Read ngando Ba-Loma 4 Bible Online

Ba-Loma 4 - ngando bible

Ba-Loma 4

¹Tongila is’ate’oya ena likambo lina Abalayama, nkya eniso? Aataki’ale nai lacin’ena yonge?

²Yo-mbo Abalayama ayengwaki boyengo l’ikambwa, aataki etelo oyofef’endamene la ncin’eho, ohonde efa eneka Yakomba.

³Bokanda bona Yakomba botenda bokotu’oya? Ate, Abalayama aimedyaki, Yakomba, ko imeedyo ibo iandamaki eneyal’ende yoka mbongi.

⁴Nko boto akamb’ekambwa, mpuci efatangama mpuci en’isei: eyali nk’osilo.

⁵Ohonde eneyal’ende onofakamb’ekambwa, koko aimedy’ende onoyengola boto onofana mbongi ena Yakomba, imeedyo inande yandama yoka mbongi;

⁶yoka bosanib’onatenda Dawidi lacin’en’ekiko en’oto onongi Yakomba oandela mbongi kum’afan’ikambwa,

⁷ate, Iy’anatungwa en’ikambwa biniyo bin’owe, ko baoyi’owe’aniyo bamokundama, baosakelama bosako.

⁸Boto onofaandama bowe la Yakomba aosakelama bosako.

⁹Bosako bone bosakama eneyal’iy’anakesama yonge kei, yombo eneyal’iy’anatakesama yonge nkoho? Lacin’iso tila, is’ate, Imeedyo ina Abalayama iandamaki eneyal’ende yoka mbongi.

¹⁰Iho iandamaki yok’osamb’oya? Eneki’nd’okesama ka yonge, yombo kum’atakesama yonge? Ef’eneki’nd’okesamaka yonge, nk’en’oso, kum’atakesama yonge.

¹¹Ko atambaki ndembi eka nkesa ona yonge, nko ndembi ena mbongi eho en’imeedyo iniki’nd’oimedyaka kuntatakesama yonge, lacin’eho ayalame bafango bon’ato bahatu banimedya, kanga batakesama yonge, lacina mbongi eandame eneyal’iyo nkoho;

¹²ko lacina ayalame bafango’ona nkesa ena yonge eneyal’iy’anakesama yonge, efa lacin’oka bamokesama yonge kei, koko lacina bayakile ena baina ban’imeedyo iho iniki bafango’oniso oka Abalayama oimedyaka kum’atakesama yonge.

¹³Tisemba eneki Abalayama l’an’anande otambaka, lacina ayalame bosangoli bon’enyanga behetu, etayala lacin’en’asangya, eyaaki lacin’ena mbongi en’imeedyo.

¹⁴Lacina, yombo baise’asangya bayali basangoli, imeedyo ioyalama bototoloto, ko esemba eehyama.

¹⁵Lacina nkele eatama nko l’asangya: enefayali basangya, mpulunganya efayali meho.

¹⁶Lacin’eho, mbongi eyali lacin’en’imeedyo lacin’eho eyalame bosamb’onoyali ise, lacina esemba ekikyame la locili eneyali bana bahatu: ef’eneyali baise’asangya kei, koko eneyali baho ban’imeedyo ina Abalayama, onoyali bafango’on’isatu

¹⁷(bosamb’onoyali yoi linalitengi, Mokiil’e bafango bon’ato ban’enyanga bike) en’oso’onande onoki’nd’oimedyaka, nko Yakomba, onetola bato banawaki, ko onelela bikambwa binifayali yoka biyali.

¹⁸Eneten’ende ncina ena ndengedya tu, aongyaki yimedya la ndengedya, lacina ayalame bafango bon’ato ban’enyanga bike, yok’osamb’onoki yoi otendamaka, Ban’ane bangoyala nkoho.

¹⁹Ende atalemba en’imeedyo, ko atakanela yonge linandamene linaliyaaki yoka limowa (ende atundaki esik’eho yoka mbula bokama), ko atakanela botundu bona lototo lona Sala:

²⁰atakandakanda la biinda bon’imeedyo lacin’en’esemba ena Yakomba, ohonde akikyamaki locili en’imeedyo, akumyaki Yakomba,

²¹ko aeyaki nko njeya mene, ate ende ailisa yoi linaliki’nd’osembyak’esemba.

²²Ko la ncin’eho imeedyo inande iandama etieyal’ende yoka mbongi.

²³Koko yoi liho litatengama lacin’enande kei, lika imeedyo iho iandama eneyal’ende;

²⁴limotengama lacin’eniso nkoho, lacin’oka imeedyo iho itigandama eneyal’iso banimedy’ende onetolaki Yesu Nkolo eniso enek’ato banawaki.

²⁵Ende alekyamaki en’ewedi lacin’ena bewe beniso, ko aetolamaki lacin’ena boyengo bonatoyengol’ende.