Read ngando Bikambwa Biniki Bikima 7 Bible Online

Bikambwa Biniki Bikima 7 - ngando bible

Bikambwa Biniki Bikima 7

¹Ko nkanga iyome amufola, ate, Baoyi’ane bayali nde solosolo?

²Ko aila, ate, Ino, bifili la bafango, bolofaka: Yakomba ena Mpamba aenyaki’ale eneyali bafango’oniso oka Abalayama kum’ayali ena Mesopotamia, kum’atayele ena Alana;

³ko amosumola, ate, Umaka en’onyang’one, cika bais’ola’ane, ko yaka en’onyanga bonongi’m’okotuma.

⁴Nkwaho auma en’onyanga bona Kasada, ko aoyala ena Alana; ko eneki bafango’onande owaka, Yakomba amotola en’onyanga bone bonatong’ino isanga.

⁵Koko atof’ende lisango meho nko tu, efana nko le isisali ineyikamela likaka limoko; ohonde amoseinbya esemba, ate angof’ende l’an’anande ena mbusa enande bonyang’oho, boyalame boniyo locela, kang’ende atot’ona en’esik’eho.

⁶Yakomba atendaki yok’osamb’oho, ate ban’anande bangoyala befenda en’onyanga bonofey’iyo, ko bangokafama yoka baombo en’onyang’oho, ko bangen’ino mbula bekam’enei.

⁷Ko Yakomba ate, Emi nongosisodya bato’aho banangaila ena yombo; ko ena mbusa en’aoyi’aho bangofola, ko bangonkambel’emi bikambwa en’edye ene.

⁸Ko aoteela Abalayama lisangya, nko lina nkesa ena yonge; ko Abalayama aota Isaka, ko amokesela yonge en’ina bona mwambi; ko Isaka aota Yakobo, ko Yakobo aota bingambe jo la bife.

⁹Ko eneki bingambe ookaka Yosefa ekuku, bamokafa en’Ejipeto, ohonde Yakomba ayaaki l’ende;

¹⁰ko Yakomba ameelingitola en’aoyi bahatu bana bino banaki’nd’oenaka, ko amoatela isei la bomwu en’oso bona Falo, lifoka lina Ejipeto, ko Falo amiila gouverneur ena Ejipeto ko l’en’otumb’onande bohotu.

¹¹Nkwaho loci mene lona njala la bino mene bin’okolo baokwela bonyanga bohotu bona Ejipeto l’ona Kanana; ko bafango’aniso batasungya toma tona ndaka.

¹²Koko eneki Yakobo ookak’oka bopunga boyali ena Ejipeto, aotoma bafango’aniso meho botoma bon’oso.

¹³Koko ena botoma bon’efe Yosefa aeyana l’atoolo’anande, ko bomboi bona Yosefa beyana la Falo.

¹⁴Ko Yosefa aotom’ato, aelela eneyal’ende Yakobo bafango’onande ko l’anotwa l’ende bahatu, bato ntuku nsambo l’atano.

¹⁵Ko Yakobo aokita ena Ejipeto, ko aowa meho, ende l’afango’aniso;

¹⁶ko baotolama meho ena Sekeme, ko baokunjama ena nketa eneki Abalayama osombaka l’otuya bona francs eneyali ban’ana Amola ena Sekeme.

¹⁷Koko eneki esike en’esemba eneki Yakomba osembedyaka Abalayama oolamaka, bato baofula, baosokwa bike mene en’Ejipeto,

¹⁸yengoko Lifoka limoi aemala en’Ejipeto onoteya Yosefa.

¹⁹Ende aotungya ecimo eniso’ale totungya mene, ko aenya bafango’aniso bino, amaila, ate bafodyake ban’aniyo lacin’eho bawu.

²⁰En’esik’eho Mose aotwa, ko ayaaki ona bokoka mene; ko bamoolola nsenza isaso en’otumba bon’afango’onande;

²¹koko eneki’nd’ofodyamaka, bon’ona Falo bon’oyoto amoambola, ko amoolola yoka bon’onandamene.

