Read ngando Bikambwa Biniki Bikima 8 Bible Online

Bikambwa Biniki Bikima 8 - ngando bible

Bikambwa Biniki Bikima 8

¹Ko Saula aimedya bewedi’enande. Nkwaho binyomeio mene bimatsaki en’in’oho eneyali ekelesia eneyaaki ena Yelusalema; ko bakili bahatu baofanda fanda en’enyanga bena Yudea la Samalia, umola nko bikima.

²Ko bato’amoi, bakumi bana Yakomba, baokunja Setefano, ko bamolela bike mene.

³Koko Saula aehya ekelesia nko mbehya mene; aotua en’etumba behetu, aokudya le mpame le bayato, ko amalekya ena botumba bon’enyolo.

⁴Yok’oho, iy’anafalangasanyi baoselasela bili l’ili, ko baosekodya bosimo bon’olotsi bona Yoi.

⁵Koko Filipo aokita en’ecimo emoi en’onyanga bona Samalia, ko amasumola bosimo bona Masiya.

⁶Ko bik’ike bon’ato baolofamela baoyi banaki Filipo otendaka nko la lokanyi lomoko, enek’iy’ookaka ko enek’iy’oenaka ndembi iniki’nd’okambaka.

⁷Lacin’oka bafoi bana nsefo baofola eneyali bato bike banayaaki la baho, baofola kuma bayalolua nko ndolua; ko bato bike banayaaki la nkangi ena nkenyenyala ko la bitumbe, baika.

⁸Ko enyanga eosokwa en’onyang’oho nko nsokwa.

⁹Koko boto’omoi ayaaki meho, lina linande lika Simona, onokambaki en’oso bikambwa bina liloka; ko aotatengya bato ban’onyanga bona Samalia, ko aoyofef’endamene boto’on’okolo.

¹⁰Ko iyatu bamolofamela, Mbo one ayali nko Mpamba eho ena Yakomba enetangama Bokolo.

¹¹Bamolofamela nko lacin’eneki’nd’oatatengyaka elela mene la baoyi’anande bana liloka.

¹²Koko enek’iy’oimedyaka bosimo bon’olotsi bonoki Filipo oasumolaka bona lifoka lina Yakomba ko la lina lina Yesu Masiya, bainama en’asi, le mpame le bayato.

¹³Ko Simona mene aimedya nkoho, ko ainama; ko aoyala la Filipo, ko eneki’nd’oenaka ndembi ko la bikambwa bina mpefa binikambamaki, aofefa.

¹⁴Eneki bikima banayaaki ena Yelusalema ookak’oka baise Samalia bamotamba yoi lina Yakomba, bamatomela Petelo la Yoane.

¹⁵Koko enek’iy’okitaka, bamaondela, lacin’eho batambe Bolimo bon’olotsi.

¹⁶(Lacin’oka Ende atakwele omoko’oniyo: bainamaki nko njina kei ena lina lina Nkolo Yesu.)

¹⁷Nkwaho baotadya bakas’aniyo eneyal’iyo, ko baotamba Bolimo bon’olotsi.

¹⁸Koko eneki Simona oenak’oka Bolimo bon’olotsi aofama la ntadya en’akasa ban’ikima, amayela francs,

¹⁹ate, Ompe mpifo eho nkoho, lacina boto l’oto onongi’m’otadya bakasa atambe Bolimo bon’olotsi.

²⁰Koko Petelo amosumola, ate, Francs ine iwake nko l’e! lacin’enek’okanelak’oka ongata nganji ena Yakomba nko la francs.

²¹Ofana likafo la liondo en’ekambwa ene tu, lacin’oka botem’one bofakolana en’oso bona Yakomba.

²²Lacin’eho, oyosume en’owe’one’one, ko onda Yakomba, yombo ongikyama en’eango eho eneyali en’otem’one.

²³Lacina emi len’oka oyali ena yombo lina bino ko l’ena bayaka bana bowe.

²⁴Ko Simona aamba, ate, Bombondele Nkolo, lacina baoyi’ako banam’in’otendaka batongonkwel’emi.

²⁵Koko iyo, enek’iy’olakak’ato lilako mene, ko baokumya Yoi lina Nkolo, bautwa la mbusa ena Yelusalema, ko baosekodya bosimo bon’olotsi en’enyanga bike bena Samalia.

²⁶Koko ekima ena Nkolo aosumola Filipo, ate, Emala, coaka en’ili bona Sud, ena mboka enuma Yelusalema ko eocoa Nganja: bili’oho boyali nko sengelenge.

²⁷Aemala, ko aocoa. Ko lenda, boto’omoi ona Etiopia, nko eunuko emoi onoyaaki la mpifo ena nkolo la Kandake, lifoka lin’oyoto lina Etiopia, botombanyi bona toma tonande tohatotu; ende ayaki ena Yelusalema lacin’eho akumya Yakomba;

²⁸ko autwa la mbusa, ko aokisase en’etoelo enande, kum’ayaande bokanda bon’osumoli’oka Yesaya.

²⁹Bolimo aosumola Filipo, ate, Coaka oyambane l’eteolo eho.

³⁰Filipo aocoa la laango eneyal’ende, ko amooka kum’a yaande bokanda bon’osumoli’oka Yesaya; ko amufola, ate, Ononganya nde baoyi banand’e?

³¹Ate, Iya, nongeya bosamb’oya, yengoko boto’omoi andaka ncina en’aoyi’ane? Ko aelela Filipo, ailele, ko akisase l’ende.

³²Etenyi en’okanda eneki’nd’oandaka eh’ene: ate, Aotolama yoka mpate en’eyakelo; Ko yoka bosamb’onoyali bon’ona mpate onoyali en’oso bona bokesi’onande bona besa, afatende, Nk’osamb’oho ende atamumola nko le bonyua’onande.

³³En’esonjelo enande baofimaki etendelo ena likambo; Ko onongenyanya eotwelo enande oka nai? Lacin’oka liiko lonande loumolama ena loko.

³⁴Koko eunuko aufola Filipo, ate, Lakoonda, onsumole, bosumoli atenda yoi line lacin’ena boto oka nai? lacin’enandamene, yombo lacin’en’oto’okina?

³⁵Koko Filipo aomumola bonyua bonande, aomatsa en’etengelo ene ena Yakomba, aosumol’ende bosimo bon’olotsi, nko bona Yesu.

³⁶Nk’enem’iy’ocoa ena mboka, baena basi’amoi; ko eunuko aila, ate, Lenda, basi bayali: yoi lineyampeky’emi mpiname en’asi lika nai?

³⁷(Filipo amosumola, ate, Nk’iimedya l’otem’one bohotu, ombinama. Aamba, ate, Limedy’oka Yesu Masiya ayali Bon’ona Yakomba.)

³⁸Aemadya etoelo nkwaho; ko baopusola en’asi, le Filipo le eunuko, ko amiina en’asi.

³⁹Ko enek’iy’otefwaka en’asi, Bolimo bona Nkolo aumola Filipo, ko eunuko ateena lakina, aocoa mboka enande nko l’enyanga.

⁴⁰Ohonde Filipo aosungyama ena Azoto; ko enem’end’ofolanya aosekodya bosimo bon’olotsi en’enyanga behetu, yengoko aoyela ena Kaisalia.