Read ngando Bikambwa Biniki Bikima 28 Bible Online

Bikambwa Biniki Bikima 28 - ngando bible

Bikambwa Biniki Bikima 28

¹Enek’is’oikaka, teyaki’oka ekolo eho eotangama Melita.

²Ko baise’onyang’oho baotokamel’iso isei mene; iyo baofetsa nkoi, ko baotosangel’isatu lacin’ena mbula ko la lifia.

³Koko eneki Paulo oambolaka eolo ena tonganganza, ko aila toho ena nkoi, njua eofola lacin’ena nkoi, ko eundamela likasa linande.

⁴Ko eneki baise’onyang’oho oenaka njua en’olema elenzi ena likasa linande, baotendana, Mbo solosolo boto’one ayali boyaki bon’ato; kang’amolika ena lose l’okwa, Ende onotend’akambo bahatu atimedy’oka aike tutu.

⁵Ohonde aotitola njua ena nkoi, ko atok’efafo tu.

⁶Ko iyo baolengedy’oka yonge linande lingofimba, yombo angokwa kaimo en’ewedi. Koko enek’iy’okindaka bolengeli, ko batena yoi limoko lineyokwela, baohalingola lokanyi, Mbo ende ayali yakomba emoi.

⁷Bepaka bena loko bena lifoka lin’ekolo eho, lina linande lika Pubelio, beyaaki mbolimboli l’edye eho; ko ende aotosangel’iso bolotsi mene, ko aotokambya la toma bekolo besaso.

⁸Ko bafango’ona Pubelio aowa nkangi bike en’efefe l’ena pulupulu; ko Paulo aotua eneyal’ende, ko aonda, ko aotadya bakasa eneyal’ende, ko amiikya.

⁹Koko eneki yoi line okambamaka, ban’amoi banayaaki la nkangi en’ekolo eho baoya nkoho, ko baika nk’osamb’oho.

¹⁰Ko baotokumya la baoyi bike; ko enek’is’osemwaka en’esike ena mbusa, baotokambya la toma tonatok’is’oindaka.

¹¹Eneki nsenza isaso osilaka, toyookela en’asua bana Alesandulia banacikalaki en’ekolo eho en’esike ena lifia; limelo lina basua baho nko Baasa bana Mpame.

¹²Koko tosema ena Salakusa, ko toyalama meho bekol’esaso.

¹³Njuma meho tocoa la mboka yok’ena likoto, ko tosema ena Legio. Koko eneki bin’omoko oetaka, ifofongo ina Sud yoya, ko en’ina bon’ife tosema ena Puteoli.

¹⁴Meho tosungya bifili bimoi, ko iyo baotoonda lacina toyale l’iyo bekolo nsambo. Ko yok’oho toyela Loma.

¹⁵Koko bifili biniyaaki meho, enek’iy’otookaka, baoya oyotokol’iso nk’en’edye ena Limbongo lina Apio l’ena Betumba ben’efenda Besaso. Ko eneki Paulo oaenaka, aokanga Yakomba lokango, ko aokiky’otema.

¹⁶Ko enek’is’ofolaka Loma, capitaine aolekya basungu eneyali capitaine ena batombanyi, koko baofa Paulo etelo okisase ende kei la soldat onomotombanya.

¹⁷Ko eneki bekol’esaso osilaka, Paulo aelela bato bana bingambe bina Ba-Yuda; ko enek’iy’osolonganaka, amasumola, ate, Bifili, emi ntilela bato’aniso yoi limoko lin’owe, ko ntasondola beeka bena bafango’aniso; ohonde molekyama en’onyolo ena Yelusalema en’akasa ban’ato bana Ba-Loma.

¹⁸Ko iyo enek’iy’onsisolaka, basokolcinga lacina bantungole, eneten’iyo yoi linalikoli l’ewedi eneyal’emi.

¹⁹Koko enetimedya Ba-Yuda yok’osamb’oho, emi ntaata emoi mboka, umola nko ntole likambo eneyali Kaisala mene, nde efa lacina njofe bato ban’onyang’onamamene likambo.

²⁰La ncin’ene lokeelelak’ino lacin’eho nkeena ko ntende l’ino, lacin’oka emi ntungi l’onyolo’one nko lacin’ena lolendedyo lona Yisalaele.

²¹Iyo bamosumola, Mbo iso totatamba bekanda ena Yudea lacin’ene, ko bifili biniyaki eneyal’iso batatosumola, ko batokotang’e l’aoyi’owe;

²²koko tolang’oka tokolofe enatosumol’e baoyi banakanel’e; lacin’iso tey’oka boloi’one boyatangame lotango en’ili behetu.

²³Ko enek’iyo l’ende osonaka bina botutuma, bato bike mene baoya eneyal’ende en’otumba bonoki’nd’okisak’ase; ko matsa l’okulu te yengoko likolo amafoladya baoyi, amalokwela bokotua bona Lifoka lina Yakomba, ko amakengola lacin’ena Yesu, nko l’aoyi ban’asangya bana Mose la baoyi ban’asumoli.

²⁴Bamoi baimedya baoyi banaki’nd’oasumolaka, koko bamoi batimedya tu.

²⁵Ko enek’iy’oatanaka ntango en’atenyi’aniyoamene, baocoa, kuma Paulo aotenda yoi lomoko lina ncindedya, ate, Bolimo bon’olotsi atendaki bolotsi l’onyua bona Yesaya, bosumoli, eneyali bafango’aniso,

²⁶eneki’nd’oilaka, ate, Coaka eneyali bato’ane, oasumole, ate, Bongoka nko njoka, ko bofanonganyaki tu; Bongena nko njena, ko bofafokolaki tu;

²⁷Lacina botema bon’ato’ane bomokama l’ocilingitano, Ko batoi’aniyo bamoyala nde booko, Ko bamolifa baiso’aniyo, Batongoyena l’aiso’aniyo, Ko batongoyoka l’atoi’aniyo, Ko batongononganya l’etem’eniyo, Batongohelengwa Lacin’eho njaikya.

²⁸Lacin’eho, boongya linongany’oka eikedyo ene ena Yakomba emotomama eneyali Befenda: iyo bangoka yok’osamb’oho.

²⁹(Ko eneki’nd’otendaka baoyi’ane, Ba-Yuda baocoa, kuma bayatane ntango bike en’atenyi’aniyoamene.)

³⁰Ko Paulo aokisase mbula ife kali en’otumb’onande bonoki’nd’osombaka, ko aosangela bato bahatu banatua eneyal’ende,

³¹aolaka lilako lina lifoka lina Yakomba, ko aolaka baoyi bana Nkolo Yesu Masiya la nkaso eneleki, ko etaat’oto onomofekya.