Read ngando Ba-Loma 1 Bible Online

Ba-Loma 1 - ngando bible

Ba-Loma 1

¹Paulo, boombo bona Yesu Masiya, onelelama lacin’eho ayalame ekima, ko onekyama lacina asumole bato bosimo bon’olotsi bona Yakomba;

²bonoki’nd’osembyaka esemba en’oso l’asumoli banande en’ekanda bona Yakomba ben’oeka,

³lacin’ena Bon’onande, onotwaki en’ecimo ena Oawidi bosamb’onoyali yonge,

⁴koko aokumyama Hon’ona Yakomba la locili, bosamb’onoyali Bolimo bon’okonde, nko l’eetwelo enek’ato banawaki, Yesu Masiya Nkolo eniso,

⁵iso toat’isei la lifoka lin’ekima l’ende, lacin’ena mpika en’imeedyo ena ntoto ena baise’enyanga bahatu, lacin’ena lina linande.

⁶Koko ino boyali ena boloi’oniyo nk’osamb’oho, in’anelelama lacin’eho boyalame bana Yesu Masiya; Masiya;

⁷eneyal’iyatu banayali ena Lomo banalangama la Yakomba, ko banelelama lacin’eho bayalame ban’oeka; Isei la mwi eneyal’ino eneyali Yakomba. Bafango’oniso la Nkolo Yesu Masiya

⁸En’oso, lakanga Yakomba enami lokango la Yesu Masiya lacin’en’inatu, lacin’oka bosimo bon’imeedyo inino bomosumolama en’enyanga behetu.

⁹Temoin enami nko Yakomba, onasael’emi l’olimo’onami en’osimo bon’olotsi bona Bon’onande, lakoand’ino ena beondo’enami efana mpomya;

¹⁰laonda bisik’ine lacin’eho mbate lingu etelo oya eneyal’ino, yombo eango ena Yakomba eyali yok’osamb’oho.

¹¹Lacin’emi loka mposa mene oyokeen’ino, lacina nkoambedy’ino nganji emoi en’olimo, lacina bocidyame;

¹²lacina tokikyane, emi l’ino, l’imeedyo iniso, l’inino linami.

¹³Koko mpalange lacin’ino boyalame nk’eyoka bofeya, bifili, njaaki la lisangya bisike bike lacina nje eneyal’ino (koko mpekyamaki), lacina mbate bemamo bemoi eneyal’ino, yoka bosamb’onat’emi eneyali fiefenda bemoi.

¹⁴Njali la nyongo eneyali Ba-Elene l’eneyali Basenji, ko l’eneyali bana bomwu l’eneyali iy’aninda bomwu.

¹⁵Lacin’eho, yoka bosamb’oniny’emi, lakolana oyokosumolino banayali ena Loma nkoho bosimo bon’olotsi.

¹⁶Lacin’emi mpoke bosimo bon’olotsi nsoi: boho boyali mpamba ena Yakomba enikya boto l’oto onimedya: Bise-Yuda en’oso, koko Bise Elene nk’osamb’oho.

¹⁷Lacina mbongi ena Yakomba emenya la boho en’imeedyo nk’eneyali imeedyo, yoka bosamb’onoyali yoi linalitengi: Koko bana mbongi bangika l’imeedyo.

¹⁸Lacina nkele ena Yakomba emenya ena loola, nkele enefekya baoyi bahatu banafasangi la Yakomba, la biinda bona mbongi bon’ato banasimba solosolo eho la baoyi baninda mbongi,

¹⁹lacin’oka baoyi bana Yakomba baneyana bamenya eneyaliyo, eneki Yakomba oatumak’iyo.

²⁰Lacina baoyi’atiande banatanya en’enunwelo ena lokonko mpamba enande la lifoka linande lina Yakomba— baoyi’aho bamenya fololo, ko bameya na l’ikambwa bininunolama; ko iyo bafana nkuto;

²¹lacina iyo baeyaki Yakomba, koko batakumy’ende yoka Yakomba, ko batokanga lokangof koko bayalamaki bototoloto ena ntango iniyo, ko bilima bokwelaki betem’eniyo benetaata bomwu.

²²Bailaki iy’ate bayali la bomwu, obonde ba yalamaki tolemeleme mene,

²³ko bahalingolaki bokoka bona Yakomba onofawu lacina boho boyalame ekolanya en’efoya en’oto onowa, k’l’ena mpulu, l’ena nyama, l’ena towawa tonatoyosumela.

²⁴Lacin’eho, Yakomba amolaumbela lacina bakilane la mpo sa inileki ina betem’eniyo, lacina bakambe baoyi bana nselo, ko lacina baehya baonge’aniyoamene;

²⁵enek’iy’oenganyaka solosolo ena Yakomba la yoi lina mpota, ko bafikaki ko basaelaki bikambwa bininunolamaki; batafika Honunoli ononunolaki biho, onokumyama bisike l’isike. Ndoho.

²⁶La ncin’ene, Yakomba amolaumbela lacin’eho baitane la mpo sa ina nsoi mene, eneki bayato’aniyo ohalingolaka bokotu’oniyo bon’oyoto bonakolana, ko bailaki bokotua bonofakolana l’oyoto;

²⁷ko mpanie nk’osamb’oho, bacikaki bokotua bon’ayato bonakolana, ko iyoamene baokanaki mposa iniseki’owe, mpame la mpame imoi bayakambe baoyi banaseki nsefo, ko bayatambe eneyal’iyoamene boluko bonokoli l’ikambwa biho bina nsoi.

²⁸Koko yoka bosamb’onotalang’iyo lacina baeye Yakomba, ende aumbelak’iyo lacina bakile nkanyi ina bofedya, lacina bakambe bikambwa binifakolana.

²⁹Betem’eniyo beolola l’aoyi baninda mbongi, ko la lofundo, ko la mposa en’osolo eneleki, ko la nkele ena locinji; baolola to l’ekuku, la njaka en’ato, ko la lisa, ko litungya, ko l’osulu; bayali basayi,

³⁰la batangi, la baokyi’owe bana Yakomba, la baehyi ban’ato, ko bayali la njengodya, la njofefa, bayali banunoli ban’aoyi’owe, banafafike bafango la nyango,

³¹baninda bomwu, banatudya bisemba, banafana nganji eneyali bais’ola, ko banafan’isei;

³²baho bamoya boeka bona Yakomba, nk’oka iy’anayakambe baoyi’aho bakoli l’ewedi; ohonde bambokamba nko baoyi’aho, ko baimedya bato’amoi banayakambe nk’osamb’oho.