Read ngando Bikambwa Biniki Bikima 12 Bible Online

Bikambwa Biniki Bikima 12 - ngando bible

Bikambwa Biniki Bikima 12

¹En’esik’eho Elode, lifoka lina roi, aociedya bakas’anande oyehya bamoi ban’ekelesia.

²Aoyaka Yakobo onotwaki la Yoane nko la lokula lon’ita;

³ko eneki’nd’oenak’oka yoi liho yolangam’olotsi la Ba Yuda, aocoa oyunda Petelo nkoho. Bina beho nko bina bena mampa enefana nyango.

⁴Eneki’nd’oundaka, amiila en’otumba bon’enyolo, amolekya eneyali soldats jo l’otoa lacin’eho baotombanya; koko ena lokanyi lonande loneloki’nd’okanelaka ate ena mbusa en’elambedya ena Etelo angofody’ende eneyali bato.

⁵Yok’oho, Petelo aomonyama en’otumba bon’enyolo; koko baise ekelesia baonda Yakomba nko mbonda mene lacin’enande.

⁶Ko eneki Elode osokolanga lacina aofody’ende, nko l’oco’oho Petelo aetama en’atenyi’a soldats ife, kum’atungi l’enyolo befe, ko batombanyi banatombanya botumba bon’enyolo bayali nk’en’oso bona lokombo.

⁷Koko lenda, ekima ena Nkolo aemala l’ende, ko fololo mene eofeta ena lolu; koko ekima aofoma Petelo ena mbanji, ameetola, ate, Emala yaya. Ko benyolo benande beokwa en’akas’anande.

⁸Ko ekima amosumola, ate, Lit’okoli’one, ko lota sapata me; ko aila yok’osamb’oho. Ko amosumola, ate, Lota esenda ene, ko onkile.

⁹Aofola, ko amokila; ko atey’oka yoi lineyilamaka l’ekima liyaaki nko solosolo: aokanel’oka ayene yok’enelo.

¹⁰Ko enek’iy’olekanyaka boloi bon’atombanyi bon’oso la boloi bon’efe, baoyela ena lokombo lon’efeko lonelokombwa en’onyanga. Loho lokombwa eneyal’iyo nko lohoamene; ko baofola, ko baotianya mbok’emoko en’onyanga; ko nkwaho ekima ena loola auma eneyali ende.

¹¹Eneki lokanyi lona Petelo outaka eneyal’ende, aila, ate, Isanga mey’oka solosolo Nkolo atomaki ekima enande, ko antungolaki ena likasa lina Elode, ko l’en’aoyi bahatu banaki Ba-Yuda olengedyaka.

¹²Koko eneki’nd’okanelaka yok’osamb’oho, aoya en’otumba bona Malia, nyango ena Yoane onoyali l’osatu’oka Malako; bato bike baosolongana meho ko bayonde Yakomba.

¹³Eneki Petelo ofomelaka lokombo, bosali on’oyoto aoya oyolofa, lina linande lika Loda.

¹⁴Ko eneki’nd’oeyaka efodya ena Petelo, atakombola lokombo lacin’en’enyanga bike, ohonde aocoa la laango ena ntundulu, amasumol’oka Petelo aemali en’oso bona lokombo.

¹⁵Iyo bamosumola, Mbo olowa nde! Ohonde aokusa litenda nko yoi liho. Koko iyo, Mbo ayali nk’ekima enande.

¹⁶Koko Petelo aokusa lifomela lokombo; ko enek’iy’okombolaka, bameena, ko baofefa.

¹⁷Ko ende amaila ndembi la likasa linande lacina bayale mwi, ko amalokwela bokotua bonoki Nkolo ofodyak’ende en’otumba bon’enyolo. Ko aila, ate, Sumola Yakobo ko l’ifili baoyi’ane; ko aofola, aocoa bili’okina.

¹⁸Koko l’okulu lofoso bike loata en’atenyi’a soldats la soldats, lacina enetey’iyo bili bonoki Petelo ocoaka.

¹⁹Ko eneki Elode okembak’ende, ko atosungedya, aufola batombanyi, ko amatoma lacina bayakame. Ko auma ena Yudea, ko aocoa litonga ena Kaisalia.

²⁰Koko Elode aolemwa la baise Tula la Sidona nko nkele mene. Ko enek’iy’oilaka Bulasito, botombanyi bona lolu lona lifoka, lacina ayalame bolekya boniyo, baoya eneyali Lifoka la lokanyi lomoko, bamufola efili lacin’eho bayalame la mwi, lacin’oka bonyang’oniyo boata toma tona ndaka nk’en’onyanga bona lifoka.

²¹En’ina botutuma bonoki’nd’okodyaka, Elode aoyolots’endamene bisenda bina lifoka, ko aokisase en’ieko ina lifoka, ko amalokwela boloko.

²²Ko bato baololua, Mbo lofoso lona Yakomba nde loho, afa lofoso lon’oto!

²³Isasanga ekima ena Yawe amofoma, lacin’ende atafa Yakomba lokumo; ko ende aolama la nkiso, ko aowa.

²⁴Koko yoi lina Yakomba yolinda nko ndinda, ko yofula nko mpula.

²⁵Koko Balunaba la Saula, enek’iy’okadyaka ekambelo eniyo, bauma ena Yelusalema lakina, ko baotola l’iyo Yoane onoyali l’osatu’oka Malako.