Read ngando Ba-Loma 15 Bible Online

Ba-Loma 15 - ngando bible

Ba-Loma 15

¹Akoli eneyal’iso banayali la locili totole tongitongi toniyo banafana locili, ko totilake baoyi banalang’isoamene.

²Boto l’oto’oniso ailelake boto onoli l’ende baoyi banalanga boto’oho lacin’eho aatel’ende bolotsi bonongokiky’ende locili.

³Lacin’oka Masiya mene atakamba baoyi banaki’ndamene olangaka, ohonde yok’onoki yoi otengamaka, ate, Ntango inik’iy’okotangak’e imonkwel’emi.

⁴Lacin’oka baoyi l’aoyi banatengamaki’ale batengamaki lacin’eho iso tolakame, lacin’eho toate lolendedyo lacin’ena locinji ko lacin’ena ncicimodya enatocicimodya bekanda bena Yakomba.

⁵Isanga ekoli lacina Yakomba ena locinji l’ena ekikedyo akof’ino lokanyi lacina boyalame la lokanyi lomoko eneyal’inoamene bosamb’onoyali Masiya Yesu;

⁶lucin’eho bokumya Yakomba la Bafango’ona Nkolo eniso Yesu Masiya la lokanyi lomoko ko la bonyua bomoko.

⁷Lacin’eho, botambanak’inoamene, yoka bosamb’onoki Masiya okotambak’ino, lacina Yakomba akumyame.

⁸Lacin’emi lakosumol’ino, Masiya amilama ona lifoka lina bosali eneyali iy’anakesama yonge lacin’ena solosolo ena Yakomba, lacin’eho akikya bisemba binisembyamaki eneyali bankya,

⁹ko lacin’eho Befenda bakumya Yakomba lacin’en’isei inande, yok’onoki yoi otengamaka; Lacin’eho nongokokumy’e ena ntoto ena Befenda, Ko nongembela lina line.

¹⁰Koko aila lakina, ate, Ino Befenda bonyangela l’ato’anande.

¹¹Ko lakina, Ino Befenda behetu bokumyaka Yawe; Ino bato bahatu bokumya nk’ende.

¹²Ko lakina Yesaya aila, ate, Boluo bona Yisai bongenya, Ko onongemala ena lifoka lina nkumu ena Befenda; Befenda bangolengedya nk’eneyal’ende.

¹³Yakomba ena lolengedyo akolodyake to l’ekiko ehatu ko la mwi en’imeedyo inimedy’ino, lacin’eho boate lolengedyo la mpula, nk’ena locili lona Bolimo bon’olotsi.

¹⁴Bifili binami, emamene l’ey’oka ino bolola la bongompolu, ko bomolodyama la nnonganya, ko bokolana liyolak’inoamene lilako.

¹⁵Ohonde emi lakusa likotengel’ino imbu lacin’eho nkootody’ino, lacin’en’isei iniki Yakomba ompaka,

¹⁶lacin’eho njalame bosali bona Masiya Yesu eneyali Befenda, lacina nkambe ekambwa en’osimo bon’olotsi bona Yakomba, lacina elekedyo ena Befenda eyalame mbeka enetangam’olotsi, enekyama en’oeka la Bolimo bon’olotsi.

¹⁷Lacin’eho, njali l’ekumedyo enami eneyali Masiya Yesu ena baoyi banayali eneka Yakomba.

¹⁸Lacin’emi mpakolana litenda lacin’ena bikambwa bimoi, umola nko biho biniki Masiya okambaka l’emi, lacin’ena efikelo ena Befenda, la yoi ko l’ekambwa,

¹⁹ena locili lona ndembi ko l’ikambwa bina mpefa, ena locili lona Bolimo bon’olotsi. Yok’oho mosidya lisekodya Bosimo bon’olotsi bona Masiya ena Yelusalema ko l’en’ekala benesambany’eho, yengoko eneki’m’osimbaka ena Iluliko;

²⁰o, ndangaki la mposa mene lacin’eho nsumole bato bosimo’oho bon’olotsi en’ili beneteyana Masiya lina, lacina mpafake en’eango eneki boto’okina oangaka,

²¹yoka bosamb’onoki yoi otengamaka, Iyo bangena, nko bato banatasumolama bosi-mo’onande, Ko iy’anatok’osimo’oho bangononganya.

²²Lacin’eho, emi ntaya eneyal’ino, nko lacina eneki’m’ofekyamaka befekya bike

²³koko isanga enefan’emi lakina etelo en’ekala bene, ko eneki’ni’ookaka mposa mbul’ine bike lacina nje eneyal’ino:

²⁴enengi’m’ocoa Sepania nongoya eneyal’ino (lacin’emi lalengedy’oka nongoken’ino en’okit’onami, ko eneng’is’osidya likisase imbu, emi l’ino, nkwaho boncindela ena mbok’eho).

²⁵Koko isanga locoa Yelusalema okambya ban’oeka.

²⁶Lacina baise Makedonia la baise. Akaya baimedyaki’olotsi lacina basusanya nganji lacin’ena bato biinda banayali eneyali ban’oeka ena Yelusalema.

²⁷O, baimedyaki bolotsi’koko bayali l’esilo l’iyo nkoho. Yombo Befenda bambana l’iyo ena toma toniyo ton’olimo, ekoli lacina Befenda bakamby’iyo la toma tona yonge.

²⁸Lacin’eho, enengi’m’okadya ekambwa ene, ko njaambedya bemamo bone, nongoya la mboka enino enaco’emi ena Sepania.

²⁹Ko emi ley’oka enengi’m’oya eneyal’ino, nongoya l’efulelo en’osako bona nsakama bona Masiya.

³⁰Koko, bifili, lakoond’ino la Nkolo eniso Yesu Masiya ko la nganji ena Bolimo, ino bambanaka l’emi la mposa mene ena beondo benambondel’ino Yakomba;

³¹lacin’eho ntungwa eneyal’iyo bana Yudea banafimedya, ko lacina bosala bonaco’emi ena Yelusalema bimedyame bolotsi la ban’oeka;

³²lacin’eho nje eneyal’ino l’ekiko en’eango ena Yakomba, ko emi l’ino toate lifomya.

³³Yakomba ena mwi ayalamake eneyal’inatu. Ndoho.