²²Ko Mose aolakama ena bomwu bohotu bona baise Ejipeto; ko ayaaki la locili en’aoyi bana ntenda ko l’en’ikambwa binande.

²³Ko eneki’nd’okwaka mbula ntuk’inei, mposa eoya en’otem’onande lacina acu oyengya bifili binande, nko ban’ana Yisalaele.

²⁴Ko eneki’nd’oenaka omoi’oniyo ayanyomame, amokambya, ko autodya nkele eneyal’ende onoonyomaki, koko aoyaka bise Ejipeto.

²⁵Ko aokanela ate bifili binande bangonongany’oka Yakomba angaf’iyo etungwelo l’akas’anande; ohonde iyo batafokola yoi liho.

²⁶En’ina bona loi aoyotuma eneyal’i yo kuma bayafomane, ko asokolanga aambany’iyo lakina en’efili, ko amaila, ate, Bifili, ino bototwa nde? bilelan’owe lacina nai?

²⁷Ohonde onilelaki efili enande bowe amoumola, ate, Onokiilak’e yoka lifoka la juge eneyal’iso oka nai?

²⁸Olanga nde onjak’emi, yok’onok’oyakak’oi bise Ejipeto?

²⁹Lacin’ena yoi line, Mose aolota, ko aoyalama bofenda en’onyanga bona Midiana, ko aota ban’afe bana mpame meho

³⁰Ko eneki mbula ntuk’inei oetaka, ekima ena loola aenya eneyal’ende ena sengelenge ena Lingonji lina Sinai, ena lombi lona nkoi inifetaki en’itete.

³¹Eneki Mose oenaka, aofefa l’ekambwa eho; ko eneki’nd’oolamaka oyena, lofoso lona Yawe loya eneyal’ende, loila, ate,

³²Emi nde nde Yakomba ena bafango’ane, Yakomba ena Abalayama, la Yakomba ena Isaka, la Yakomba ena Yakobo. Ko Mose ailima la losomo, atinya lilenda l’aiso.

³³Ko Yawe amosumola, ate, Umola tombwaku en’akak’ane, lacin’oka edye enemal’e edye ena lisangya nd’eho.

³⁴Solosolo mene emi mena bino bin’ato’anami banayali en’Ejipeto, ko moka bosao bonasa iyo, ko mokita oyatungola. Koko isanga yaka, nongokotom’e en’Ejipeto.

³⁵Koko Mose one onok’iy’okilaka, nk’ende onok’iy’oilaka, Mbo onokiilak’e lifoka la juge eneyal’iso oka nai? Yakomba aotoma nk’ende lacina ayalame lifoka la botungoli la likasa lina Ekima ena loola onenyaki eneyal’ende en’itete.

³⁶Boto’one amafodya meho, ko aokamba bikambwa bina mpefa ko la ndembi en’Ejipeto, l’ena Lose lona Ngola, ko l’ena sengelenge mbula ntuk’inei

³⁷One nko Mose oko onosumolaki ban’ana Yisalaele, ate, Yakomba angokeemaedy’ino bosumoli yok’emi nk’eneyali bato’aninoamene.

³⁸One nk’ende onoyaaki en’osolongano ena sengelenge l’Ekima onotendaki l’ende ena lingonji lina Sinai ko l’afango’aniso; nk’ende onotambaki baoyi mene banayaike lacin’eho atof’iso baho;

³⁹bafango’aniso batalang’oka baofike, ohonde baumol’ende eneyal’iyo, ko en’etem’eniyo bautwa la mbusa en’Ejipeto,

⁴⁰baosumola Alona, Mbo otonunwele yakomba iniso iningeta en’oso’oniso, lacin’oka Mose one onotofodyaki en’onyanga bona Ejipeto, tofanonganya bili bonoki’nd’ocoaka.

