Read ngando Bikambwa Biniki Bikima 14 Bible Online

Bikambwa Biniki Bikima 14 - ngando bible

Bikambwa Biniki Bikima 14

¹Kuma bayali ena Ikonio, bikima batuaki ena sunagoga ena Ba-Yuda laanda, ko baolak’ato; koko la lilako liniyo bik’ike bona Ba-Yuda la Ba-Elene baimedya.

²Koko Ba-Yuda banatimedya tutu baosombanya Befenda, ko baookela nkanyi inay’owe en’etem’eniyo lacin’eho baoke bakili bowe.

³Lacin’eho, iyo baokinda meho elela mene, ko baolaka bato efan’ofolu nko la locili lona Nkolo, ko Nkolo aenyanya yoi lin’isei inande, eneki’nd’oimedyak’oka ndembi la bikambwa bina mpefa bikambame l’akas’aniyo.

⁴Koko bato’aho ban’onyang’oho baokambwana beloi: bamoi baambana la Ba-Yuda, koko bakina baambana la bikima.

⁵Koko eneki Befenda la Ba-Yuda la bafok’aniyo oangaka eango lacin’eho bailel’iyo bokotua bona nsoi mene, ko bafusele baufe,

⁶baofokotola yoi liho, ko baolota en’enyanga bena Lukaonia, nko Lusetula la Delube, ko l’enyanga benoli l’eho;

⁷ko baosekodya bosimo bon’olotsi meho.

⁸Boto’omoi akisak’ase ena Lusetula, onindaki locili en’akak’anande, onoyaaki etumbe nk’en’otema bona nyango enande, tu atakenda.

⁹Boto one aoka kuma Paulo ayatende; ko Paulo amolenda ta, ko ameen’oka ayali l’imeedyo lacin’eho aike,

¹⁰ko amosumola la lofoso lona lokolo, ate, Emala en’akak’ane cilili. Ende aosola bendembi ko aokenda en’akaka.

¹¹Koko eneki bato’aho bik’ike oenaka ekambwa eneki Paulo okambaka, baololua ena lofoso lona Lukaonia, Mbo yakomba imokita eneyal’iso yoka bat’ola.

¹²Ko baotanga Balunaba Zeu, ko baotanga Paulo Eleme, lacin’oka ayaaki Bosumoli bon’oso.

¹³Ko nkanga ena Zeu onoyaaki la mesa enande ena mbeka en’oso bon’onyanga, aoya la ngombo ko l’efusi en’efolo ben’onyanga, ko ende l’ato’aho bik’ike basokolanga lacina balekya mbeka.

¹⁴Koko eneki bikima, Balunaba la Paulo ookaka yoi liho, baokambola bisenda, ko baocoa la laango ena ntoto en’ato’aho, iy’ate,

¹⁵Bifili, ino bila baoyi’ane ncina eka nai? Iso toyali nko bato nkoho, ko toyali l’okotua yoka bosamb’onoyal’ino; toyakosumol’ino bosimo bon’olotsi, lacin’eho bumbele baoyi’ane bana bototoloto, ko bohalingwa eneyali Yakomba eneyaike, ononunolaki loola la loko ko la lose l’okwa, ko la toma tohatotu tonatoyali meho;

¹⁶onimedyaki’ale bato bana biotwelo bin’alale bacu mboka iniyoamene;

¹⁷ohonde atayocik’endamene efana temoin, lacin’Ende aokamba bolotsi: akof’ino mbula ena loola ko la bauma banaseki’emamo bike, ko aokinza betem’enino la toma ko l’ekiko.

¹⁸Kanga baotenda baoyi’ane, baenak’ino mene lacina bafekya bato, batonolekya mbeka eneyal’iyo.

¹⁹Koko Ba-Yuda bamoi baoya ena Antiokia l’ena Ikonio; ko enek’iy’osombanyaka bato’aho bik’ike, baofusela Paulo baufe, ko bamosuma ena mbiolo en’onyanga, enek’iy’okanelak’oka amosila liwa.

²⁰Ohonde eneki bakili olingamelaka, ende aemala, ko aotua en’onyanga; ko en’ina bona loi ende la Balunaba baocoa Delube.

²¹Ko enek’iy’osumolaka bato ban’onyang’oho bosimo bon’olotsi, ko baata bakili bike mene, bautwa la mbura ena Lusetula la Ikonio, ko l’ena Antiokia.

²²Ko baokiky’etema ben’akili, ko bamasomya lacin’eho bayalame en’imeedyo iho nko njalama, ko bamasumol’oka tongotua ena lifoka lina Yakomba nko la bino bike.

²³Ko enek’iy’osonaka bingambe ena bikelesia bihitu, ko baonda la nkila ena toma, bamacika eneyali Nkolo, nk’ende onok’iy’oimedyaka.

²⁴Ko baotianya Pisindia, ko baoyela ena Pampulia.

²⁵Ko enek’iy’olakaka yoi ena Pelunga, baokita ena Atalia.

²⁶Meho baosemwa, baocoa Antiokia, nko bili bonok’iy’olekyamaka eneyali isei ina Yakomba lacin’ena ekambwa enek’iy’okadyaka.

²⁷Enek’iy’oyelaka, ko baosolonganya ekelesia ehatu, bamalokwela baoyi bahatu banaki Yakomba okambaka l’iyo, ko l’okotua bonoki’nd’okombwelaka Befenda lokombo lon’imeedyo.

²⁸Ko baokinda elela mene nkisase l’akili.