Read ngando Ba-Loma 6 Bible Online

Ba-Loma 6 - ngando bible

Ba-Loma 6

¹Yok’oho, iso tongil’oya? Tomboyala nde en’owe lacin’eho isei ifule?

²Efana! is’anawaki eneyali bo-we, tongutwa lakina en’owe yok’osamb’oya?

³Ino bofeya nd’oka isatu baninamaki eneyali Masiya Yesu tinamaki en’ewedi’enande?

⁴Lacin’eho, tokunjama-ki l’ende l’inamelo en’ewedi; lacina yok’onoki Masiya oetwaka enek’anawaki la bokonde bona Bafango, nk’osamb’oho iso tokende ena liiko lone lototo.

⁵Yomb’iso tambana l’ende en’ekolanya en’ewedi’enande, tongambana l’ende en’ekolanya en’eetwelo enande nkobo.

⁶Tey’oka boto’oniso onoki’oso aakamaki l’ende en’ekulusu, lacin’eho yonge lin’owe liyakame, lacin’iso tofayalame lakina ena yombo lin’owe;

⁷lacin’oka ende onowaki amotungwa en’owe.

⁸Koko yombo towaki la Masiya, timedy’oka tongika l’ende;

⁹enek’is’oeyak’oka Masiya amoletwa enek’anawaki, ko afut’owa lakina tu: bewedi befaataki lakina locili eneyal’ende.

¹⁰Lacina bewedi beneki’nd’owaka, awaki eneyali bowe bowa bomoko kei’koko liiko loneloik’ende, ayaike eneyali Yakomba.

¹¹Nk’osamb’oho, boyota ng’inoamene nk’anawaki eneyali bowe, koko banayaike eneyali Yakomba la Masiya Yesu.

¹²Lacin’eho, botimedyake bowe boate locili lona lifoka ena yonge linino lin’ewedi, lacina bile baoyi bana mposa ena liho;

¹³ko botalekyake bilama binino eneyali bowe yoke bimunyi bina baoyi baninda mbongi; ohonde boyolekyak’inoamene eneyali Yakomba, yona bato banayaike eneyali banawaki, ko bilama binono yoka bimunyi bina mbongi eneyali Yakomba.

¹⁴Lacin’oka bowe bofaataki locili lona lifoka eneyalino; lacina ino bofayali ena lifoka lina basangya; boyali ena lifoka lin’isei.

¹⁵Iya, enefayal’iso ena lifoka lin’asangya, toyali ena lifoka lin’isei, tongila nd’owe? Efana!

¹⁶Bofey’okanko boyoleky’inoamene eneyali boto yoka baombo lacina bofik’ende mpika, bomoyalama baombo ban’oto’oho onafik’ino mpika yombo ban’owe bonokoyedya en’ewedi, yombo ban’imeedyo ina mpika inakoyedya ena mbongi?

¹⁷Koko tokanga Yakomba lokangolacin’oka kang’ino boyaaki baombo ban’owe, bomofika bokotu’oho bona lilako bonok’in’olakamaka;

¹⁸ko enek’in’otungwaka en’owe, boyalamaki baombo bana mbongi.

¹⁹(Latenda Lokotua bon’ato lacin’ena bolu’olu bona yonge linino.) Yoka bosamb’onok’in’olekyaka bilama binino baombo bana nsefo la bokaokando bon’owe bonokoyedya lakina nk’ena bokaokando bon’owe, nk’osamb’oho isanga bolekya bilama binino baombo bana mbongi enakoyedya en’oeka.

²⁰Enek’in’oyalaka baombo ban’owe botayala ena yombo lina mbongi.

²¹Bemamo benek’in’oataka en’esik’eho en’aoyi’abo banok’ino nsoi isanga beka nai? lacin’oka nsimbo en’aoyi’aho eyali nk’ewedi.

²²Ghonde isanga bomotungwa en’owe, ko bomoyalama baombo bana Yakomba, boyali la bemamo benino en’oeka, ko esimbelo nko liiko lonelofakale.

²³Lacina mpuci en’aoyi’owe eyali nk’ewedi, koko nganji ona Yakomba eyali nko liiko lonelofakale eneyali Masiya Yesu Nkolo eniso.