⁴¹Koko en’esik’eho baotula bon’ona ngombo, ko baoya oyolekedya idola eho mbeka, ko baonyangela bikambwa bin’akas’aniyoamene.

⁴²Koko Yakomba aoyosuma, ko amacika lacin’eho bakumya bikambwa biniyali ena loola; yoka bosamb’onoki yoi otengamaka en’okanda bon’osumoli, ate, Ino ban’ecimo ena Yisalaele, ena mbula iho ntuk’inei ena sengelenge, Ino bondekedyaki nde nyama iniyakamaki la mbeka?

⁴³Ko botolaki botumba bona Moloke, Ko l’ioto ina yakomba enino eka Lampana, Nko bifoya binik’in’onunolaka lacin’eho bokumya biho; Ko nongokotol’ino en’ili bona Babela.

⁴⁴Bafango’aniso bayaaki l’otumba bon’esenda bona ndembi ena sengelenge, yok’onoki’nd’okodyaka, nk’ende onotendaki la Mose, ate asale boho nko l’okotua bona lelelo loneloki’nd’oenaka.

⁴⁵Bafango’aniso batambaki botumba boho ena mbusa, ko bayaki l’oho, iyo la Yoswa, enek’iy’osangolaka benyanga bena Befenda, beneki Yakomba oitanyaka en’oso bona bafango’aniso yengoko bina bena Dawidi;

⁴⁶ende aokumyama en’oso bona Yakomba, ko aufola lacin’eho akembela Yakomba ena Yakobo eyaelo.

⁴⁷Koko Solomona amofakela botumba.

⁴⁸Ohonde Onoleki nko Ndeka afatonge en’etumba benefakama l’akasa, yoka bosamb’onila bosumoli, ate,

⁴⁹Loola loyali ieko inami ina lifoka, Ko loko nko limbolongo lin’akak’anami. Yawe ate, Bongompakel’emi botumb’oka nai? Ko edye ena lifomya linami eyali oya?

⁵⁰Likasa linami litanunola nde bikambwa bine bihitu?

⁵¹Ino bato bana bocilingitano la banatakesama yonge en’etema l’en’atoi! ino boatana l’olimo bon’olotsi bina l’ina Yok’onoki bafango’anino okambaka, ino bokamba nk’osamb’oho.

⁵²Bosumoli onotanyomama l’afango’anino ayali meya? ko bayakak’iyo banasumolaki Eyelo enande Onokolana nko Nkolana, nk’ende onok’in’oangelaka ko onok’in’oyakaka tu;

⁵³in’ana tambaki basangya banafamaki la bikima bina loola, ko botamonya baho tu.

⁵⁴Enek’iy’ookaka baoyi’ane, baosungwa la nkele, ko baokenyanya baino’aniyo eneyal’ende.

⁵⁵Koko ende aolola la Bolimo bon’olotsi, aolenda ena loola ta, ko aena bokombe bona Yakomba, ko la Yesu aemali en’ili bona likasa y’ome lina Yakomba,

⁵⁶ko aila, ate, Lenda, lena loola lokombwa, ko la Bon’on’oto aemali en’ili bona likasa y’ome lina Yakomba.

⁵⁷Ko iyo baololua la lofoso lona lokolo, ko baolind dya batoi’aniyo, ko baindimwa eneyal’ende la lokanyi lomoko;

⁵⁸bamofodya ena mbiolo en’onyanga, ko bamofusela baufe. Ko temoins baambya bisend’iniyo en’akaka ban’ofeng’omoi onotangama Saula.

⁵⁹Ko baoyaka Setefano la baufe, kum’ayaonde Nkolo, ate, Nkolo Yesu, tamba bolimo’onami.

⁶⁰Ko aun’aongo, ko aololua, ate, Nkolo, tafak’iyo likambo lacin’ena yoi line lin’owe. Ko eneki’nd’otendaka yok’osamb’oho, aetama.