Read ngando Ba-Loma 14 Bible Online

Ba-Loma 14 - ngando bible

Ba-Loma 14

¹Bosangelaka boto onoyali bolu’olu en’imeedyo, ohonde efa lacin’eho boatane ntango.

²Boto’omoi aimedya ate akolana lila toma tohatotu; ko okina onoyali bolu’olu ala nko ndunda kei.

³Ende onola atasekake ende onofale, ko ende onofale ataakolake ende onola, lacin’oka Yakomba amolotamba.

⁴E onokoedya bosali bon’oto’okina baoyi oyali nai? Kang’aemala, kang’aokwa, nko likambo lina nyangetuke enandamene. Koko angemala, lacin’oka Yakomba sinya oyemadya.

⁵Boto’omoi akanela ate bina bomoi boleki bin’okina, boto’okina akanela ate bina behetu beyali nko kocu. Boto l’oto aongyake linonganya lokanyi lonandamene ena yoi liho.

⁶Onokanela bina botutuma, akanela boho lacin’ena Nkolo; ko ende onola toma ayale eneyali Nkolo, lacin’ende akanga Yakomba lokango; ko ende onofale, afale nk’eneyali Nkolo, ko akanga Yakomba lokango.

⁷Efan’oto’oniso onoyaike eneyal’endamene, ko efan’oto onowa eneyal’endamene.

⁸Yombo tika, tika eneyali Nkolo; ko yombo towa, towa eneyali Nkolo; lacin’eho, kanga tika, kanya towa, toyali nko bana Nkolo.

⁹Masiya awaki nko la ncin’ene, ko aikaki lakina, lacin’eho ayalame Nkolo eniy’anawaki ko l’eniy’anayaike.

¹⁰Koko e okodya baoyi ban’efili ene lacina na? ko lakina, e oehya efili ene lacina nai? lacin’oka isatu tongemala en’oso bon’ieko inatenda Yakomba bakambo.

¹¹Lacina yoi limotengama, Yawe aila, ate, Emi njaike, ko baongo l’aongo bangonjunamel’emi, Ko ndemi la ndemi ingokumya Yakomba.

¹²Yok’oho boto l’oto’oniso angolokola boloko bonandamene bona bikambwa binande eneyali Yakomba.

¹³Lacin’eho, tedyake likoedyana baoyi; ohonde bokodyaka yoi line, noka, boto atilake ekumbelo l’ekoi yelo eneyali yoka lofoka lon’ilonga ena mboka en’efili enande.

¹⁴Emi leya, ko botem’onami bofana ntango eneyali Nkolo Yesu, emite, efan’iyema iniyali nselo nk’ihoamene, yengoko eneyal’ende onotang’iho nselo, iyali nsefo eneyal’ende.

¹⁵Koko yombo efili ene aoka lokeseli lacin’ena toma tona ndaka, e ofakende lakina ena nganji ena ndanga. Tehyake boto onoki Masiya owelaka la toma tone tona ndaka.

¹⁶Botimedyake’oka bolotsi’onino botangame lotango lon’owe;

¹⁷lacin’oka lifoka lina Yakomba lilayali ndaka la mmela; liyali nko mbongi la mwi l’ekiko ena Bolimo bon’olotsi.

¹⁸Lacin’ende onokambela Masiya bikambwa la baoyi’ane aokya Yakomba ekiko, ko aimedyam’olotsi l’ato.

¹⁹Lacin’eho, akoli eneyal’iso titane l’aoyi bana mwi, ko l’aoyi banang’is’okikyana l’aho.

²⁰Tehyake ekambwa ena Yakomba lacin’ena toma tona ndaka. Toma tohatotu toyali soto solosolo, ohonde bowe lacina boto ayalame ekumbelo eneyali bato’amoi enal’ende toma.

²¹Bolotsi lacina ofale nyama, ko ofamele vina, ko ofile yoi lin’etaketaka linalingi efili ene okumba.

²²Imeedyo inayat’e, ongya liata ibo eneyal’eamene en’oso bona Yakomba. Ekiko eneyali boto’oho onofayokoiy’endamene likambo la yoi linimedy’ende bolotsi.

²³Koko ende onola kuma ayakandakanda amokoiyama likambo, lacin’oka afale l’imeedyo; yoi lin’etaketaka linifayali lin’imeedyo liyali nko bowe.