Read ngando Bikambwa Biniki Bikima 15 Bible Online

Bikambwa Biniki Bikima 15 - ngando bible

Bikambwa Biniki Bikima 15

¹Ko bato’amoi banayaki ena Yelusalema baolaka bifili, Mbo nk’ino bofakesama yonge yoka bosamb’onoyali boeka bona Mose, bofikyamisa tu.

²Paulo la Balunaba baatana l’ato’aho ntango bik’ike, ko baoswela baoyi l’iyo; nkwaho bakili baosona Paulo la Balunaba ko l’amoi’aniyo, lacin’eho bacu Yelusalema eneyali Bikima la bingambe ena yoi line.

³Baise ekelesia bamacindedya ena mboka, ko iyo baotianya Poinike la Samalia, baosumol’ato bokotua bonoki Befenda oumbelaka baoyi’owe, ko baokikya bifili bihitu ekiko bike mene.

⁴Ko enek’iy’oyelaka Yelusalema, baise ekelesia la bikima la bingambe bamasangela, ko iyo baolokola baoyi bahatu banaki Yakomba okambaka l’iyo.

⁵Koko bamoi banimedyaki bana boloi bona Bafalusi baemala, iy’ate, Ekoli lacin’iyo bakesame yonge, ko balakame lacin’eho bamonya basangya bana Mose.

⁶Bikima la bingambe baosolongana lacina basisole yoi liho.

⁷Koko enek’iy’oatanaka ntango bike, Petelo aemala, ate, Bifili, ino bey’oka Yakomba ansonak’emi’ale eneya l’ino, lacin’eho Befenda baoke bosimo bon’olotsi l’onyua’onami, ko baimedya.

⁸Ko Yakomba, oneya betema, amaimedya la ndembi, eneki’nd’oafaka Bolimo bon’olotsi, nk’eyok’onoki’nd’otofak’isoamene;

⁹ko atatocikitany’iso l’iyo, lacin’oka asongaki betem’eniyo l’imeedyo.

¹⁰Iya, isanga ino bomeka Yakomba lacina nai? enil’ino bolito ena nkingo en’akili, bolito bonotinya bafango’aniso, l’isoamene totinya?

¹¹Ohonde iso timedy’oka l’iso l’iyo tongika nko l’okotua’omoko, nko l’isei ina Nkolo Yesu.

¹²Koko bakili’aho bahatu baoyala nko mwi; ko baolofamela eneki Balunaba la Paulo otendaka, ene k’iy’oasumolaka ndembi la bikambwa bina mpefa biniki Yakomba okambaka l’iyo en’enyanga bena Befenda.

¹³Koko enek’iy’okadyaka litenda, Yakobo aokutola, ate, Bifili bondofe:

¹⁴Simeona amotosumola bokotua bonoki Yakomba olendanaka la Befenda en’oso l’oso, lacin’eho asonole eneyal’iyo boloi bon’ato bonongotangama la lina linande.

¹⁵Ko baoyi banaki basumoli otendak’ale bakolana nko la yoi liho, lacina yoi limotengama,

¹⁶Ena mbusa en’aoyi’ane nonguta la mbusa, Ko nongit’ofaka lakina botumba bona Dawidi bonokwaki, Ko nongofaka lakina botumb’oho bonowaki; Ko nongemadya boho lakina.

¹⁷Lacin’eho bato banaciki bakembe Yawe, Ko la Befenda behetu, banatangama la lina linami.

¹⁸Yawe onenyanya baoyi’ane nk’en’alale amotenda baoyi’ane.

¹⁹Lacin’eho, yoi linakanel’emi lika likoli liho line: tofanyome Befenda beho banahalingwa eneyali Yakomba;

²⁰ohonde tatengel’iyo bokanda lacin’eho bakile nsefo ina baidola, la likele, la nyama inikomamaki, ko l’akila.

²¹Lacin’oka l’en’alale Mose ayali l’alaki’anande en’enyanga behetu, ko baandeela bekand’enande ena basunagoga bina l’ina en’ina bona Sabata.

²²Nkwaho bikima la bingambe la baise ekelesia bahatu baokanela bolotsi lacina basone bato’amoi’aniyo, ko batom’iyo ena Antiokia la Paulo ko la Balunaba; ko baosona Yuda onotangama Balusaba, la Sila, bato bana lokumo eneyali bifili.

²³Ko baotenga bokanda bonocoa l’iyo yok’one: Bikima la bingambe la bifili, eneyali bifili bina Befenda biniyali ena Antiokia l’ena Sulia l’ena Kilikia, tokees’ino.

²⁴Tomok’oka bato’amoi bamofola eneyal’iso, ko bamocoa oyokolidy’ino l’aoyi bana ntenda, ko bamotatengya betem’enino. Iso totatom’iyo tu.

²⁵La ncina eho, enek’is’oyalamaka la lokanyi lomoko, tomokanela bolotsi lacina tosone bato, ko tatom’iyo eneyal’ino la Balunaba la Paulo banalangama l’iso,

²⁶banolamaki l’ewedi mene lacin’ena lina lina Nkolo eniso Yesu Masiya.

²⁷Lacin’eho, tomotoma Yuda la Sila, ko iyoamene bangokosumol’ino nko baoyi’ane l’onyua.

²⁸Lacin’oka Bolimo bon’olotsi aokanela bolotsi, ko l’iso nkoho, lacina tofatadya bolito’omoi eneyal’ino, umola nko baoyi’ane banakoli;

²⁹nko lacina bokile nyama inilekedyama baidola, la bakila, la nyama inikomamaki, ko la likele. Nko bongokila baoyi’aho, tumbe bongonga nk’olotsi. Bocikalaka la locili.

³⁰Enek’iy’otomamaka, baocoa Antiokia, ko enek’iy’osusanyaka bike bon’akili bahatu, bamasukya bokanda.

³¹Ko iyo, enek’iy’oandaka boho, baonyangela baoyi’aho bana ncicimodya.

³²Ko Yuda la Sila, banayaaki iyoamene nko basumoli, baolaka bifili l’aoyi bike, ko bamakikya.

³³Baokinda meho liputa, koko lakina bifili bamatoma la bosako bona mwi, lacin’eho bautwa la mbusa eneyal’iy’anatomaki.

³⁴(Ohonde Sila aokanel’olotsi acikale meho isisali.)

³⁵Koko Paulo la Balunaba baocikala ena Antiokia, baolaka ko baosekodya bosimo bon’olotsi bona yoi lina Nkolo, iyo l’ato’amoi bike nkoho.

³⁶Ena mbusa ena bina bemoi Paulo aosumola Balunaba, ate, Akoli lacina tutwa, toyengya bifili en’enyanga l’enyanga benek’is’osumolak’ato yoi lina Nkolo, toyaene bokotua bonoyal’iyo.

³⁷Ko Balunaba asokolanga lacina batole l’iyo Yaone onoyali l’osatu’oka Malako.

³⁸Ohonde Paulo atakanel’olotsi batol’ende onaumbelaki’ale ena Pampulia, ko ataco’ale l’iyo en’ekambwa.

³⁹Lacin’eho, baosa lisa, ko baokambwana lacin’ena lisa liho, ko Balunaba aotola Malako l’ende, aosemwa ko aocoa Kupulio.

⁴⁰Ohonde Paulo aosona Sila, ko aocoa, eneki bifili oalekyaka eneyali isei ina Nkolo.

⁴¹Aotianya Sulia la Kilikia, ko aokikya bikelesia.