Read ngando Bikambwa Biniki Bikima 17 Bible Online

Bikambwa Biniki Bikima 17 - ngando bible

Bikambwa Biniki Bikima 17

¹Enek’iy’otianyaka Ampipoli la Apolonia, baoya ena Tesalonike, ko sunagoga ena Ba-Yuda eyaaki meho.

²Koko Paulo aotua eneyal’iyo, yoka bosamb’onoyali bokotu’onande bina l’ina, ko Sabata isaso amalaka ena Bitengelo bina Yakomba,

³amafoladya, ko amatum’oka yoi likoli lacina Masiya aene bino bin’efafo, ko aetwa lakina en’ewedi; ko aila, ate, Yesu one onakumy’emi ena bosimo bonakosumol’emi, ende ayali nko Masiya mene.

⁴Ko bamoi’aniyo baimedya, ko baambana la Paulo ko la Sila, nko bik’ike bona Ba-Elene banakumyaki Yakomba, la bike bon’ayato bana lifoka nkoho.

⁵Ohonde Ba-Yuda baoka ekuku, baotamba eneyal’iyoamene bato’amoi ban’owe l’ana mponya, ko bamasolonganya bik’ike, ko baotom’etomoko mene en’onyanga. Baotol’ita en’otumba bona Yasona, basokolanga lacina baofody’iyo eneyali bato.

⁶Koko enetaen’iyo, baosuma Yasona ko l’ifili bimoi en’oso bon’afoka ban’onyang’oho, ko baololua, Mbo bato’ane banafunzafunz’aoyi ena loko lohalotu bamoya mendo nkoho;

⁷ko Yasona amolasangela. Bane bahatu baofulunganya beeka bena Kaisala, iyo Mbo lifoka likina lina roi ayali, nko Yesu.

⁸Koko eneki bato’aho bik’ike la bafoka ban’onyanga ookaka baoyi’ane, baokandakanda bike en’etema.

⁹Ko enek’iy’otambaka yoka mbandwa eneyali Yasona ko l’amoi, bamatungola.

¹⁰Isasanga bifili baotoma Paulo la Sila l’oco ena Beloya. Ko enek’iy’oyelaka meho, baotua ena sunagoga ena Ba-Yuda.

¹¹Ko Ba-Yuda bane baleki baho bana Tesalonike bolotsi, lacin’oka baotamba yoi la mposa mene, ko baosisola Bitengelo bina Yakomba bina l’ina, yombo baoyi’ane bayali nko solosolo.

¹²Lacin’eho, bike’oniyo baimedya; ko bayato bike bana Elene bana lokumo baimedya, iyo la mpame nkoho.

¹³Ko eneki Ba-Yuda bana Tesalonike oeyak’oka yoi lina Yakomba liyasumolame la Paulo ena Beloya, iyo baoya meho nkoho, ko baotokola bato bik’ike.

¹⁴Koko isasanga bifili baotoma Paulo lacina acu osimba ena lose l’okwa; koko Sila la Timoteo baocikala nko meho.

¹⁵Iy’anacindedyaki Paulo ena mboka bamoyedya ena Atenia. Ko eneki Paulo otomelaka Sila la Timoteo yoi l’iyo, bayake eneyal’ende yaya, iyo baocoa.

¹⁶Eneki Paulo oalengedyaka ena Atenia, bolimo’onande bokaimwa eneki’nd’oenak’oka bonyanga bohotu bolola la baidola.

¹⁷Lacin’eho, aotendana bina l’ina la Ba-Yuda ko l’akumi bana Yakomba ena sunagoga, ko l’en’edye ena limbongo aotendana bina l’ina l’iyo banaki’nd’osungyaka meho.

¹⁸Ko bato’amoi bana bomwu, Ba-Epikulo la Ba-Setoa, baukana l’ende. Ko bamoi’aniyo Mbo, mpe ene atenda botendatenda lanai? Bakina, Mbo ende ayali yoka bosumoli bona bademona ban’efenda. Baila yok’osamb’oho lacina eneki’nd’osekodyaka bosimo bon’olotsi bona Yesu ko l’eetwelo ena banawaki.

¹⁹Bamotamba, ko baoya l’ende ena Aleopango, iy’ate, Otosumole lilako line lina litoto linalak’e.

²⁰Lacin’oka baoyi’aho banatoyel’e bafanongana en’atoi’aniso. Tolanga lacina tononganya ncina en’aoyi’ane.

²¹Lacin’oka baise Atenia la befenda banakisak’ase’ale meho batakamb’ale yoi limoi, yengoko basumolana yoi lina litoto, yombo balofa yoi lina litoto.

²²Ko Paulo aemala ena ntoto ena Aleopango, aila, ate, Ino bato bana Atenia, emi len’oka ino boseki mposa en’ekumedyo en’aoyi bahatu.

²³Eneki’m’oetaka ko losisola bikambwa binino binakumy’ino, lenaka mesa emoi ena mbeka l’etengelo ene: “Eneyali yakomba enefeyana.” Ende onakumy’ino la biinda bona njeya, emi lakosumol’ino nko bosimo’onande.

²⁴Yakomba ononunolaki loko ko l’ikambwa bihitu biniyali meho, Ende onoyali Nkolo ena loola l’ena loko, afatonge en’etumba benefakama l’akasa;

²⁵ko afakambelama lakasa ban’ato, yok’onind’iyema, lacin’oka endamene afeela bato bahatu liiko, ko la lofofe ko la toma tohatotu.

²⁶Ko anunolaki bato bahatu nk’eneyali boto’omoko, lacin’eho batonge ena loko lohalotu, ko akodyaki bauma baniyo, ko la ndelo ina batong’aniyo;

²⁷lacina bafone Yakomba, yombo basokoyel’eneyali ende la ntatenga; kang’ende afan’osana l’isatu.

²⁸Lacin’iso toyaike, ko toyakende, ko toyalama njalama nk’eneyal’ende; nk’eyok’onoki batengi’amoi’anino bana njembo oilaka: Lacin’iso toyali ban’anande.

²⁹Iso toyali ban’ana Yakomba, ko lacin’eho, totakanelake’oka Yakomba akolana la wolo, la argent, la baufe, banasengama la bomwu ko la lokanyi lon’ato.

³⁰Ena bisike biho biniteya bato Yakomba, endamene aosodya baoyi’owe’aniyo baiso; ohonde isanga aosumola bato bahatu en’enyanga behetu baumbele baoyi’owe;

³¹lacin’oka amosila lisona bina bonongi’nd’otendela bato bana loko bakambo l’okotua bona mbongi nko l’oto onoki’nd’osonaka; ko ena yoi liho amofa bato bahatu ndembi ntutuma, eneki’nd’oetolaka Yesu enek’anawaki.

³²Enek’iy’ookaka yoi liho lika eetwelo ena banawaki, bamoi baoseka tolo; ohonde bakina, Mbo tongokolofa lakina ena yoi line.

³³Yok’oho Paulo auma eneyal’iyo.

³⁴Koko bato’amoi baambana l’ende mbambana, ko baimedya; bamoi’aniyo nko Dionusio ona Aleopango, l’oyoto onotangama Damali, ko la bamoi nkoho.