Read ngando Bikambwa Biniki Bikima 6 Bible Online

Bikambwa Biniki Bikima 6 - ngando bible

Bikambwa Biniki Bikima 6

¹En’ina beho, eneki laali lona bakili ofulaka, Ba-Yuda banotwaki ena Elene baoningelaningela Ba Ebele, lacina baolefela bayato’aniyo bana beweli enek’iy’okafaka toma bina l’ina.

²Ko ba-jo l’afe baelela bik’ike bon’akili eneyal’iyo, ko baila, iy’ate, Efakoli l’iso lacina tocike yoi lina Yakomba ko tosale mesa.

³Inoamene, bifili, bosona eneyal’ino bato nsambo bana lokumo lon’olotsi, banalola la Bolimo bon’olotsi la bomwu, ko tongaf’iyo ekambelo en’ekambwa ene.

⁴Koko isoamene tongoyala la locinji en’oondo, ko l’en’ekambelo ena Yoi.

⁵Ko bato bahatu baimedya yoi liho bolotsi, ko baosona Setefano, nko boto onololaki l’imeedyo ko la Bolimo bon’olotsi, la Filipo, la Pulokolo, la Nikanola, la Timona, la Palumena, la Nikolao, bofenda onohalingwaki bise Yuda ena Antioka.

⁶Bamaila en’oso bona bikima, ko iyo, enek’iy’oondaka, baotadya bakas’aniyo eneyali bato’aho.

⁷Ko yoi lina Yakomba yolinda; ko laali lona bakili lofula ena Yelusalema nko mpula mene; ko bike bona nkanga nkoho baimedya bosimo’oho bon’imeedyo.

⁸Ko Setefano aolola l’isei ko la locili, aokamba bikambwa bina mpefa la ndembi mene en’oso bon’ato.

⁹Koko bamoi banayaaki ena sunagoga enetangamaki eniyo Banatungwaki, la Ba-Kulene, la Ba-Alesandulia, la Ba-Kilikia, la Ba-Asia, baemala, ko baatsa Setefano ntango.

¹⁰Ohonde batakolana likutolisa bomwu la Bolimo bonoki’nd’otendaka.

¹¹Nkwaho baof’ato’a moi nyongo, ko bato’ako baila, Mbo iso tomoka eneki’nd’osaiyaka Mose ko la Yakomba besao mene.

¹²Ko baosombanya bato ko la bingambe la batengi ban’ekanda, ko baoya eneyal’ende, ko bamuunda, ko baoya l’ende en’oso bona likita lina bingambe.

¹³Ko baemadya temoins ina mpoci banilaki, iy’ate, Boto’one afaedya litembola edye ene ena en’oeka ko la basangya nkoho;

¹⁴lacin’oka isoamene tomooka kum’ayile, ate Yesu ona Nazaleta angehya esanga ene, ko angocikitanya bekotua beneki Mose otocikelaka.

¹⁵Ko iyatu banakisak’ase ena likita lina bingambe, enek’iy’olendak’ende l’aiso’aniyo ta, baen’elongi enande yoka bosamb’onoyali elongi en’ekima ena loola.