Read ngando Ba-Loma 3 Bible Online

Ba-Loma 3 - ngando bible

Ba-Loma 3

¹Bise Yuda aleki bato bahatu la nai? ko nkita ena nkesa ena yonge eka nai?

²Bike bon’ekotua l’ekotua; en’oso, noka, baoyi bana Yakomba bafamaki eneyal’iyo.

³Kanga bamoi’aniyo batimedya vo: biinda boniyo bon’imeedyo bosokoehya nde solosolo ena Yakomba?

⁴Efana! Yakomba ayalamake solosolo, koko boto l’oto bofoci, bosamb’onoki yoi otengamaka; Lacin’eho oyengwa en’aoyi’ane, Ko enay’e en’etendelo en’akambo, olonge.

⁵Koko yombo biinda boniso bona mbongi bofoladya mbongi ena Yakomba, tongila is’ate’oya? Iso Mbo, Yakomba onutodya nkele ainda nde mbongi? (Latend l’okotua bon’ato.)

⁶Efana! yombo yok’oho, tumbe Yakomba angotend’akambo ban’ato bana loko yok’osamb’oya?

⁷Ko yombo solosolo ena Yakomba eoatel’ende lokumo loneloleki lacin’ena yoi linaliki’m’ofotuka, emi lakoiyama likambo nk’eyoka boto’on’owe lacina nai?

⁸Ko tofile (yoka bosamb’onoyali nkindoina mpoci, ko bamoi Mbo iso totenda yok’oho), Mbo iso tokambake bowe lacin’eho bolotsi boatame? Ekoiyelo eniyo eakolana nko nkolana.

⁹Iya nai? Iso talek’iyo bolotsi? Efana! ef’oko! lacin’oka tomolaakola en’oso, is’ate le Ba-Yuda le Ba-Elene bayali en’owe, nk’iyatu,

¹⁰to bosamb’onoyali yoi linalitengi, Efan’oto onoyali la mbongi, efana nko l’omoko tu

¹¹Efan’omoko onononganya, Efan’onofona Yakomba.

¹²Iyatu bamotembwa, bamoyalama bato banindankita, nk’iyatu, Efan’onila bolotsi, efana nko l’omoko tu.

¹³Bohoho boniyo boyali nketa enekombwa; Bamofota la ndemi iniyo; Ngenge ena njua eyali en’ase’a nkefu iniyo;

¹⁴Bonyu’oniyo bolola la bemomo ko l’aoyi bananjikela;

¹⁵Bakak’aniyo bayali la laango lacin’eho bayake bato;

¹⁶Mbeha la bino bayali ena mboka iniyo;

¹⁷Ko bateya mboka ena mwi;

¹⁸Mbanga ena Yakomba efayali en’oso bon’aiso’aniyo tu.

¹⁹Koko tey’oka baoyi l’aoyi bahatu banila basangya, baila baho lacin’eniyo banayali ena lifoka lina basangya, lacina bonyua l’onyua bomumame, ko baise’enyanga bahatu bakoiyame likambo la Yakomba.

²⁰Lacin’eho, efan’oto onoyengwa en’oso’onande la bikambwa bin’asangya, lacin’oka bowe boeyana nko l’asangya.

²¹Koko inanga mbongi ena Yakomba emenya efan’asangya, ko basangya l’asumoli bayali temoins ina mbongi eho,

²²nko mbongi ena Yakomba enatama l’imeedyo eneyali Yesu Masiya eneyal’iyatu banimedya, efan’eeikitanelo;

²³lacina bato bahatu bamokwa en’owe, ko baminda bokonde bona Yakomba;

²⁴koko bayengwa boyengo l’isei inande ina nganji, nko la mbiko eneyali Masiya Yesu,

²⁵onoki Yakomba olekyaka lacin’eho ayalame nk’eyoka mbeka en’eambanyedyo, l’imeedyo en’akil’anande, lacin’eho aenyanya mbongi enande, enetakanedy’ende baoyi’owe baho banilamaki’ale, lacin’en’isei ina Yakomba ina ndingalinga:

²⁶noka, lacin eho aenyanya mbongi enande en’isik’ine, lacina endamene ayale ona mbongi, ko la boyengoli bon’oto onimedya Yesu.

²⁷Njofefa eyali meya? Emuma. La boeka boka nai? Boeka bona bikambwa? Efana; nko l’oeka bon’imeedyo.

²⁸Lacin’eho, totanga is’ate boto ayengwa boyengo l’imeedyo, efa l’ikambwa bin’asatigya.

²⁹Yakomba ayali nde Yakomba ona Ba-Yuda kei? Afayali nde Yakomba en’efenda tik’osamb’oho? O, Yakomba en’efenda nkoho;

³⁰lacin’oka Yakomba ayali nk’emoko, onongoyengola banakesania yonge l’imeedyo, ko l’anatakesama yonge l’imeedyo nkoho.

³¹Iya, toyaka nde basangya l’imeedyo? Efana! ef’oko; tokikyabasangya.