Read ngando Bikambwa Biniki Bikima 16 Bible Online

Bikambwa Biniki Bikima 16 - ngando bible

Bikambwa Biniki Bikima 16

¹Ko aoya ena Delube la Lusetula. Ko lenda, bokili’omoi ayaaki meho onotangama Timoteo, nyango enande bise Yuda onimedyaki, koko bafango’onande nko bise Elene.

²Bokili’oho ayaaki la lokumo lon’olotsi eneka bifili banayaaki ena Lusetula l’ena Ikonio.

³Paulo aolanga lacin’eho acu l’ende; amotamba, ko amokesela yonge, nko lacin’ena Ba-Yuda banayaaki en’enyang’eho, lacina iyatu baeyaki oka bafango’onande ayaaki bise Elene.

⁴Enem’iy’otianya benyanga, bamasukya beeka beneki bikima la bingambe bina Yelusalema oaekedyaka, lacina bamonya beho.

⁵Nkwaho bikelesia biocila en’imeedyo, ko botuy’oniyo bosokwa bina l’ina.

⁶Baotianya benyanga bena Fulungia la Ngalatia, nko lacin’eneki Bolimo bon’olotsi oafekyaka batalakake yoi ena Asia;

⁷ko enek’iy’olamaka la Musia, basokolanga lacina bacu Bitunia, koko Bolimo bona Yesu atimedya;

⁸baolekanya Musia, ko baokita ena Tuloa.

⁹Koko l’oco Paulo aena enelo: en’enelo eho boto ona Makedonia aemali, ko ameelela, ate, Yaka ena Makedonia, oyotokambya.

¹⁰Eneki’nd’oenaka enelo eho, isasanga tofona etelo lacin’eho tocu ena Makedonia, lacin’oka tokanelak’is’ate, Nkolo amoteelela lacin’eho toyasumol’iyo bosimo bon’olotsi.

¹¹Lacin’eho, tosemwa ena Tuloa, teta ena Samotulake nko cilili, ko en’ina bona loi toyela ena Neapoli.

¹²Njuma meho tocoa Filipoi, ecimo en’oso mene en’onyanga bona Makedonia, litonga lina Ba-Loma. Koko tokisase en’onyang’oho bina bemoi.

¹³Ko en’ina bona Sabata tofola ena mbiolo en’ofolo bon’onyanga, tocoa en’oseleka bona lose, lacina enek’is’okanelak’oka edye ena boondo eyali meho; tokisase, ko totenda l’ayato banasusanyi.

¹⁴K’o boyoto’omoi onotangama Ludia, bosombi bona bisenda bina pourpre, bise Twatila onokumyaki Yakomba, aoka baoyi’aniso, ko Yakomba aokombola botem’onande lacin’eho alofamele baoyi banaki Paulo otendaka.

¹⁵Koko eneki’nd’oinamaka en’asi, l’ende l’iy’anayaaki en’otumb’onande, aotoonda, ate, Yombo bonkodya nd’oka njali l’imeedyo eneyali Nkolo, boyaka en’otumb’onami, boyale nko meho. Ko aotosomya.

¹⁶Koko enem’is’ocu en’edye en’oondo, boyoto’omoi onoyaaki la lifoi lina Putono, onatelaki banyangetuke banande nkita bike l’aoyi ban’okanga, aukana l’iso.

¹⁷Ende aokilana la Paulo ko l’iso, kuma ayalolua, ate, Bato’ane bayali baombo bana Yakomba Eneleki nko Ndeka, banakotum’ino mboka ena liiko.

¹⁸Aila yok’oho bina bike. Koko Paulo aohelengwa, eneki’nd’olembaka la yoi liho, ko aosumola lifoi, ate, Lakosumol’e ena lina lina Yesu Masiya, fola eneyal’ende! Ko lifoi yofola nkwaho.

