Read ngando Bikambwa Biniki Bikima 11 Bible Online

Bikambwa Biniki Bikima 11 - ngando bible

Bikambwa Biniki Bikima 11

¹Ko bikima la bifili banayaaki ena Yudea baok’oka Befenda baotamba yoi lina Yakomba nkoho.

²Ko eneki Petelo oyaka ena Yelusalema, iy’ana nkesa ena yonge bamoatsa ntango,

³Mbo e otuaki eneyali bato banatakesama yonge, ko olaki toma nko l’iyo!

⁴Koko Petelo aomatsa oyasumola yoi liho nk’ena limatsako,

⁵ate, Njaaki en’onyanga bona Yafo, ko loonda Yakomba; ko len’enelo yok’ena lilotua, nko bomongoci yok’esenda ena nkolo eokitsama ena loola, eosukama en’atuku bah’anei; ko boho boya nk’eneyal’emi

⁶Loenda boho ta, ko lokanela, ko lena nyama miyali l’akak’anei ina loko lohalotu, ko la nyama inay’olema, ko la towawa tonatoyosumela ena loko, ko la mpulu ina liko.

⁷Ko loka lofoso lonelonsumola, ate, Emala, Petelo, yakaka ko laka.

⁸Ko laamba, emite, Ef’oko, Nkolo, lacina iyema in’etaketaka la iyema ina nsefo itatua en’onyua’onami.

⁹Koko lofoso lonkutwela lakina ena loola, ate, Iyema iniki Yakomba osongaka, e tatangake iho mbindo.

¹⁰Yoi line yilama beila besaso, ko bomongoci’oko botambama lakina ena loola.

¹¹Koko lenda, nk’isasanga bato’asaso baemala ena mbiolo en’otumba bonoki’m’okisak’ase, banaki Kolunelio otomaka eneyal’emi.

¹²Ko Bolimo aondaka lacina ncu l’iyo, ntakandakandake. Bifili bine botoa baocoa l’emi, ko totua en’otumba bon’oto’oho.

¹³Ende aotosumola bokotua bonoki’nd’oenaka ekima ena loola aemali en’otumb’onande, ko aila, ate, Tom’ato ena Yafo oyelela Simona onotangama Petelo;

¹⁴ende angokosumola baoyi banangi eamene l’omboi’one bohotu oikyama.

¹⁵Ko eneki’m’omatsaka litenda, Bolimo bon’olotsi amakwela, nk’eyok’onoki’nd’otokwelak’iso ena limatsako.

¹⁶Ko lokanedya yoi lina Nkolo, yok’onoki’nd’otendaka, ate, Yoane ainaki bato en’asi solosolo, koko ino bonginama ena Bolimo bon’olotsi.

¹⁷Yombo Yakomba afak’iyo nganji nk’eho eneki’nd’o tofak’iso enek’is’oimedyaka Nkolo Yesu Masiya, emi vo, nsokokolana lifomana la Yakomba bosamb’oya?

¹⁸Enek’iy’ookaka baoyi’ane baoyala nko mwi; ko baokumya Yakomba, iy’ate, Yakomba amofa Befenda nkoho eumbelo en’aoyi’owe lacina baike.

¹⁹Iy’anafalangasanyi bili l’ili la binyomelo binimatsaki lacin’ena Setefano baocoa, baoyela Poinike, la Kupulio, la Antiokia; koko baosumola bosimo bona Yoi nk’eneyali Ba-Yuda kei.

²⁰Koko bamoi’aniyo bayaaki baise Kupulio la baise Kulene, ko enek’iy’oyelaka Antiokia, baotenda la Ba-Elene nkoho, bamasumola bosimo bon’olotsi, nko bona Nkolo Yesu.

²¹Ko likasa lina Nkolo liyaaki l’iyo; ko bike bon’ato bimedya, ko baohalingwa eneyali Nkolo.

²²Koko bosimo bona yoi liho bookana en’atoi ban’ekelesia eneyaaki ena Yelusalema; ko iyo baotoma Balunaba ena Antiokia.

²³Ko ende, eneki’nd’oyaka, ko aena isei ina Yakomba, aonyangela; ko amakiky’iyatu, ate baundamele Nkolo l’eango mene en’otema.

²⁴lacin’oka ende ayaaki boto’on’olotsi, onololaki la Bolimo bon’olotsi ko l’imeedyo; ko bike bon’ato bambana la Nkolo.

²⁵Koko aocoa Taluseu oyofona Saula.

²⁶Ko eneki’nd’osungyaka, aoya l’ende ena Antiokia. Koko mbula emoko botutuma baosolongana l’ekelesia, ko baolaka bato bike mene. Ko bili bon’oso bonoki bakili otangamaka Ba-Masiya nk’ena Antiokia.

²⁷En’esik’eho basumoli bamoi baocika Yelusalema ko baoya ena Antiokia.

²⁸Ko omoi’oniyo onotangama Agabo aemala, ko aeyanya la Bolimo, ate loci mene lona njala longokwela benyanga behetu bena loko. Ko loci loho loyaki kuma Kulaudio ayali Kaisala.

²⁹Ko bakili bahatu baoyalama la lisangya lacina batomele bifili banatongaki ena Yudea nganji in’isei, boto l’oto yok’onoki’nd’oataka.

³⁰Ko baila yoi liho, ko baotomela bingambe nganji iho l’akasa bana Balunaba la Saula.