Read ngando Bikambwa Biniki Bikima 26 Bible Online

Bikambwa Biniki Bikima 26 - ngando bible

Bikambwa Biniki Bikima 26

¹Nkwaho Agulipa aosumola Paulo, ate, Ombotenda lacin’en’eamene. Ko Paulo aociedya likasa linande, ko aolokola boloko’onande, ate,

²Lifoka Agulipa, emi lanyangela lacin’oka ndokole boloko’onami en’oso’one bon’in’one, lacin’ena baoyi bahatu banambakola Ba-Yuda;

³lacin’eamene oeya fololo bekotua behetu ko l’aoyi bahatu bana Ba-Yuda; lacin’eho, lakoonda ondofe enakosumol’emi.

⁴Ba-Yuda baeya bokotua bonoki’m’oyalaka nko l’olenge’onami, eneki’m’oyalaka l’olenge’onami ena ntoto en’ato ban’onyang’onami l’ena Yelusalema.

⁵Iyo bamonjeya nk’ena limatsako, ko yombo balanga tumbe bangimedy’oka emi njaaki Bofalusi’ona boloi bonoleki locili en’ekumedyo ena Yakomba.

⁶L’isanga emi njemali mendo lacin’eho likambo linami litendame lacin’ena lolendedyo lon’esemba eneki Yakomba osembedyaka bafango’aniso;

⁷ko beloi beho jo l’efe ben’onyang’oniso banasaela Yakomba la mposa l’ane l’oco balengedya lacina baate esemb’eho. Lifokao, Ba-Yuda baombakola nko lacin’ena lolendedyo lone.

⁸Ino bofimedy’oka Yakomba aetola bato banawaki lacina nai?

⁹Emamene nkanelaki’oka nkoli lacina njile bike bon’aoyi banangatela lina lina Yesu ona Nazaleta bowe.

¹⁰Nkambaki nko baoyi’aho ena Yelusalema: eneki nkanga ina toome ompaka etelo, nkombaki bike bon’ato ban’oeka en’otumba bon’enyolo, ko enek’iy’oyakamaka, emi njimedyaki l’onyu’onami lacina bayakame.

¹¹Njaenyaki bino ma-ma ena basunagoga bahatu, ko njasomyaki lacina basaiya Yakomba: ko eneki’m’ookelak’iyo nkele nk’eyok’oto onolowa, njaehyaki nko njitana l’iyo en’enyanga ben’efenda.

¹²Eneki’m’oyalamaka la lokanyi loho, ncoaki ena Damaseke la lotomo ko la lifoka eneyali nkanga ina toome;

¹³koko la midi mene, Lifokao, kuma njali ena mboka, njenaki fololo ena loola eneleki kalikali ena bina, enelolomaki eneyal’emi l’eneyal’iy’anakendaki l’emi nko sole.

¹⁴Ko enek’isatu okwaka ena loko, njokaki efodya eyatende l’emi ena lofoso lona Ba-Ebele, ate, Saula, Saula, onyom’emi lacina nai? ende locili enafoman’e l’isongo.

¹⁵Ko emite, Nkolo, e nai? Ko ende ate, Emi nko Yesu onanyom’e.

¹⁶Koko etwa, emala en’akak’ane; menya eneyal’e lacin’eho nkiile bosali la temoin ena baoyi banak’oenaka ko la baoyi banangi’m’okotuma;

¹⁷nongokumola en’akasa ban’ato’ane, ko la Befenda banangi’m’okotoma eneyal’iyo,

¹⁸lacin’eho olifole baiso’aniyo, lacina bacike bilima ko baelele fololo, bacike lifoka lina Satana ko baelele Yakomba, lacin’eho baate etungwelo en’aoyi’owe ko la lisango eneyal’iy’anekya ma en’oeka l’imeedyo inanjimedy’iyo.

¹⁹Nkwaho, Lifoka Agulipa, ntafengola enelo eho ena loola;

²⁰ohonde nsumolaki baise Damaseke en’oso, ko l’iy’anayali ena Yelusalema, ko l’en’enyanga behetu bena Yuda, ko l’eneyali Befenda, lacina baumbele baoyi’owe, ko baha lingwa eneyali Yakomba, ko bakambe bikambwa bi nikoli l’eumbelo eniyo en’aoyi’owe.

²¹La ncin’eho, Ba-Yuda baombunda en’otumba bona Yakomba, ko baomeka lacina banjake.

²²Koko Yakomba amonkambya, ko emi memala yengoko bon’in’one, njasumole bato ban’asali l’ato ban’akolo, ko mpasumole baoyi’akina umola nko baho banaki Mose l’asumoli oilak’oka baho bangilama:

²³iy’ate, Masiya angen’ino, ko angetwa en’oso mene eneyali bato banawaki, ko angosumola bato’aniso ko la Befenda bosimo bona fololo.

²⁴Eneki’nd’olokolaka boloko’onande yok’osamb’one, Feseto aila la lofoso lona locili, ate, Paulo, olowa nde; bomwu bone bonoleki bokoloweya.

²⁵Koko ende, ate, Feseto onoleki lokumo, emi mpalowa: njatende nko baoyi bana solosolo l’ana nnonganya;

²⁶lacin’oka Lifoka lina roi ameya baoyi’ane fololo, ko latenda l’ende, mpoke’ofolu; lacina emi ley’oka efana yoi limoko lina baoyi’ane linalifisi eneyal’ende; lacin’oka yoi line litilama ena lokuko.

²⁷Lifoka Agulipa, oimedya nde basumoli? Emi ley’oka oimedya.

²⁸Koko Agulipa aosumola Paulo, ate, Olanga nde oncinde l’isisali ina baoyi lacin’eho njalame boto’ona Masiya?

²⁹Koko Paulo ate, Kanga la bike, kanga l’isalisali, laonda Yakomba lacina e, ko ef’e kei, ohonde iyatu bananjok’emi bon’in’one, bayalame yoka bosamb’onoyal’emi, umola nko benyolo bene.

³⁰Koko Lifoka aemala, ende la gouverneur la Belunike l’iy’anakisak’ase l’iyo;

³¹ko enek’iy’oumaka, baotendana, iy’ate, Boto’one afakambe yoi linalikoli l’ewedi ko l’enyolo;

³²ko Agulipa aosumola Feseto, ate, Nko boto’one atatoma likambo linande eneyali Kaisala, tumbe asokotungwa.