Read ngando Ba-Loma 12 Bible Online

Ba-Loma 12 - ngando bible

Ba-Loma 12

¹Lacin’eho, lakoond’ino, bifili, la tosei tona Yakomba, lacina bolekya baonge’anino mbeka iniyaike, inekyama en’oeka, initangama bolotsi eneyali Yakomba; ekumedyo ena Yakomba enakolana l’ino nd’eho.

²Botakilanake l’okotua bon’esik’ene la njokola, ohonde bohalinywa la nnunola lakina ena nkanyi inino, lacinaho bofokole eango ena Yakomba en’olotsi, eango enetangam’olotsi ko l’enonga.

³Lacin’emi lila, lacin’en’isei inifama eneyal’emi, emite, boto l’oto’onino atayofefake ena lokanyi lonande, l’okotua bonofakoli l’ende; ohonde akanelake lokanyi lonakolana, l’okotua bonoki Yakomba okoedyaka boto l’oto lelelo lon’imeedyo.

⁴Yoka bosambo bonat’iso bilama bike ena yonge limoko, ko bilama bihitu bilayali l’osala bon’okotu’omoko;

⁵nk’osamb’oho iso, kanya toyali bike, toyali yonge limoko eneyali Masiya, ko boto l’oto ayali nk’elama.

⁶Koko tomofama nganji inicikitana bosamb’onoyali isei inifamaki eneyal’iso, yotabo mpoladya ena baoyi bana Yakomba, tilake eho yoka bosamb’onoyali lelelo lon’imeedyo;

⁷yombo ekanibelo en’ekambwa, tokambake; ko ende onolaka, alakake lilako;

⁸yombo boto’omoi asomy’ato ena lilako, asomyake. Ende onof’ato nganji, aafake ibo l’otem’omoko; onilama ena lifoka, asalake bosala bona lifoka liho la locinji; onokamel’ato isei, aokake isei l’enyanga.

⁹Nk’ookamel’ato nganji, nganji eho etaatake bosimo. Bokilaka bowe nkila mene; bundamela nk’olotsi.

¹⁰Ena likambo lina nganji ena bifili, bokanaka nganji bike; boongya lifikana mpika.

¹¹Botakambake ekambwa la bofedya; boyalamaka la mposa en’olimo; bosaela Nkolo.

¹²Bonyangela ena lolengedyo; botalembwake en’esike ena nyoma; bocindelana bina Lina ena beondo.

¹³Hokambya ban’oeka bana Masiya ena biinda bonind’iyo, bosangela befenda.

¹⁴Bosakel’iyo banatonyom’ino bosako: bosak’osako, botamomake.

¹⁵Bonyangela l’iy’ananyangela; bolela l’ikanelela.

¹⁶Boyalamaka la lokanyi lomoko en’atenyi’aninoamene. Botatomake nkanyi inino en’aoyi banakolek’ino, ohonde bambana l’iy’aninda lokumo. Botayotangak’inoamene bato bana bomwu.

¹⁷Botacindanyake boto l’oto bowe l’owe. Boongya yila baoyi banakoli nko nkolana en’aiso ban’ato bahatu.

¹⁸Yombo inoamene binya, bokend’efili l’ato bahatu.

¹⁹In’analangama, inoamene botutodyake nkele, ohonde bocikela nkele ena Yakomba mboka. Lacin’oka yoi limotengama, Mbutodya ena nkele eyali nk’enami; Yawe aila, ate, emamene nongutodya eho.

²⁰Koko yombo bookyi’owe bone aoka njala, ofe toma; yombo aoka mposa, omedy’asi; enil’e yok’osamb’oho ongotadya baala bana nko; en’ote’onande.

²¹Botakoiyamake l’owe; ohonde bokoiyaka bowe l’olotsi.