe okosumolaka lacina otende.

³⁴Nkwaho Petelo aomumol’onyua, ate, Solosolo emi len’oka Yakomba afatambe boto la likai;

³⁵ohonde en’onyanga l’onyanga boto onomoanga ko aokamb’ikambwa bina mbongi, aimedyama bolotsi l’Ende.

³⁶Yoi linaliki’nd’otomelaka ban’ana Yisalaele, eneki’nd’oasumolaka bosimo bon’olotsi bona mwi la Yesu Masiya (Ende ayali Nkolo en’ato bahatu),

³⁷inoamene beya yoi liko: nko yoi liho linalisekolaki ena Yudea endotu eneki liho omatsaka ena Ngalilaya en’oso, ena mbusa ena bosimo bon’inelo bonoki Yoane olakaka.

³⁸Yoi liho nk’osimo bona Yesu ona Nazaleta, bokotua bonoki Yakomba oekyak’ende en’oeka la Bolimo bon’olotsi ko la mpamba mene; onoselaselaki kum’ayakambe bikambwa bin’olotsi, ko onikyaki bato bahatu banaki Satana otumanyaka, lacin’oka Yakomba ayaaki l’ende.

³⁹Ko iso toyali temoins ina baoyi bahatu banaki’nd’okambaka, l’ena bonyanga bona Ba-Yuda ko l’ena Yelusalema; koko iyo baoyakaki, enek’iy’osengyaka en’ote.

⁴⁰Yakomba ameetola en’ewedi nk’ende Yesu en’ina bon’esaso, ko amof’etelo oyenya,

⁴¹ef’eneyali bato bahatu, ohonde eneyali temoins iniki Yakomba osonaka en’oso, nk’eneyal’iso banalaki toma l’ende ko banamelaki l’ende ena mbusa en’eetwelo enande en’ewedi.

⁴²Ende aototoma lacina tosekodya bosimo bon’olotsi eneyali bato, ko tosumol’ato fololo ende amosonama la Yakomba lacin’eho ayalame juge en’iyo banayaike ko l’eniyo banawaki.

⁴³Basumoli bahatu bamotenda lacin’enande, iy’ate la lina linande boto l’oto onomimedya angotungwa ena baoyi’owe’anande.

⁴⁴Nk’enema Petelo otenda baoyi’ane, Bolimo bon’olotsi aokwela bato bahatu banokaki yoi.

⁴⁵Ko iyo ban’oloi bona nkesa ena yonge banimedyaki, iyo banayaki la Petelo, baofefa lacin’oka nganji ena Bolimo bon’olotsi eutelamaki eneyali Befenda nk’osamb’oho;

⁴⁶lacin’oka bamaoka kuma bayatende la mposo ikina, ko bayakumya Yakomba.

⁴⁷Nkwaho Petelo aila, ate, Basi basimbama nde, lacina bato’ane bafiname, bato banotambaka Bolimo bon’olotsi nk’eyok’onok’isoamene otambaka?

⁴⁸Aila, ate bainamake en’asi ena lina lina Yesu Masiya. Ko bamoonda lacin’eho ayale l’iyo bina bemoi.