Read ngando Bikambwa Biniki Bikima 24 Bible Online

Bikambwa Biniki Bikima 24 - ngando bible

Bikambwa Biniki Bikima 24

¹Eneki bina betano oetaka, Anania nkanga en’iyome mene aokita meho, ende la bingambe bimoi la botenji’omoi bona nkaso onotangama Telutulo; ko baosumola gouverneur likambo lina Paulo.

²Ko enek’iy’oelelaka Paulo, Telutulo aomatsa yakol’ende yok’osamb’one, ate, Enakik’iso lacin’ena mwi enatoatel’e, ko la baoyi banatoongedy’e bonyang’one la lokanyi lonakanedy’e,

³iso totamba baoyi’ane ban’ekotua l’ekotua en’ili behetu, ko tokokanga lokango mene, e Felika onoleki lokumo!

⁴Ko, enefalang’emi lacina ooke lonungo l’aoyi bike, lakoonda l’isei ine otolofe ena baoyi banafaataki bike.

⁵Lacin’iso tomena boto’one ayali nk’eyoka boto’ona lofundo mene, bosombanyi bona bitomoko eneyali Ba-Yuda ban’enyanga behetu, ko ayali bolonji bona boloi bona Ba-Nazaleta;

⁶ko ende amomeka lacina afulunganya boeka bon’otumba bona Yakomba. Iso tuundaki, (ko tosokolanga totende likambo linande yoka bosamb’onoyali beeka beniso;

⁷ohonde commandant eka Lusia aoya eneyal’iso, ko aotokumola boto’one la bita mene,

⁸ko aila, ate, Baakoli’anande bayake eneyal’e). Ko yombo eamene osisol’ende, ongeya baoyi’ane bahatu banoakol’iso.

⁹Ko Ba-Yuda baambana l’otenji’oho, ko baimedy’oka baoyi’aho bayali nko solosolo.

¹⁰Ko eneki gouverneur oilelaka Paulo ndembi la likasa lacina atende, Paulo aokutola, ate, Emi lalokola boloko’onami l’ekiko, eney’emi oka e omoyala juge eneyali bato ban’onyang’one mbula bike;

¹¹lacin’eamene okolana yey’oka bekolo bemosila nko jo l’efe kei eneki’m’ocoaka Yelusalema okumya Yakomba meho;

¹²ko iyo batansungya kuma njaatane l’oto ntango, yombo kuma njasombanya bato batomake etomoko, l’en’otumba bona Yakomba, l’ena basunagoga, l’en’elongo ben’onyanga;

¹³ko bafinya likotum’oka baoyi banambakol’iyo bayali nko solosolo.

¹⁴Ohonde emi limedya yoi line en’oso’one, noka ena Mbok’eho enatang’iyo bokotu’okina, emi lasaela Yakomba ena bafango’aniso, ko limedya baoyi bahatu banatengamaki ena basangya l’en’ekanda ben’asumoli.

¹⁵Ko njali la lolendedyo eneyali Yakomba nko loho lonalendedy’iyoamene, nk’oka le bato banakoli le bato banafakoli bangetwa lakina en’ewedi.

¹⁶Lacin’eho, emi lameka lacin’eho mbate botema bonofana nkwaka ena likambo en’oso bona Yakomba la bato bisike bihitu.

¹⁷Ko eneki mbula bike oetaka, njaye oyela bato ban’onyang’onami nganji in’isei ko la toma tona ndekya;

¹⁸ko Ba-Yuda bamoi bana Asia baonsungya kuma njakambe baoyi’ane en’otumba bona Yakomba, kuma losongwa l’esongelo ena basangya, ohonde ntayala l’ato bik’ike, ko etaata etomoko.

¹⁹Ko yomb’iyo bayali la likambo l’emi, akoli eneyal’iyo lacina bayi mendo en’oso’one ko bambakole.

²⁰Koko bato’ane bakosumolake yoi lin’owe linalik’iy’osungyaka eneyal’emi, eneki’m’oemalaka en’oso bona likita lina bingambe,

²¹umola nko yoi limoko linaliki’m’ololuaka kuma njemali ena ntoto eniyo, emite, Ncina enansisol’ino bon’in’one nk’ena likambo lin’eetwelo en’ato banawaki.

²²Eneki Felika ookaka baoyi’ane, amaonza isalisali, lacin’oka aeyaki bokotua bona Mbok’eho njeya mene, ko amasumola, ate, Enengi commandant eka Lusia oya nongokadya likambo linino.

²³Ko aotoma capitaine ena soldats lacin’eho atombanya Paulo, ohonde efa la locili, atafekyake bifili binande banalanga bayi oyokambya.

²⁴Eneki bina bemoi osilaka, Felika aoya la booli’onande oka Dulusila, boyoto’ona Yuda, ko aelela Paulo, amolofamela ena likambo lin’imeedyo eneyali Yesu Masiya.

²⁵Koko eneki’nd’otendaka baoyi ena likambo lina mbongi, la njofima, l’etendelo en’akambo enengoya, Felika aoka losomo, ko aamba, ate, Ombocoa isanga; nko nongata etelo enakolana, nongokelela lakina.

²⁶Ko ende aolendedy’oka Paulo angof’ende bosolo; ko la ncin’eho ameelela beelela bike, ko aesola l’ende.

²⁷Koko eneki mbula ife osilaka, Polukio Feseto aokitanya Felika, ko Felika aocika Paulo en’onyolo, lacin’oka alangaki lokumo lona Ba-Yuda.