Read ngando Bikambwa Biniki Bikima 22 Bible Online

Bikambwa Biniki Bikima 22 - ngando bible

Bikambwa Biniki Bikima 22

¹Amalokwela, ate, Bifili la bafango, bolofaka boloko’onami bonakolokwel’emi isanga.

²Enek’iy’ookak’oka amalokwela ena lofoso lona Ba-Ebele, baoyalama mwi mene; ko aila, ate,

³Emi nde nde bise Yuda, onotwaki ena Taluseu ena Kilikia, koko banjololaki en’onyang’one, ko ndakamaki ena basangya bana bafango’aniso en’akaka bana Ngamaliele, ko njaaki la mposa mene eneyali Yakomba, yoka bosamb’onoyal’inatu bon’in’one.

⁴Ko mbehyaki bato bana Mbok’ene l’ewedi mene, mbundaki le mpame le bayato ko njaokelaki en’etumba ben’enyolo;

⁵nkanga iyome mene angimedy’oka baoyi’ane banatend’emi bayali nko solosolo, ende la boloi bona bingambe bohotu nkoho. Ntambaki bekanda nk’eneyal’iyo lacina ntoele bifili bina Damaseke, ko ncoaki meho lacin’eho nje l’iy’anayaaki meho ntungama l’enyolo ena Yelusalema, lacina basisodyame.

⁶Koko enem’em’ocoa, ko loolama la Damaseke, yok’en’esike ena midi, kaimo fololo ena nkolo ena loola eololoma eneyal’emi nsambanya sole;

⁷ko lokwa ena loko, ko loka lofoso lonelonjila, ate, Saula, Saula, onyom’emi lacina nai?

⁸Lomokutwela, emite, Nkolo, e nai? Ko aonsumola, ate, Emi nko Yesu ona Nazaleta onanyom’e.

⁹Ko iy’anayaaki l’emi baena fololo solosolo, ohonde batoka lofoso lonande onotenda l’emi.

¹⁰Koko lila, emite, Nkolo, njilake’oya? Ko Nkolo aila, ate, Emala, ombocoa ena Damaseke; bangokosumola meho baoyi bahatu banakoli l’e lacina oile.

¹¹Ko eneten’emi tutu lacin’ena kalikali ena fololo eho, iy’anayaaki l’emi baonjeledya la likasa nsuka, ko loya ena Damaseke.

¹²Ko boto’omoi oka Anania, bokumi bona Yakomba bosamb’onoyali basangya, ko onokumyam’olotsi la Ba-Yuda bahatu banatongaki meho,

¹³aoya eneyal’emi, ko aemala mbolimboli l’emi, aonsumola, ate, Efili Saula, enaka nko njena. Isasanga lena lakina ko lomen’ende.

¹⁴Ko aila, ate, Yakomba ena bafango’aniso amokoson’e lacin’eho oeye eango enande, ko oene Ende Onokoli, ko oke lofoso en’onyu’onande.

¹⁵Lacin’e ongoyala temoin enande eneyali bato bahatu, temoin en’aoyi banak’oenaka la baoyi banak’ookaka.

¹⁶Ko isanga olingalinga lacina nai? Emala oyiname en’asi, ko oyosong’eamene en’aoyi’owe’ane la mbelela lina lina Nkolo en’oondo.

¹⁷Ko eneki’m’outaka ena Yelusalema, kuma laonda en’otumba bona Yakomba, lokwa nk’eyoka ena lilotua.

¹⁸Lomena nk’Ende, ko aonsumola, ate, Adya oyume ena Yelusalema la mbango; lacin’iyo bafimedyaki yoi line lacin’enami.

¹⁹Ko lila, emite, Nkolo, iyoamene baey’oka emi mbundaki bato bahatu banakimedya, ko njafomaki ena basunagoga bahatu;

²⁰ko eneki bakila bana temoin ene eka Setefano outelamaka, eminjemalaki nkwaho, ko njimedyaki, ko ntombanyaki bisenda biniy’anoyakaki.

²¹Ko Ende aonsumola, ate, Coa ka; lacin’emi nongokotom’e eneyali Befenda beneyali en’esana.

²²Ko iyo bamolofamela yengoko kum’aotenda yoi liho; ko nkwaho baololua la lofoso lona lokolo, Mbo umola boto bon’omun’one ena loko! Ende afakoli lacina aike!

²³Ko enek’iy’ololuaka, ko baoka bisend’iniyo mboka, ko baofusa mpucifuci ena liko,

²⁴commandant aotom’onyua lacina bayi l’ende ena litonga lina soldats, ko aila, ate, Bomekake la mpoma ena lofomi! lacin’eho aeye ncina ena yoi liho linalik’iy’ololuaka lacin’enande.

²⁵Koko enek’iy’okakelak’ende l’esinga, Paulo aufola capitaine eniyo onemali mbolimboli, ate, Aonga nde lacina ofoma bise Loma lofomi kum’atakoiyama likambo?

²⁶Eneki capitaine ookaka yoi liho, aocoa eneyali commandant, ite, Yoi linakamb’e lika nai? Boto’one ayali nko bise Loma.

²⁷Commandant aoya, ko amuufola, ate, Onsumole, e oyali nde bise Loma? Ate, O.

²⁸Ko commandant aamba, ate, Emi nsombaki lifoka line l’osolo bike mene. Koko Paulo ate, Ohonde emi mbotwaki nko bise Loma.

²⁹Ko iy’anasokosisol’ende la lofomi bauma eneyal’ende isasanga; ko commandant aoka losomo mene eneki’nd’oeyak’oka ayali nko bise Loma, ko lacin’oka aokakelaki.

³⁰En’ina bona loi amotungola, lacin’oka aolanga lacina aeye ncina ena yoi linaliki Ba-Yuda oakolaka; ko aotomela nkanga ina toome la likita liniyo lihalitu lina bingambe yoi lacina basolongane, ko aokitsa Paulo eneyal’iyo, ko ameemadya en’oso’oniyo.