Read ngando Ba-Loma 8 Bible Online

Ba-Loma 8 - ngando bible

Ba-Loma 8

¹Lacin’eho, isanga iy’anayali eneyali Masiya Yesu balakoiyama lakina likambo.

²Lacina boeka bona Bolimo bona liiko eneyali Masiya Yesu bomombikola ena boeka bon’owe l’on’ewedi.

³Lacin’oka ekambwa enetakambisa basangya, lacina baho bayaaki bolu’olu lacin’ena yonge, Yakomba akambaki nk’eho. Atomaki bon’onande bona mpame en’ekolanya ena yonge lin’owe, lacin’en’owe, ko akoiyaki bowe ena yonge;

⁴lacin’eho mbongi en’asangya eilame eneyal’iso banafakende l’okotua bona yonge; toyakende l’okotua bon’olimo.

⁵Lacin’oka iy’anakila bokotua bona yonge bakanela nko baoyi bana yonge; koko iy’anakila bokotua bon’olimo bakanela nko baoyi ban’olimo.

⁶Lacin’oka nkanela ena yonge, bewedi nd’eho; ohonde nkanela ena bolimo eyali nko liiko ko la mwi.

⁷Lacina nkanela ena yonge eyali nko njoka ena Yakomba bowe; lacina eho efafike basangya bana Yakomba, ko efafikisa baho;

⁸ko iy’anayali ena lifoka lina yonge bafokyisa Yakomba ekiko.

⁹Koko ine bofayali ena lifoka lina yonge; yombo bolimo bona Yakomba atonga eneyal’ino litonga boyali eneyali Bolimo. Yombo boto afana Bolimo bona Masiya, afayali ona Masiya.

¹⁰Koko yombo Masiya ayali eneyal’ino yonge limowa lacin’en’owe; koko bolimo boyaike lacin’ena mbongi.

¹¹Koko yombo Bolimo’onande onetolaki Yesu enek’anawaki atonga eneyal’ino litonga, ende onetolaki Masiya enek’anawaki angetola baonge’anino ban’ewedi nkoho lacina baike lacin’ena Bolimo’onande onoyali eneyal’ino.

¹²Lacin’eho, bifili, iso toyali l’esilo; beho befayali besilo bena yonge lacina tokile bokotua bona yonge;

¹³yomb’ino boyakile bokotua bona yonge bongowa; ohonde yombo boyaka bikambwa bina yonge la Bolimo, tumbe bongika.

¹⁴Lacina iy’analondama la bolimo bona Yakomba, baho bayali ban’ana Yakomba.

¹⁵Lacin’oka ino botatamba bolimo bona yombo lacin’eho boange lakina; botambaki nko bolimo bona lifoka lina bona, bonalolu’iso, is’ate Aba, Bafango.

¹⁶Bolimo mene aambana l’olimo’oniso ena yoi line, ate, iso toyali ban’ana Yakomba;

¹⁷ko yombo toyali bana, toyali basangoli; basangoli bana Yakomba, ko tambana la Yesu nko mbambana ena lisango; yombo ten’ino l’ende, lacin’eho tambane l’ende en’okonde’onande.

¹⁸Lacin’emi lakanel’oka bino bin’isik’ine bifakolana likolanyama l’okonde bonongenya lingu eneyal’iso.

¹⁹Lacin’oka bikambwa bininunolamaki biolengedya la mposa mene nk’enyelo ena ban’ana Yakomba.

²⁰Lacina bikambwa bininunolamaki biilamaki ena yombo lina mbeha, ef’eneki bihoamene olangaka, ohonde lacin’enande onilaki biho;

²¹eneki’nd’olengedyaka lacina bikambwa mene bininunolamaki bitungwa linga ena yombo lina botuku eneyali etungwelo en’okonde bona ban’ana Yakomba.

²²Lacin’iso tomey’oka bikambwa bininunolamaki biosaa, ko biyatate la lonwa laanda yengoko esik’ene.

²³Koko efa yok’oho kei: isoamene banata bemamo ben’oso bona Bolimo, iso toyatate en’etem’eniso, toyalengedya eilamelo eneng’is’oilam’olo ena lifoka lina bana, nk’etungwelo ena yonge liniso.

²⁴Lacin’oka tikaki la lolengedyo; ohonde ndengedya enenya efayali lacina ndengedya; ekambwa enen’oto, aut’olengedya eho lakina bosamb’oya?

²⁵Koko yombo toyalengedya ekambwa enefen’iso, tolengedy’ebo la locinji mene.

²⁶Nk’osamb’oho Bolimo aotokambya ena tongitongi toniso; lacin’iso tofeya bokotua bonong’is’oonda, nk’okotua bonakolana; ohonde Bolimo mene ayaonde lacin’eniso la besao benefatendamisa;

²⁷ko ende onosisola betema ameya lokanyi lona Bolimo, lacin’ende ayaonde lacin’ena ban’oeka yoka bosamb’onoyali eango ena Yakomba.

²⁸Koko iso tomey’oka baoyi bahatu baambana nko mbambana lacin’eho bakambe bikambwa bin’olotsi lacin’eniyo banoka Yakomba nganji, nk’iy’anelelama yoka bosamb’onoyali eango enande.

²⁹Iyo banaki’nd’oeyak’ale en’oso, asonaki baho en’oso, lacin’eho bakolane l’ekolanya en’okotua bona Bon’onande’ona mpame, lacin’ende ayalame ngolo en’akune bike.

³⁰Koko aelelaki iyo banaki’nd’osonak’oso, ko ayengolaki iy’anak’nd’oelelaka; ko baho banaki’nd’oyengolaka ailaki ena lifoka lin’okonde.

³¹Koko yoi linaling’is’otenda lacin’ena baoyi’ane lika nai? Yombo Yakomba ayali l’iso, onongotosimba oka nai?

³²Ende onotasimbya Bon’onandamene bona mpame, ohonde aolekyaki lacin’en’isatu, afatof’iso l’ende toma tohatotu l’isei bosamb’oya?

³³Ononge-kola banaki Yakomba osonaka oka nai? Onoyengola boyengo nko Yakomba;

³⁴onongakoiya oka nai? Masiya kongoawaki, o, ko aetwaki lakina enek’anawaki, ko ayali en’ili bona likasa y’ome lina Yakomba, ko ayatoondel’iso.

³⁵Onongotalanya la nganji enatooka Masiya oka nai? Yombo bino, yombo belingitano, yombo nyoma, yombo loci lona njala, yombo bolumbulumba, yombo mbolama l’ewedi, yombo lokula lon’ita?

³⁶Yoka bosamb’onoyali yoi linalitengi, Toyakama bina tu lacin’ena; Totangama yoka mpate inikoli l’eyakelo.

³⁷Ohonde toleki lilonga elonga en’aoyi’ane bahatu l’ende onotoka nganji.

³⁸Laein’emi lakusa yimedy’oka bewedi, la liiko, la bikima bina loola, la bafoka bana locili, la mpamba, la baoyi banayali inanga, la baoyi banangoya lingu,

³⁹la lisango, la lingunda, Lekambwa emoi enenunolama en’etaketaka; baho bahatu bafinya litalanya la nganji enatoka Yakomba eneyali eneyali Masiya Yesu Nkolo eniso.