Read ngando Bikambwa Biniki Bikima 25 Bible Online

Bikambwa Biniki Bikima 25 - ngando bible

Bikambwa Biniki Bikima 25

¹Eneki Feseto omatsaka bosala en’onyang’oho, ko bekolo besaso beokala, auma ena Kaisalia ko aocoa Yelusalema.

²Ko nkanga ina toome l’ato bana lifoka bana Ba-Yuda bamosumola likambo lina Paulo; ko bamoonda,

³lacin’eho akamby’iyo ena likambo liniyo la Paulo, ko aelele Paulo ena Yelusalema; koko iyo bamoangel’eango lacina baoyake ena mboka.

⁴Koko Feseto aamba, ate, Paulo atungi nk’ena Kaisalia, ko efan’olingolingo emamene nongocoa meho.

⁵Koko ate, Bamoi’anino bana lifoka bocu l’emi, ko yombo likambo liyali eneyali boto’one, boakole.

⁶Eneki’nd’okisak’ase eneyal’iyo bekolo mwambi yombo jo, autwa ena Kaisalia; ko en’ina bona loi aokisase en’ieko in’akambo, ko aotoma yoi lacina baye la Paulo.

⁷Ko eneki’nd’oyaka, Ba-Yuda banayaki ena Yelusalema baemala eneyal’ende nko nsambanya, ko bamoakola la baoyi bike bana locili mene banatakolan’iyo likikya baho yoka bayali solosolo.

⁸Koko Paulo aokutola, ate, Emi ntafunzafunza basangya bana Ba-Yuda, ko la boeka bon’otumba bona Yakomba, ko ntilela Kaisala yoi lin’owe.

⁹Koko Feseto, lacin’eneki’nd’olangaka lokumo lona Ba-Yuda, aokutwelo Paulo, ate, Olanga nde ocu Yelusalema, la ntende likambo lin’aoyi’ane meho?

¹⁰Koko Paulo aila, ate, Emi njemali en’etendelo en’akambo ena Kaisala, ko likambo linami yakolana l’etendelo ene kei; ntilela Ba-Yuda yoi limoko lin’owe, ko eamene ofunge yoi liho.

¹¹Yomb’emi nde nde bokambi bon’owe, ko yombo mokamba yoi linalikoli l’ewedi, emi mpakile lacina ncu en’ewedi; ohonde yombo baoyi’aho banambakol’iyo bayali nko mpoci, efakolana lacina boto andekya en’akas’aniyo. Emi latoma likambo eneyali Kaisala mene.

¹²Nkwaho Feseto, eneki’nd’otendanaka la likita, aamba, ate, Omotoma likambo eneyali Kaisala; ongocoa nk’eneyali Kaisala.

¹³Ko eneki bina bemoi osilaka, Agulipa Lifoka lina roi la Belunike baoya ena Kaisalia oyesa Feseto.

¹⁴Ko enek’iy’okindaka meho ipaputa, Feseto aosumola lifoka likambo lina Paulo, ate, Boto’omoi onoki Felika ocikaka en’onyolo ayali;

¹⁵ko eneki’m’oyalaka ena Yelusalema, nkanga ina toome la bingambe bina Ba-Yuda baonsumola likambo linande, ko baolanga lacina njokoiya likambo.

¹⁶Lomakutwela, emite, Efa bokotua bona Ba-Loma lacina balekya boto en’ekwelo ena likambo kum’ende l’aakoli’anande batukana, ko boto’oho aat’elokwelo en’oloko’onande ena likambo linoakol’iyo.

¹⁷Ko enek’iy’osolonganaka, emi ntalingalinga, ohonde en’ina bona loi lokisase en’ieko in’etendelo en’akambo, ko lotoma yoi bayi l’oto’oho.

¹⁸Koko eneki baakoli’anande oemalaka, batoakola yoi limoko linaliki’m’olengedyaka:

¹⁹bamoakola nko baoyi’amoi ban’ekumedyo ena Yakomba eniyo, ko lacin’ena boto’omoi oka Yesu onowaki, onoki Paulo oilaka ate ayaike.

²⁰Emi lokandakanda la bokotua bonongi’m’osisola baoyi’aho, ko lomuufola yombo alanga lacina acu Yelusalema, lacin’eho batende li kambo linande lin’aoyi’ane meho.

²¹Ohonde eneki Paulo otomaka likambo linande eneyali Kaisala mene lacina litendame enek’ende, emi lotom’onyua lacina baotombanya, yengoko kuma laat’etelo oyotoma eneka Kaisala.

²²Ko Agulipa aosumola Feseto, ate, Emi nsokolanga lacina ndofe boto’oho emamene. Ate, Ongolofa nko loi.

²³En’ina bona loi, eneki Agulipa la Belunike oyaka l’okombe mene, ko baotua en’otumba bon’akambo, iyo la commandants la bingambe bin’onyanga, Feseto aotoma yoi ko baotoya Paulo.

²⁴Ko Feseto aila, ate, Lifoka Agulipa l’ato bahatu banayali mendo, ino bena boto’one, onoki bonyanga bohotu bona Ba-Yuda, l’ena Yelusalema le mendo, ombondaka ena likambo linande, ko baololua, Mbo afakolana lacina aike lakina.

²⁵Emi njenaki oka atila yoi limoko linalikoli l’ewedi; ko eneki endamene otomaka likambo eneyali Kaisala, njalamaki la lisangya lacina njotome nko meho.

²⁶Ohonde mpana yoi litutuma linalingi’m’otengela nkolo enami. Lacin’eho, molofodya en’oso’onino, koko en’oso’oneamene, Lifoka Agulipa, lacin’eho enosisol’iso emi mbate yoi litutuma linalingi’m’otenga;

²⁷lacin’oka efaonge ntoma boto onotungi en’onyolo kuma totasakitola baoyi banatangam’ende l’aho.