Read ngando Bikambwa Biniki Bikima 13 Bible Online

Bikambwa Biniki Bikima 13 - ngando bible

Bikambwa Biniki Bikima 13

¹Koko bato’amoi, basumoli l’alaki, bayaaki en’e kelesia ena Antiokia, nko Balunaba, la Simona onotangama Nigela, la Lukia ona Kulene, la Manae onok’iy’oololaka la Elode lifoka, la Saula.

²Enek’iy’okambelaka Nkolo ko baokila toma, Bolimo bon’olotsi aila, ate, Bombekedya Balunaba la Saula lacin’en’ekambwa eneki’m’aelelaka.

³Nkwaho, enek’iy’okilaka toma, ko baonda, baotadya bakasa eneyal’iyo ko bamatoma.

⁴Koko iyo, enek’iy’otomamaka la Bolimo bon’olotsi, baokita ena Seleukia; meho baosemwa, ko baocoa Kupulio.

⁵Enek’iy’oyelaka ena Salamia, baosekodya yoi lina Yakomba ena basunagoga bana Ba-Yuda; ko Yoane ayaaki l’iyo yoka bokambi’oniyo.

⁶Enek’iy’otianyaka ekolo ehatu, baoyela Mpafo, ko baosungya meho boloki’omoi, bosumoli’ona mpoci, bise Yuda, onotangama Balayesu,

⁷onoyaaki eneka gouverneur, Selungio Paulo, boto’ona bomwu. Ende aelela Balunaba la Saula eneyal’ende, ko aolanga lacina alofe yoi lina Yakomba.

⁸Ohonde Eluma nkanga eho (liko nko lina linande limoi) amafekya, aofona lacina akengole gouverneur, atongoyimedya imeedyo iho.

⁹Koko Saula, onotangama Paulo nkoho, aolola la Bolimo bon’olotsi, amolenda ta,

¹⁰ko aila, ate, E onolola la longo ko l’owe bohotu, e bon’ona Satana, e bookyi’owe bon’aoyi bana mbongi bahatu, ofaledya nde litatengya mboka ina Yakomba ina cilili?

¹¹Koko isanga, lenda, likasa lina Nkolo liyali nk’eneyal’e, ko ongoyala nk’eyok’onody’aiso, ko ofayene bina elela. Isasanga loonge la liucu bamokwela, ko aotengatenga, aokemb’oto onomosuka la likasa.

¹²Koko eneki gouverneur oenaka yoi linilamaki, aimedya, ko aofefa la lilako lina Nkolo.

¹³Paulo l’ifili’inande baosemwa ena Mpafo, ko baoyela ena Pelunga, en’onyanga bona Pampulia; ko Yoane aokambwana l’iyo ko autwa la mbusa ena Yelusalema.

¹⁴Koko enek’iy’ofolanyaka ena Pelunga, baoyela Antiokia, ecimo emoi ena Pisindia; baotua ena sunagoga en’ina bona Sabata, ko baokisase.

¹⁵Ko ena mbusa en’eandelo en’ekanda ben’asangya la ben’asumoli, chefs ina sunagoga bamatomela yoi, iy’ate, Bifili, yombo yoi limoi lineyakiky’ato liyali eneyal’ino, botosumole liho.

¹⁶Paulo aemala, amaelela la likasa, ko aila, ate, Ino bato bana Yisalaele, ko l’in’ananga Yakomba, bolof’aoyi’ane:

¹⁷Yakomba en’ato’ane bana Yisalaele asonaki bafango’aniso, ko akumyaki bato’aho kuma bayali ena litonga lina Ejipeto, ko amaumola en’onyang’oho nko la lo lona locili.

¹⁸Ko aitedyaki beko tu’eniyo ena sengelenge mbula ntuk’inei;

¹⁹ko eneki’nd’oehyaka bato bana benyanga nsambo ena Kanana, amakafela benyang’eniyo yoka lisango, mbula bekam’enei la ntuk’itano.

²⁰Ena mbus’eho amafa juges, yengoko esike ena Samwele, bosumoli.

²¹Koko lakina ena mbus’eho baufola lacina baate lifoka lina roi, ko Yakomba amafa Saula, bon’ona Kisi, on’oloi bona Benyamina; ende aoyalama lifoka liniyo mbula ntuk’inei.

²²Eneki’nd’oumolak’ende, aemadya Dawidi lacin’eho ayalame lifoka lina roi; ko aila yoi lacin’enande, ate, Mena Dawidi, bon’ona Yisai, boto oneyali yoka bosamb’onalanga botem’onamamene; ende angila eango enami ehatu.

²³Yakomba ameemaedya Ba-Yisalaele Boiki’oka Yesu nk’eneyali bana ban’oto’one, yok’onoki esemba enande oyalaka.

²⁴Kum’ende ataye, Yoane aolaka lilako lin’inelo en’eumbelo en’aoyi’owe eneyali bato bahatu bana Yisalaele.

²⁵Eneki Yoane okambaka ekambwa enande, aila, ate, Bontang’emi nai? Ei mpayali Ende tu; ohonde, lenda, omoi ayayi ena mbusa enami, ko emi mpakoli lacina nditole bekoli bena nkofo inande.

