Read ngando Ba-Loma 16 Bible Online

Ba-Loma 16 - ngando bible

Ba-Loma 16

¹Emi leyanya Foibe eneyal’ino la lokumo: ende eyali mbangela eniso, bosali bon’ekelesia eneyali ena Kenkulea;

²lacin’eho bosangel’ende eneyali Nkolo yoka bosamb’onokoli la ban’oeka, ko bokamby’ende en’ekambwa en’etaketaka enalang’ende eneyal’ino; lacin’oka endamene ayalamaki bokambi bon’ato bike, ko amonkamby’emamene nkoho.

³Besa Pulisekila la Akwila, banambana l’emi en’osala bona Masiya Yesu;

⁴iyo banambyaki nkingo iniyoamene en’ewedi lacin’ena liiko lonami; banakang’iyo lokango ef’emi kei: nko bikelesia bihitu bina Befenda behetu.

⁵Ko besa baise ekelesia eneyali en’otumb’oniyo. Besa Epaineto onolangama l’emi, ende onoyali bomamo bon’oso eneyali Masiya ena Asia.

⁶Besa Malia, onokambaki bikambwa bike lacin’enino.

⁷Besa Anduloniko ko la Yunia, mbotwa inami banatungamaki l’emi en’onyolo; iyo bayali la lokumo eneyali bikima, ko bayaaki bana-Masiya en’oso’onami.

⁸Besa Ampuliato onolangama eneyali Nkolo.

⁹Besa Ulubano onokambaki l’emi en’osala bona Masiya, ko la Setakusa onolangama l’emi.

¹⁰Besa Apele onotangam’olotsi eneyali Masiya. Besa iy’anayali en’oloi bona Alisitobulu.

¹¹Besa Elodiana onotwa l’emi. Besa iy’anayali eneyali Nkolo en’oloi bona Nalukiso.

¹²Besa Tulufaina ko la Tulufosa banakamb’ikambwa eneyali Nkolo. Besa Pelusi onolangama, onokambaki bikambwa bike eneyali Nkolo.

¹³Besa Lufu onosonama eneyali Nkolo, ko la nyango enande l’emi.

¹⁴Besa Asunkulito ko la Felengono, ko la Eluma, ko la Pateloba, ko la lilumo, ko la bifili biniyali l’iyo.

¹⁵Besa Filolongo ko la Yulia, ko la Neleu ko la mbangela enande, ko la Olumpa, ko la ban’oeka bahatu banayali l’iyo.

¹⁶Besana la ndeyana bolumba bon’oeka. Baise bikelesia bina Masiya bihitu bakees’ino.

¹⁷Koko lakoond’ino, bifili, boongya lilenda iy’anila bikambwanelo ko la bikumbelo eneyal’ino, kuma bayumbele lilako linalik’in’olakamaka, ino bum’eneyal’iyo.

¹⁸Bato ban’omun’oho bafasaele Nkolo eniso Yesu Masiya: basaela bakunju baniyoamene; ko bayonge betema ben’ato banafana locili longo la baoyi’aniyo ban’efefodyi la bana bolambyalambya.

¹⁹Lacina bosimo bon’imeedyo inino bomosekola eneyali bato bahatu. Lacin’eho, lakonyangel’ino; koko lalanga lacina boyalame bana bomwu en’aoyi ban’olotsi, ko bato bana soto ena likambo lin’aoyi’owe.

²⁰Koko efan’olingolingo Yakomba ena mwi angikamela Satana en’ase ban’akak’anino. Isei ina Nkolo eniso Yesu Masiya iyalamake eneyal’ino.

²¹Timoteo onambana l’emi en’osala, ko la Lukio, la Yasona, la Sosipatulo banotwa l’emi bakees’ino.

²²Emi Telutio onoteng’okanda lakees’ino eneyali Nkolo.

²³Ngayo ononsangel’emi ko l’ekelesia ehatu en’otumb’onande, akees’ino. Elasito, bomonyi bon’osolo bon’onyanga, akees’ino, ko la Kwaluto efili nk’osamb’oho.

²⁴(Isei ina Nkolo eniso Yesu Masiya iyalamake eneyal’ino. Ndoho.)

²⁵Koko eneyal’ende oninya likokiky’ino yoka bosamb’onoyali bosimo’onami bon’olotsi ko la nsumola ena bosimo bona Yesu Masiya, yoka bosamb’onoyali enyelo ena yoi lina bofisafisa linalitasumolama ena bisike biniki’oso,

²⁶ohonde isanga limenya, ko limeyana eneyali baise benyanga behetu lacin’eho bafike liho l’imeedyo, lacin’en’ekanda bena basumoli, yoka bosamb’onoyali lotomo lona Yakomba ena bisike bihitu:

²⁷lokumo eneyali Yakomba ena bomwu nk’ende emoko kei, la Yesu Masiya, bisike la bisike. Ndoho.