Read ngando Bikambwa Biniki Bikima 21 Bible Online

Bikambwa Biniki Bikima 21 - ngando bible

Bikambwa Biniki Bikima 21

¹Koko enek’is’oumaka eneyal’iyo, ko tosemwa, teta nko cilili, ko toyela Kosa, ko en’ina bona loi toyela Lode, koko enek’is’oumaka meho toyela Patala.

²Ko enek’is’osungyaka basua banasokoleka ena Poinike, toyookela, ko tosemwa.

³Koko enek’is’oenaka Kupulio, ko tocik’eho ena likasa y’ooli, tocoa Sulia, ko tosema ena Tula; lacin’oka baotefola toma tonatoyaaki en’asua nko meho.

⁴Ko enek’is’osungyaka bakili, toyala meho bekolo nsambo; ko bane baosumola Paulo la Bolimo, atacoake ena Yelusalema.

⁵Koko eneki bekolo beho okokaka, tuma meho, ko tokila bokit’oniso; ko iyatu, l’aali l’ana, baotocindedya yengoko kuma tofola ena mbiolo en’onyanga; ko tun’aongo en’oseleka bona lose l’okwa ko toonda.

⁶Ko tosesana; koko iso toyookela en’asua, koko iyo bautw’ola.

⁷Tosimbyaki bokit’oniso enek’is’ocikaka Tula ko toyela Petolemai. Meho tesa befili, ko toyala l’iyo bin’omoko.

⁸Ko en’ina bona loi tocoa, ko toyela Kaisalia. Totua en’otumba bona Filipo, bosumoli bon’osimo bon’olotsi, omoi ona baho nsambo, ko tokisase l’ende.

⁹Ende ayaaki l’ana ban’ayato banei banatasongana la mpame, banayaaki basumoli bana baoyi.

¹⁰Ko enek’is’okindaka meho bekolo bemoi bike, bosumoli’ompi onotangama Agabo, aoya ena Yudea.

¹¹Ende aoya eneyal’iso, aotamba bokoli bona Paulo, aokakela bakasa ko l’akak’anandamene, ko aila, ate, Bolimo bon’olotsi atenda baoyi’ane, ate Ba-Yuda banayali ena Yelusalema bangokakela bomene bokoli’one yok’osamb’one, ko bangoleky’ende en’akasa bana Befenda.

¹²Enek’is’ookaka baoyi’ane, iso l’akili ban’onyang’oho tomoonda, atacoake ena Yelusalema.

¹³Koko Paulo aokutola, ate, Ino boyalele ko bolembya botem’onami lacina nai? Lacin’emi mokolana, efa lacina ntungame kei, ohonde lacina mbwu ena Yelusalema lacin’ena lina Nkolo Yesu.

¹⁴Ko enetimedy’ende boondo’oniso, tocika, is’ate, Eango ena Nkolo eilamake.

¹⁵Eneki bina bene okalaka, tosonga toma toniso, ko tocoa Yelusalema.

¹⁶Ko bakili’amoi bana Kaisalia baocoa l’iso, ko baotola Menesona ona Kupulio l’iyo, ende bokili on’alale, ko tokisase en’otumb’onande.

¹⁷Ko enek’is’oyelaka Yelusalema, bifili baotosangela l’enyanga mene.

¹⁸Koko en’ina bona loi Paulo aotua l’iso eneyali Yakobo, ko bingambe bihitu baoya nkoho.

¹⁹Ko eneki’nd’oaesaka, amalokwela bikambwa, emok’emoko, biniki Yakomba okambaka eneyali Befenda l’ekambelo enande.

²⁰Ko iyo enek’iy’ookaka, baokumya Yakomba. Ko bamosumola, iy’ate, Efili, oen’oka bik’ike mene bona Ba-Yuda bamimedya, ko iyatu bayali la mposa mene en’asangya;

²¹ko bamoka yoi iy’ate e olaka Ba-Yuda bahatu banayali en’enyanga bena Befenda lacina baumbele beeka bena Mose, enil’e ate batakesake baonge bana ban’aniyo, ko batakambake l’ekotua beneki bafango okambaka.

