Read ngando Bikambwa Biniki Bikima 5 Bible Online

Bikambwa Biniki Bikima 5 - ngando bible

Bikambwa Biniki Bikima 5

¹Koko boto’omoi, lina linande lika Anania, ende l’ooli’onande oka Safila baotekya lisala;

²koko aofisa etenyi emoi ena francs, kuma booli’onande aeyaki yoi liho fololo, koko aoya l’etenyi ekina, ko aamby’eho en’akaka bana bikima.

³Koko Petelo aila, ate, Anania, Satana amolunda botem’one lacina ofote Bolimo bon’olotsi, ko ofise etenyi ena francs, lacina nai?

⁴Kuma lisala liho liyali l’e, litayala nde lineamene? Ko enek’otekyaka liho, litacikala nde nk’ena lifoka lineamene? Oangaki eango ene en’otem’one lacina nai? Otafot’ato: omofota nko Yakomba.

⁵Eneki Anania ookaka baoyi’ane, aokwa ena loko, ko aowa nko tu. Ko losomo mene lokwela bato bahatu banokaki yoi liho.

⁶Ko befenga baemala, ko bamofuta l’esenda, bamofodya, ko bamokunja.

⁷Koko eneki bina oetaka yoka ikina heures isaso, booli’onande aotua, kuma ateya yoi linilamaki.

⁸Ko Petelo amufola, ate, Onsumole, yombo otekyaki lisala l’otuy’one? Aamba, ate, O, nk’otuy’oko.

⁹Koko Petelo amokutwela, ate, In’afe bomolambana lacina bomeke Bolimo bona Nkolo lacina nai? Lenda, bakak’aniyo banokunjaka bome’one bayali nk’en’ofolo, ko bangokotol’e en’anza.

¹⁰Ko aokwa en’akaka bana Petelo nkwaho, ko aowa nko tu; ko eneki befenga otuaka, bamosungy’oka amosila liwa; ko bamofodya, ko bamokunja mbolimboli l’ome’onande.

¹¹Ko losomo mene lokwela ekelesia ehatu, ko l’ato bahatu banokaki baoyi’ane.

¹²Ko bike bona ndembi la bikambwa bina mpefa bilama eneyali bato l’akasa ban’ikima; ko iyatu bayaaki la lokanyi lomoko ena mbalasai ena Solomona.

¹³Efan’omoko ona bato’akina onosokolanga aambane l’iyo; ohonde bato mene bamakumya;

¹⁴ohonde banimedya baambanaki la Nkolo, nko bik’ike bona mpame l’on’ayato;

¹⁵baofodya nko le banawa nkangi ena mboka, ko bamaetsa ena ntange l’ena totunda, lacin’eho eneta Petelo omok’omoko’oniyo afomwa lilila linande.

¹⁶Ko bik’ike bon’ato ban’enyanga benoli la Yelusalema baoya; baoya l’ato banawa nkangi, ko l’iyo banenaki bino l’afoi bana nsefo; ko baika nk’iyatu.

¹⁷Koko nkanga iyome aemala, l’ende l’iy’anayaaki l’ende—nko boloi bona Basadokeko baolola l’ekuku,

¹⁸baunda bikima, ko bamaekela en’otumba bon’enyolo.

¹⁹Koko ekima ena Nkolo aokombola nkombo ina botumba bon’enyolo l’oco, ko eneki’nd’oafodyaka, aila, ate,

²⁰Bocoaka, boyemale en’otumba bona Yakomba, boyosumole bato baoyi bahatu bana Eikedyo ene.

²¹Ko enek’iy’ookaka yoi liho, baotua en’otumba bona Yakomba l’ikulukulu mene, ko baolak’ato. Koko nkanga iyome aoya, l’iy’anayaaki l’ende, ko baosusanya likita lina bingambe ko la boloi bona balimo bana ban’ana Yisalaele, ko baotom’onyua en’otumba bon’enyolo lacina bayi l’iyo.

