Read ngando Bikambwa Biniki Bikima 9 Bible Online

Bikambwa Biniki Bikima 9 - ngando bible

Bikambwa Biniki Bikima 9

¹Koko Saula aokusa lifodya baoyi bana biano la njaka eneyali bakili bana Nkolo; ko aocoa eneyali nkanga iyome,

²ko amufola bekanda eneyali besolongano bena basunagoga bana Damaseke, lacin’eho yombo angosungya bato banayali bana Mboka meho, le mpame le bayato, ayi l’iyo ntungama ena Yelusalema.

³Enem’end’ocoa, aolama la Damaseke; ko kaimo fololo mene ena loola eololoma eneyali ende nko sole.

⁴Ko aokwa ena loko, ko aoka lofoso lonelolokwel’ende ate, Saula, Saula, onnyom’emi lacina nai?

⁵Aamba, ate, Nkolo, E nai? Nkolo aamba ate, Emi nko Yesu onanyom’e; (eyali locili eneyali e ofomana la tosongo.

⁶Ende ailima, ko aofefa, aila, ate, Nkolo, olanga njile’oya? Ko Nkolo amosumola, ate,) Emala, fola en’onyanga, ko ongolakama baoyi banakolana l’e lacina oile.

⁷Bato banakendaki l’ende baemala nko la losomo, lacin’oka baoka lofoso, ohonde baten’oto.

⁸Koko Saula aemala ena loko, ko eneki baiso’anande olifwaka, atena tutu; ko bamosuka l’akasa, ko bamoyedya ena Damaseke.

⁹Bin’esaso ende atena tu, ko atal’iyema, ko atamela.

¹⁰Bokili’omoi ayaaki ena Damaseke, lina linande lika Anania; ko Nkolo amosumola en’enelo, ate, Anania! Ende ate, Em’one, Nkolo.

¹¹Ko Nkolo amosumola, ate, Emala, coaka ena mboka enetangama Cilili, ko ufola meho en’otumba bona Yuda, boto onotangama Saula, bise Taluseu; ienda, ayaonde.

¹²Ko amena en’enelo boto onotangama Anania ayatua, ko ayatadya likasa eneyal’ende lacin’eho aene lakina.

¹³Koko Anania aamba, ate, Nkolo, moka eneyali bato bike bokotua bon’oto’one, la baoyi ban’owe bike banaki’nd’oilelaka bato’ane ban’oeka ena Yelusalema;

¹⁴ko isanga amofam’etelo la nkanga iyome lacina aunde bato bahatu banelela lina line en’oondo.

¹⁵Ko Nkolo amosumola, ate, Ombocoa, lacin’oka ende ayali emunyi eneki’m’osonaka, lacin’eho atole lina linami en’oso bona Befenda l’en’oso bona bafoka bana rois, ko l’en’oso bona ban’ana Yisalaele;

¹⁶lacin’emi nongotum’ende baoyi bahatu bana bino binikoli l’ende lacina aene lacin’ena lina linami.

¹⁷Ko Anania aocoa, ko aotua en’otumba; aotadya bakasa eneyali ende, ate, Efili Saula, Nkolo mene, nko Yesu onenyaki eneyal’e ena mboka enem’oyaka, amontoma lacin’eho oene lakina, ko lacina olole la Bolimo bon’olotsi.

¹⁸Ko isasanga bamongoci yoka mpasi baokwa en’aiso’anande, ko aena nko njena; aemala, ko ainama en’asi;

¹⁹ko eneki’nd’olaka toma, aokika ena yonge; Ko Saula aoyala bina bemoi l’akili banayaaki ena Damaseke.

²⁰Ko isasanga aokumya Yesu ena basunagoga, aila, ate, Yesu ande Bon’ona Yakomba.

²¹Ko iyatu banokaki baofefa, Mbo one afayali nde ende onehyaki iy’anelelaki lina line en’oondo ena Yelusalema? ko ataya nde mendo lacin’eho atol’iyo ntungama en’oso bona nkanga ina toome?