²²Tongil’oya? Lacin’iyo bangok’oka omoya, ko bangosolongana.

²³Ekoli lacina oile yoi line linakosumol’iso: toyali mendo l’ato’anei banatehaki lisangya;

²⁴oatambe, ko oyosong’eamene l’iyo l’esongelo ena basangya, ko eamene oafutele lacin’eho bakoole bete’eniyo; ko bato bahatu bangey’oka baoyi banak’iy’ookaka lacin’ene bafayali solosolo; ohonde bangey’oka eamene oyakende l’okotua bonakolana, ko omonya basangya.

²⁵Koko ena likambo lina Befenda banimedya, tomolatomela yoi linik’is’okodyaka lacina bakile nyama inilekyamaki eneyali baidola, ko l’akila, ko la nyama iniyakama la nkoma; ko bakile ntata ena likele.

²⁶Nkwaho Paulo aotamba bato’aho, ko en’ina bona loi aoyosong’endamene ko l’iyo l’esongelo ena basangya; baotua en’otumba bona Yakomba, aeyanya esimbelo ena bina ben’esongelo, ko aoyala meho yengoko kuma mbeka eolekyama lacin’en’iyatu.

²⁷Ko eneki bina beho nsambo oolamaka lisila, Ba-Yuda bana Asia, enek’iy’oenak’ende en’otumba bona Yakomba, baosombanya bato bik’ike lacin’enande, ko bamuunda l’akasa,

²⁸baololua, iy’ate, Bato bana Yisalaele, botokambya! One nk’ende onolaka bato bahatu en’enyanga behetu lacina baoke bato bana Ba-Yuda bowe, la basangya, ko l’edye ene en’oeka. Ko amoya la Ba-Elene en’otumba bona Yakomba nkoho, ko amolehya edye ene en’oeka.

²⁹Lacin’oka baenaki en’oso Tulofimo, bise Efeso, kum’ayakende l’ende en’onyanga; ko baokanel’oka Paulo amoya l’ende en’otumba bona Yakomba.

³⁰Ko bonyanga bohotu bolidyama, ko bato baocoa la mbango en’ili’omoko; baunda Paulo, ko bamosuma ena mbiolo en’otumba bona Yakomba; ko nkwaho nkombo yokombama.

³¹Ko enek’iy’omekaka lacina baoyake, bato’amoi baosumola commandant ena soldats, iy’ate Yelusalema ehatu eolidyama.

³²Ko isasanga ende aotamba soldats la capitaines, koko aocoa la laango eneyal’iyo; ko enek’iy’oenaka commandant la soldats, baedya lifoma Paulo.

³³Nkwaho commandant aolama, ko amuunda, ko aila ate akakelamake l’enyolo befe; ko aufola lina linande, ko la yoi linaliki’nd’okambaka.

³⁴Bamoi ban’ato’aho bik’ike baololua yoi limoko, ko bamoi yoi likina; ko enetanongany’ende ncina bolotsi’olotsi lacin’en’etomoko, aila ate bayake l’ende ena litonga lina soldats.

³⁵Enek’iy’oyelaka en’eandelo, aotolama la soldats lacin’ena bolema bon’ato’aho bik’ike;

³⁶lacina bato bik’ike baokilana l’iyo, kuma bayalolua, iy’ate, Bumol’ende!

³⁷Ko enek’iy’oolamaka yookela Paulo ena litonga lina soldats, ende aosumola commandant, ate, Nkosumolake yoi? Ende ate, Oeya nde lofoso lona Ba-Elene?

³⁸E ofayali nde boto’oho ona Ejipeto onosusanyaki’ale bato en’ita, ko atolaki mpame nkoto inei ena sengelenge, nko bayaki ban’ato?

³⁹Koko Paulo aila, ate, Emi nko bise Yuda, bise Taluseu ena Kilikia, bise bonyanga bonofinde lokumo; lakoonda ompe etelo ntende la bato.

⁴⁰Ko eneki’nd’ofak’etelo, Paulo aemala en’eandelo, ko aelel’ato la likasa; ko enek’iy’oyalamaka mwi, amalokwela ena lofoso lona Ba-Ebele.