¹⁹Koko eneki banyangetuke’anande oenak’oka eatelo ena nkita eniyo emuma, baunda Paulo la Sila, ko bamasuma en’edye ena limbongo en’oso bon’afoka;

²⁰ko enek’iy’oyaka l’iyo eneyali batenji ban’akambo, baila, iy’ate, Bato’ane, baise Yuda, baseki lilidya bonyang’oniso nko ndidya mene;

²¹ko bayalake bato beeka benefakolana l’iso baise Loma lacina totambe.

²²Koko bik’ike bon’ato bemala eneyal’iyo nkwaho, ko bamaakola. Nkwaho batenji baotoma lacina bakumolame bisenda biniyo, ko bafomame lofomi

²³Koko enek’iy’oafomaka bembambo bike, bamafusa en’otumba bon’enyolo, ko baosumola botombanyi lacin’eho atombanya nko ntombanya mene.

²⁴Ko ende, eneki’nd’otomamaka lotomo loho, amaokela en’etenyi en’otumba bon’enyolo eneyaaki ena ntundulu mene, ko aila bakak’aniyo ena bifoke.

²⁵Koko yok’esike ena kelekele mene en’oco, kuma Paulo la Sila bayaonde ko bayembele Yakomba njembo, ko basungu’amoi bayalofe,

²⁶kaimo loko lolilaki nko ndila, elilelo ena locili mene enelidyaki nko biango mene bin’otumba bon’enyolo; ko isasanga nkombo ihatu yokombwa, ko benyolo ben’iyatu beokwa.

²⁷Botombanyi aetwa en’ilo, ko eneki’nd’oenaka nkombo ina botumba bon’enyolo ihatu nko nkombwa, aosomola lokula lon’ita, ko asokolanga lacina ayoyak’endamene, eneki’nd’okanelak’oka basungu bamolota.

²⁸Ohonde Paulo aololua, Mbo tayoilelak’eamene yoi tu; lacin’isatu toyali nko mendo.

²⁹Aelela mwinda, ko aotua la mbango ena ntundulu, ko aokwa nko mbilima la losomo en’oso bona Paulo la Sila.

³⁰Amafodya, ko aila, ate, Bifili, njil’oya lacina mbike?

³¹Koko iyo Mbo, imedya Nkolo Yesu ko ongika, l’e l’ecimo ene.

³²Ko bamosumola yoi lina Nkolo, l’ende l’ato bahatu banayaaki en’otumb’onande.

³³Ko amatamba, nk’ena heure eho en’o co, ko amasonga mpota; ko ainama nkwaho, ende l’omboi’onande bohotu.

³⁴Amatoya en’otumb’onande, ko amaambedya toma, ko aonyangela enyanga bike mene, l’ende l’omboi’onande, eneki’nd’oimedyaka Yakomba.

³⁵Eneki bina okyaka, batenji ban’akambo baotoma police, iy’ate, Tungola bato’aho.

³⁶Ko botombanyi bon’otumba bon’enyolo aosumola Paulo baoyi’aho, ate, Batenji bamotom’onyua lacin’ino botungolame; lacin’eho, bofola isanga, bocoaka la mwi.

³⁷Koko Paulo amalokwela, ate, Bamotofom’iso bato bana Loma nk’en’oso bon’ato, iso banatakoiyama likambo tu, ko bamotofusa en’otumba bon’enyolo; koko lakina bangotofodya nde la lokuko? Efana! Nde bayake nk’iyoamene, batofodyake nk’iyoamene.

³⁸Ko police baosumola batenji ban’akambo baoyi’ane; ko enek’iy’ookak’oka bayali Baise Loma, iyo baoka losomo;

³⁹ko baoya, ko bamaonda, ko enek’iy’oafodyaka, bamaufola lacina baume en’onyang’oho.

⁴⁰Koko iyo baofola en’otumba bon’enyolo, ko baotua en’otumba bona Ludia; ko enek’iy’oenaka bifili, bamacicimodya en’etema, ko baocoa.