²²Koko eneki police oyelaka en’otumba bon’enyolo, batasungedya; ko bautwa la mbusa,

²³iy’ate, Tosungyaki botumba bon’enyolo bokombi bolotsi, ko batombanyi baemali ena befolo; koko enek’is’okombolaka nkombo, totasungy’oto.

²⁴Eneki capitaine en’otumba bona Yakomba la nkanga iyome ookaka baoyi’ane, baokandakanda bike lacin’ena baho, Mbo yoi line lingoyela nde meya?

²⁵Nkwaho amoi aoya, amasumola, ate, Lenda, bato’aho banak’in’oekelaka en’otumba bon’enyolo baemali en’otumba bona Yakomba, bayalake bato.

²⁶Koko capitaine aocoa la police, ko aoya l’iyo, ohonde efana la locili, lacin’oka baangaki bato, bato batongofusel’iyo baufe.

²⁷Ko enek’iy’oyaka l’iyo, bamaemadya ena ntoto ena likita lina bingambe. Ko nkanga iyome amaufola, ate,

²⁸Iso totakosumola nd’ino botalakake lakina ena lina line? koko lenda, bomolodya Yelusalema la lilako linino, ko bolang’oka botokoiy’iso likambo lin’ewedi ben’oto’one.

²⁹Koko Petelo la bikima baamba, iy’ate, Akoli eneyal’iso timedya Yakomba, efa bato.

³⁰Yakomba ena bafango’aniso aetolaki Yesu en’ewedi, nk’ende onok’in’oyakaka, enek’in’oakak’ende en’ote.

³¹Koko Yakomba amiledy’ende en’ili bona likasa linande y’ome, lacina ayalame Lifoka mene la Boiki, ko lacina ayofa Yisalaele eumbelo en’aoyi’owe ko l’etungwelo en’aoyi’owe.

³²Ko iso toyali temoins inande ina baoyi’ane, iso la Bolimo bon’olotsi onoki Yakomba ofak’iyatu banomimedya.

³³Koko enek’iy’ookaka baoyi’ane, baosungwa la nkele bike, ko baang’eango lacina baayake.

³⁴Koko Bofalusi’omoi, lina linande lika Ngamaliele, bolaki’ona basangya, onoki bato bahatu okumyaka, aemala ena likita, ko aila ate bikima bafodyamake isisali.

³⁵Ko aosumola likita, ate, Ino bato bana Yisalaele, kuma botakambe yoi, boongya likanela bokotua bonong’in’okamba l’ato’ane.

³⁶Lacina en’oso’ale Teuda aemalaki, ko ayokumyaki’oka ande boto’on’okolo, ko bike bona mpame yoka bekam’enei baambanaki’ale l’ende; endamene ayakamaki, ko iyatu banofikaki baofalangasana, ko ekambwa eniyo esilaki.

³⁷Ko ena mbus’eho, boto’omoi oka Yuda aemalaki en’esike en’etengelo ena baina, ko asumaki bato bike eneyal’ende; koko ende awaki nkoho, ko iyatu banofikaki baofalangasana.

³⁸Koko isanga lakosumol’ino, emite, Bocika bato’ane, ko botilelak’iyo yoi, lacin’oka yombo eango ene l’ekambwa ene eyali en’ato, engeha nko tu;

³⁹ohonde yombo eho eyali nk’ena Yakomba, ino bofinyaki yehyi sa eho tu, botongoyenya yoka bato banafomana la Yakomba.

⁴⁰Ko baimedya yoi linande; ko enek’iy’oelelaka bikima, bamafoma mpomi, ko bamasimba, batatendake ena lina lina Yesu, ko bamatungola.

⁴¹Koko iyo bauma ena likita lina bingambe kuma bayanyangele, lacin’oka baandamaki yoka bato banakoli oyena bino bina nsoi lacin’ena lina lina Yesu.

⁴²Bina l’ina bataambya lilaka bato ko bataambya lisekodya bosimo bona Yesu Masiya en’otumba bona Yakomba ko l’en’etumba.