Read ngando Bikambwa Biniki Bikima 23 Bible Online

Bikambwa Biniki Bikima 23 - ngando bible

Bikambwa Biniki Bikima 23

¹Ko Paulo aolenda likita lina bingambe ta, ko aila, ate, Bifili, Moyala en’oso bona Yakomba l’otema bonotankoiya yengoko bon’in’one.

²Ko Anania, nkanga en’iyome mene, aosumola iy’anemali mbolimboli la Paulo lacina baofome en’onyua.

³Nkwaho Paulo aila, ate, Yakomba angokofom’e, e boombo bonokyama mpembe ena telele! E okisa nd’ase lacina otende likambo linami bosamb’onoyali basangya, ko osumol’ato lacina bampome bosamb’onofakoli l’asangya?

⁴Ko iy’anemali mbolimboli, Mbo e osongola nde nkanga en’iyome mene ena Yakomba?

⁵Ko Paulo ate, Bifili, ntey’oka ayali nkanga en’iyome mene; lacina yoi limotengama, Ofatangaki boto’onoyali la lifoka eneyali bato’ane lotango.

⁶Ko eneki Paulo oenak’oka boloi’omoi boyaaki Basadoke ko boloi’okina Bafalusi, aololua ena likita, ate, Bifili, emi nde nde Bofalusi, la bon’ona Bofalusi; ko emi lufolama bon’in’one lacin’ena lolendedyo ko l’eetwelo en’ato banawaki.

⁷Ko eneki’nd’otendaka yok’osamb’oho, Bafalusi la Basadoke baatana ntango bike mene, ko likita yokambwana beloi;

⁸lacin’oka Basadoke bail’oka efaate eetwelo en’ato banawaki, ko efana ekima, ko efana bolimo; ohonde Bafalusi baimedy’oka baoyi bah’asaso bayali.

⁹Nkwaho baotom’etomoko mene; ko batengi’amoi ban’ekanda ban’oloi bona Bafalusi baemala, ko baata ntango bike, Mbo iso tofene yoi lin’owe eneyali boto’one; ko yombo bolimo yombo ekima ena loola atendaki l’ende, a koko nai?

¹⁰Ko eneki ntango osokwaka bik’ike, commandant aanga nko mbanga mene, lacina Paulo atongokambolama bitenyi l’iyo; aotoma soldats lacina bakite, ko baumole Paulo eneyal’iyo la locili, ko bayi l’ende ena litonga lina soldats.

¹¹Koko boco bona loi Nkolo aemala l’ende, ate, Kiky’otema; nk’eyok’onok’oyalamaka temoin enami ena solosolo ena Yelusalema, okoli lacina oyalame temoin enami ena solosolo ena Loma nkoho.

¹²Eneki bina okyaka, Ba-Yuda bamoi baoteelana lisangya, ko baoteha biteho, Mbo iso tofayale ko tofamelaki yengoko kuma toyaka Paulo nko tu.

¹³Ko bato banatehaki lisangya line baleki ntuk’inei.

¹⁴Ko baoya eneyali nkanga ina toome la bingambe, iy’ate, Iso tomoteha lisangya lina likolo, tofayale iyema yengoko kuma toyaka Paulo.

¹⁵Ko isanga ino la likita lina bingambe bosumole commandant lacina akokitsedy’ende, yok’ino bolanga lacina bosisole likambo linande nsisola mene; koko iso tomokolana lacina enesokoolam’ende mbolimboli toyake nko tu.

¹⁶Koko bon’ona mbangela ena Paulo aoka eango eho en’eyakelo; ko aotua ena litonga lina soldats ko aosumola Paulo.

¹⁷Ko Paulo aelela capitaine emoi ena soldats eneyal’ende, ate, Tola bofeng’one eneyali commandant, lacin’oka ayali la yoi litutuma lacina aosumole.

¹⁸Ko amotamba, amotola eneyali commandant, ko aila, ate, Paulo onoyali en’onyolo aombelelaka, aonsumolaka nkoyele bofeng’one, lacin’ende ayali la yoi oyokosumol’e.

¹⁹Ko commandant amosuka la likasa, ko amosuma ena lokuko, amuufola, ate, Yoi linalang’e lacina onsumole lika nai?

²⁰Ende ate, Ba-Yuda bamimedya lacina bakufol’e, lacina okitsa Paulo loi ena likita lina bingambe, lacin’eho osisole bokotua bona likambo linande nsisola lakina.

²¹Ohonde e taimedyake tutu; lacin’oka bato’aniyo banaleki ntuk’inei bamokongamela, ko bamoteelana lisangya iy’ate bafayale ko bafamelaki yengoko kuma bamoyaka tutu; ko bamokolana, balengedya nk’esemba eneyal’e.

²²Ko commandant aofa bofeng’oho etelo lacina acu, ko amosumola, ate, Tasumolake boto’omoko omontuma baoyi’ane.

²³Ko aelela capitaines ife, ate, Bokolanya soldats bekam’efe, la soldats ina mpunda ntuku nsambo, la soldats banasuka bakonga bekam’efe, bacu ena Kaisalia, ko baemwa en’esike ena neuf heures.

²⁴Ko amasumola lacina batambe mpunda, ko batadya Paulo ena mpund’iho, ko baotole bolotsi eneyali Felika, nko gouverneur.

²⁵Ko aoteng’okanda yok’osamb’one; ate,

²⁶Emi Kulaudio Lusia lakees’e Felika, gouverneur onoleki lokumo, Bote!

²⁷Boto’one aundamaki la Ba-Yuda, ko asokoyakama l’iyo, koko emi loya eneyal’iyo la boloi bona soldats ko lomotungola, eneki’m’ononganyak’oka ayali bise Loma.

²⁸Ko eneki’m’olangak’oka njeye ncina enek’iy’oakolak’ende, lomokitsa ena likita liniyo;

²⁹ko len’oka bamoloakola baoyi bana basangya baniyoamene, ohonde batoakola ende la yoi linalikoli l’ewedi yombo l’enyolo.

³⁰Ko eneki’m’ookak’oka bamoangela boto’one eango en’owe, lomotoma isasanga eneyal’e, ko mosumola baakoli’anande lacina batende yoi liniyo lacin’enande nk’en’oso’oneamene.

³¹Ko soldats baotamba Paulo, yok’onok’iy’otomamaka, ko baoya l’ende l’oco ena Antipatuli.

³²Koko en’ina bona loi baocika ban’aise mpunda bacu l’ende, ko iyoamene bauta la mbusa ena litonga lina soldats.

³³Eneki ban’amoi oyelaka Kaisalia, baofa gouverneur bokanda, ko baolekya Paulo eneyal’ende.

³⁴Eneki gouverneur oandaka boho, aufola bonyang’onande, ko eneki’nd’oeyak’oka ayali bise Kilikia,

³⁵aila, ate, Enengi baakoli’ane oya, nongoka yoi line lihalitu. Ko aotom’onyua lacina baotombanya en’otumba bona Pretoire bona Elode.