²²Koko Saula aofula la locili, aokoiya Ba-Yuda banatongaki ena Damaseke ena ntango iniyo, eneki’nd’oatumaka solosolo one ayali nko Masiya.

²³Eneki bina bike oetaka, Ba-Yuda baang’eango lacin’eho baoyake;

²⁴ohonde eango eniyo eeyana la Saula. Baotombanya befolo l’ane l’oco lacin’eho baoyake;

²⁵koko bakili bamotamba l’oco, bamosonga en’ifondo inay’okolo, ko bamokitsa en’ili bona bokako bona baufe.

²⁶Ko eneki Saula oyelaka ena Yelusalema, aomeka lacina aambane l’akili; koko iyatu baang’ende nko mbanga, lacin’iyo batimedy’oka ende ayali bokili solosolo.

²⁷Ohonde Balunaba amotamba, ko aoya l’ende eneyali bikima, ko amasumola bokotua bonoki’nd’oenaka Nkolo ena mboka, ko l’okotua bonoki Endamene otendaka l’ende, ko l’okotua bonoki’nd’osekodyaka bosimo bon’olotsi ena lina lina Yesu nko la nkaso kum’ayali ena Damaseke.

²⁸Koko Saula ayaaki l’iyo ena Yelusalema, ayatua ko ayafole,

²⁹ko ayatende la nkaso ena lina lina Nkolo Yesu; aotenda la Ba-Elene, ko amaatsa ntango, koko iyo baofon’etelo lacina bao yake.

³⁰Koko eneki bifili oeyaka yoi liho, baoya l’ende ena Kaisalia, ko bamotoma ena Taluseu.

³¹Nkwaho bikelesia bina Yudea ehatu, la bina Ngalilaya, la bina Samalia biyaaki la mwi, ko biokika nko nkika mene; ko baokenda en’ekumedyo ena Nkolo l’en’ecicimwedyo ena Bolimo bon’olotsi, ka baofula nko mpula.

³²Ko eneki Petelo otianyaka benyanga behetu, aoya eneyali ban’oeka banatongaki ena Luda nkoho.

³³Aosungya meho boto’omoi onotangama Ainea, onotuma ena ntange enande mbula mwambi, lacin’oka ayaaki la nkangi ena nkenyenyala.

³⁴Petelo amosumola, ate, Ainea, Yesu Masiya akiikya; emala, oyotande ntange ene. Ko isasanga aemala.

³⁵Ko iyatu banatongaki ena Luda l’ena Salona bameena, ko baohalingwa eneyali Nkolo.

³⁶Koko bokil’omoi bon’oyoto ayaaki ena Yafo, lina linande nko Tabita (Tabita nk’eyoka Doluka); boyoto’oko aokama la bikambwa bin’olotsi la bin’isei biniki’nd’okambaka.

³⁷Koko en’ina beho aambola nkangi, ko aowa; ko enek’iy’osongaka boduo, bamoambya en’etenyi ena liko.

³⁸Luda eyaaki nk’ena mbolimboli la Yafo; ko eneki bakili ookak’oka Petelo ayali meho, bamotomela bato’afe, baineelela, atalingalingake liya eneyal’iyo.

³⁹Petelo aemala, ko aocoa l’iyo. Ko eneki’nd’oyaka, bamoyedya en’etenyi ena liko; ko bayato bana beweli bahatu baemala mbolimboli kuma bayalele, ko bamotuma bekoto bena bekotua l’ekotua beneki Doluka otelaka kum’ayali l’iyo.

⁴⁰Petelo amafodya iyatu, ko aun’aongo, ko aonda; ko aohelengwa eneyali boduo, ate, Tabita, etwa. Ko ende aolifola baiso’anande, ko enem’end’oena Petelo aetwa.

⁴¹Petelo amofa likasa linande, ko ameemadya; ko aelela ban’oeka la beweli, ko amolekya eneyal’iyo nko mbika.

⁴²Ko yoi liho yeyana ena Yafo endotu, ko bato bike baimedya Nkolo.

⁴³Ko Petelo aoyala bina bike ena Yafo eneka Simona, boaki bona bikoto.