²⁶Bifili, ban’ana ecimo ena Abalayama, l’amoi’anino bananga Yakomba, yoi lina liiko lone limotomama eneyal’iso.

²⁷Iy’anatonga ena Yelusalema la bato’aniyo bana lifoka, enetey’iyo Ende ko enetey’iyo baoyi ban’asumoli banandama bina l’ina en’okolo bona Sabata, bamoyedya nko baoyi’aho, lacin’oka bamolokoiya likambo.

²⁸Kang’iyo batena ncina en’ewedi eneyal’ende, baufola Pilato lacina ayakame.

²⁹Ko enek’iy’okadyaka baoyi bahatu banatengamaki’ale lacin’enande, bamokitsa en’ote, ko bamoambya ena nketa.

³⁰Ohonde Yakomba ameetol’ende enek’anawaki;

³¹ko aenya bina bike eneyal’iyo banacikaki Ngalilaya ko bayaki ena Yelusalema l’ende, ko iyo bayali temoins inande isanga eneyali bato.

³²Ko iso tokosumol’ino bosimo bon’olotsi bon’esemba eneki bafango’aniso osembyamaka:

³³noka, Yakomba amosila likamba esemba eno eneyal’iso ban’aniyo, eneki’nd’oetolaka Yesu enek’anawaki; yok’onoki yoi otengamaka ena Lembo lon’ife, ate, E onde Bon’onami, mokoot’e bon’in’one.

³⁴Ko ena yoi liho lika amomeetola en’ewedi ko afayene botuku, amotenda yok’osamb’one, ate, Nongokof’ino besako bena nsakama la bena locela beneki Dawidi.

³⁵Lacin’oka atendaki ena Lembo lomoi, ate, Ofalekyaki One on’oeka lacina aene botuku tutu.

³⁶Lacina Dawidi, eneki’nd’okadyaka yila eango ena Yakomba en’eotwelo enande, aetama, ko aokunjama l’afango’anande, ko amen’otuku;

³⁷ohonde ende onoki Yakomba oetolaka en’ewedi, Ende aten’otuku tutu.

³⁸Lacin’eho, bifili, ekoli lacin’ino bey’oka la boto’one etungwelo en’aoyi’owe eosumolama eneyal’ino;

³⁹koko boto l’oto onomimedya, ayengwa l’ende boyengo en’aoyi bahatu banatakolan’ende liyengolama la basangya bana Mose’ale.

⁴⁰Lacin’eho, boongya lilenda, lacina yoi liho linalitengamaki l’asumoli litonoyilama eneyal’ino, ate,

⁴¹Bolendaka, ino batemboli, bofefaka, ko behaka; Lacin’emi njakambe ekambwa en’isik’inino, Kanga boto akosumol’ino, bofimedyaki ekambwa eho tutu.

⁴²Ko enem’iy’ofola ena sunagoga, baonda Paulo la Balunaba lacina baoyi’ane basumolame eneyal’iyo ena Sabata enoya.

⁴³Ko eneki bosolongano bona sunagoga ofandafandaka, Ba-Yuda bike la Befenda bemoi banafudwaki Ba-Yuda, bakumi bana Yakomba, baokiela Paulo la Balunaba; ko iyo baotenda l’iyo, ko bamasomya lacin’eho baoyaela en’isei ina Yakomba nko njalama.

⁴⁴Koko ena Sabata ena mbusa, yoka bato bahatu ban’onyang’oho baosolongana lacin’eho balofe yoi lina Yakomba.

⁴⁵Ohonde eneki Ba-Yuda oenaka bato’aho bik’ike, baok’ekuku, ko baata baoyi banaki Paulo otendaka ntango mene, ko bamosaiya besao mene.

⁴⁶Koko Paulo la Balunaba baotenda la locili, iy’ate, Yoi limokolana l’iso lacina tokosumol’ino yoi lina Yakomba en’oso; ohonde enakil’ino liho, ko boyokody’oka bofakoli la liiko lonelofakale, lenda, tohelengwa eneyali Befenda;

⁴⁷lacin’oka Nkolo aototomaka yok’osamb’oho, ate, Mokiil’e lacina oyalame fololo en’efenda, Oyalame eikedyo eneyali bato bahatu, yengoko nsimbo mene ina loko.

⁴⁸Eneki Befenda ookaka yoi line, baonyangela, ko baokumya yoi lina Yakomba; ko iyatu banakodyama lacin’ena liiko lonelofakale baimedya.

⁴⁹Ko yoi lina Yakomba yosekola en’onyang’oho bohotu.

⁵⁰Koko Ba-Yuda baosombanya bayato’amoi, bakumi bana Yakomba la bayato bana lifoka, ko la bingambe bin’onyang’oho, lacin’eho banyome Paulo la Balunaba, ko bamaitanya en’enyang’eniyo.

⁵¹Koko iyo baotitola lofucifuci lona bakak’aniye eneyali bato’aho, ko baoya ena Ikonio.

⁵²Ko bakili baolola l’enyanga ko la Bolimo bon’olotsi.