Read ngando Bikambwa Biniki Bikima 20 Bible Online

Bikambwa Biniki Bikima 20 - ngando bible

Bikambwa Biniki Bikima 20

¹Eneki etomoko okalaka, Paulo aelela bakili, amakikya la boseso, ko auma, aocoa Makedonia.

²Ko eneki’nd’otianyaka benyang’eho, amakikya l’aoyi bike, ko aoya ena Elene.

³Aoyala meho nsenza isaso; koko eneki’nd’osokosemwa lacin’eho acu Sulia, Ba-Yuda bamoangela eango en’owe, ko ende aoyalama la lisangya lacina autwa la mboka ena Makedonia.

⁴Bamoi bamocindedya ena Asia, nko Sopatulo ona Beloya, bon’ona Pulo, ko l’amoi bana Tesalonike, noka Alisita luko la Sekundo, ko la Ngayo ona Delube, la Timoteo, ko l’amoi bana Asia, nko Tukiko la Tulofimo.

⁵Bane baocoa en’oso, koko baotoonda ena Tuloa.

⁶Iso tosemwa ena Filipoi ena mbusa en’ina bena mampa enefana nyango, ko tomasungy’iyo ena Tuloa en’ina bon’etano; ko toyala meho bekolo nsambo.

⁷En’ina bon’oso bon’eyenga, enek’is’osolonganaka ena Mesa ena Nkolo, Paulo amalaka, eneki’nd’oilak’oka acu loi; ko aokusa lilaka ndaka yengoko esike ena kelekele en’oco mene.

⁸Ko mwinda iyaaki bike en’etenyi ena liko en’otumba enek’is’osolonganaka.

⁹Ko bofeng’omoi onotangama Eutuko aokisase en’ofolo bona fenêtre, ko aowa l’ilo mene; ko eneki Paulo ofudyaka lilako botale mene, bofeng’oho aonyonga l’ilo, ko aokwa liko en’etenyi eho en’isaso ena liko, ko bamoambola kum’aosilwa.

¹⁰Ohonde Paulo aokita, amokwela, amohama njohama, ate, Botatomake etomoko, liiko lonande loyali eneyal’ende.

¹¹Ko eneki’nd’oilelaka lakina, aokesa mampa, ko aola, ko aokinda litenda l’iyo elela lakina, yengoko kuma bina bokya, ko aocoa.

¹²Baoya l’ofenga kum’ayaike, ko baocicima bike en’etema.

¹³Koko iso tocoaki en’asua en’oso, tosemwa ko tocoa Aso, lacin’eho tookela Paulo en’asua meho; lacin’oka endamene akodyaki yok’osamb’oho, eneki’nd’oyalamaka la lisangya lacina acu la mboka en’okili.

¹⁴Eneki’nd’oukanaka l’iso ena Aso, tomookela, ko toyela Mitulene.

¹⁵Tosemwa meho, ko en’ina bona loi toya mbolimboli la Kio; ko en’ina bon’efe tosema ena Samo; toyalaki isalisali ena Tulogulio, ko en’ina bona mbusa toyela Mileto.

¹⁶Paulo ayaaki la lisangya lacina alekanya Efeso, enetalang’ende lacina akinde elela ena Asia; lacin’ende aocoa la mbango mbango, lacina yombo akolana, ayele Yelusalema en’ina bon’elambedya ena Ntuk’itano.

¹⁷Koko ena Mileto aotom’onyua ena Efeso, ko aelela bingambe bina ekelesia.

¹⁸Enek’iy’oyaka eneyal’ende, amalokwela, ate. Inoamene beya, nk’en’ina bon’oso bonoki’m’oyelaka ena Asia, bokotu’onami bonoki’m’oyalaka l’ino bisike bihitu,

¹⁹bokotua bonoki’m’osaelaka Nkolo la njofima mene, ko la mposoli bike, ko la mmeko ineyonkwelaki la biango bina Ba-Yuda.

²⁰Ko bey’oka ntafisa yoi limoko linakolana l’ino, mokolak’ino l’en’esolongano l’en’etumba l’etumba,

²¹mosumola le Ba-Yuda le Ba Elene likambo lin’ehalingwelo eneyali Yakomba, ko l’imeedyo eneyali Nkolo eniso Yesu Masiya.

²²Isanga, lenda, locoa nko ntungama en’olimo ena Yelusalema, ko mpeye baoyi banangonkwela meho,

²³yoi limoko liney’emi: Bolimo’on’olotsi aonsumola en’enyanga behetu, ate benyolo la bino bankongamela.

²⁴Ohonde mpakeswa botema lacin’ena liiko lonamamene, yok’iyema inakanelama bike, ohonde lalanga lacina nkadya bokit’onami l’ekiko, l’ekambwa eneki’m’ofamaka la Nkolo Yesu, lacina nsumole bato bosimo bon’olotsi bon’isei ina Yakomba.

²⁵Koko lenda, emi ley’oka inatu bofetiaki elongi enami lalcina, em’onoselaselaki eneyal’ino ko nsekodyaki bosimo bona Lifoka.

²⁶Lacin’eho, lakosumol’inatu fololo bon’in’one, emi mpoli ena likambo lin’akila ban’oto’omoko’onino,

²⁷lacin’oka mokosumol’ino eango ena Yakomba ehatu, ntafisa baoyi tu lacin’en’ofolu.

²⁸Boyotombanyak’inoamene ko l’otonga bohotu, bonoki Bolimo bon’olotsi okiilak’ino batombanyi, lacin’eho boolole ekelesia ena Yakomba, eneki’nd’osombaka l’akil’anandamene.

²⁹Lacin’oka emi leya yoi line, ena mbusa en’ecwelo enami nkoi inay’olema ingotua eneyal’ino, ko ifikyaki botonga;

³⁰ko bato bangemala eneyal’inoamene, ko bangotenda baoyi bana ntatengya, basume bakili eneyal’iyoamene.

³¹Lacin’eho, botombanyaka; ko bofwaka mbula ih’isaso initaamby’emi lilaka bato bahatu l’ane l’oco nko la mposoli mene.

³²Isanga lakoleky’ino eneyali Yakomba l’eneyali yoi lin’isei inande, yoi linakolana okokiky’ino, ko linakof’ino lisango eneyal’iyatu ban’oeka.

³³Emi ntoka mposa ena wolo la francs la bisenda bina boto’omoko;

³⁴ko inoamene beya bokotua bonoki bakas’ane ombatelak’emamene toma tonatoki emamene l’iyo banayaaki l’emi oindaka.

³⁵La baoyi bahatu mokotum’oka akoli eneyal’ino lacina bokambya bato bana tongitongi la ekambelo en’ekambwa, ko bofwa baoyi banaki Nkolo Yesu mene otendaka, ate, Mpaka eleki ntamba l’ekiko.

³⁶Eneki’nd’okadyaka litenda baoyi’ane, aun’aongo, ko aonda l’iyatu.

³⁷Ko iyatu baolela la mposoli, ko baokwela Paulo nkingo, ko bamoleya belumba,

³⁸ko lokeseli loniyo losokwa nsokwa lacin’ena yoi linaliki’nd’otendak’oka bafenaki elongi enande lakina. Ko bamocindedya en’asua.